Friday, 20 September 2019 10:03

රක්ෂණය පුළුල් කොට ජනතාවට වැඩි ප්‍රතිලාභ ලබාදිය යුතුයි

ශ්‍රී ලංකාවේ රක්ෂණ අංශය තවදුරටත් පුළුල් විය යුතු බවත්, ඒ හරහා ජනතාවට වැඩි ප්‍රතිලාභ අත්කරදීමක් සිදුවිය යුතු බවත් පී.එල්.සී. ඉන්ෂුවරන්ස් ප්‍රධාන විධායක නිලධාරී දීපාල් අබේසේකර මහතා ප්‍රකාශ කෙළේය.

මෙරට රක්ෂණ අංශයේ සමස්ත වත්කම් වසර 2017 නිමාවනවිට රුපියල් බිලියන 564.9ක සිට වසර 2018 අවසානයේදී රුපියල් බිලියන 606.6ක් දක්වා සියයට 7.4කින් වර්ධනය වී ඇතැයි ද එය යහපත් ප්‍රවණතාවයකැයි ද දීපාල් අබේසේකර මහතා කීය.

වසර 2018 නිමාවනවිට මෙරට රක්ෂණ අංශයේ සමාගම් 26ක් මෙහෙයුම් කටයුතුවල නිරතව ඇති බව පැවැසූ දීපාල් අබේසේකර මහතා, ඉන් සමාගම් 12ක් සාමාන්‍ය රක්ෂණ සමාගම් ලෙසත්, තවත් සමාගම් 12ක් දිගුකාලීන රක්ෂණ සමාගම් ලෙසත්, සමාගම් දෙකක් දිගුකාලීන හා සාමාන්‍ය රක්ෂණ යන ව්‍යාපාර දෙකහිම නියැලෙන බවත් ප්‍රධාන විධායක නිලධාරිවරයා පැවැසීය.

මේ අන්දමට රටේ සමස්ත රක්ෂණ අංශයේ ක්‍රියාකාරීත්වය පිළිබඳව පැහැදිලි කිරීමක් කළ දීපාල් අබේසේකර මහතා තරඟකාරීත්වය හමුවේ පසුනොබැස ඉදිරියට ඒම පීපල්ස් ඉන්ෂුවරන්ස් හි අරමුණ විය යුතු බව අවධාරණය කෙළේය.

පොළොන්නරුව ප්‍රදේශයේ ඕනෑම කෙනෙකුට තම රක්ෂණ සේවා අවශ්‍යතා ඉතාම වගකීමෙන් විශ්වාසයෙන් ඉටුකර ගැනීමට හැකිවනසේ අංක 388/B, රෝහල හන්දිය, පොළොන්නරුව යන ස්ථානයෙහි නව පීපල්ස් ඉන්ෂුවරන්ස් ප්‍රාදේශීය කාර්යාලය විවෘත කිරීමේ අවස්ථාවට එක්වෙමින් දීපාල් අබේසේකර මහතා මේ අදහස් පළකළේය.

වැඩිදුරටත් අදහස් දැක්වූ ඒ මහතා මෙසේ ද කීය.

මෝටර් රථ, දේපළ, සංචාරක සහ මුහුදු රක්ෂණ ඇතුළුව පුද්ගලයන්ට සහ සමාගම්වලට පීපල්ස් ඉන්ෂුවරන්ස් පීඑල්සී පුළුල් පරාසයක සාමාන්‍ය සේවාවන් ලබාදෙයි. අද වනවිට සමාගමට විශාල ගනුදෙනුකාර පදනමක් ඇති අතර එහි වාර්ෂික වාරික ආදායම රු. බිලියන 5.5 ඉක්මවයි.

පීපල්ස් ඉන්ෂුවරන්ස් පීඑල්සී දිවයින පුරා සිය ප්‍රාදේශීය කාර්යාල ජාලයක් පවත්වා ගෙන යන අතර පීපල්ස් ලීසිං ඇන්ඩ් ෆයිනෑන්ස් පීඑල්සී ශාඛා ඔස්සේ කවුළු කාර්යාල 100 කට අධික සංඛ්‍යාවක් ද පවත්වා ගෙන යයි. මහජන බැංකුවේ ප්‍රාදේශීය කාර්යාලවලද එහි කටයුතු පවත්වාගෙන යනු ලබයි.

පීපල්ස් ඉන්ෂුවරන්ස් පොළොන්නරුව නවතම ප්‍රාදේශීය කාර්යාලය විවෘත කිරීමේ අවස්ථාවට පොළොන්නරුව නගර සභාවේ නගරාධිපති චානක සිදත් රණසිංහ, මහජන බැංකුවේ පොළොන්නරුව ප්‍රාදේශීය කළමනාකාරිණි ඉඳුමිණී රත්නායක, පොළොන්නරුව පීපල්ස් ලීසිං කළමනාකරු ඇතුලු පීපල්ස් ලීසිං ආයතනයේ නිලධාරීන්, පීපල්ස් ඉන්ෂුවරන්ස් කළමනාකාරීත්වය, ප්‍රාදේශීය ව්‍යාපාරික ප්‍රජාව ඇතුළු ප්‍රදේශයේ සම්භාවනීය ආරාධිතයින් රැසක් සහභාගීව සිටියහ.

(Dinamina)

Business News

Stats

There are 28560 listings, 863 categories and 102 owners in our website