Business News

සහල් සඟවා තබා ගන්නා වී මෝල් හිමියන් සම්බන්ධයෙන් සහ දේශීය සහල් ලෙස ආනයනික සහල් අලෙවි කරනු ලබන වෙළෙඳුන් පිළිබදව දැඩි නීතිමය ක්‍රියාමාර්ග ගන්නා බව පාරිභෝගික සේවා අධිකාරිය පවසනවා.

ඒ අනුව වී මෝල් හිමියන් සහ සහල් ආනයනකරුවන් සතුව ඇති තොග සම්බන්ධයෙන් විමර්ශනයක් සිදුකර ඒවා පාරිභෝගිකයන් අතර බෙදී ගොස් ඇති ආකාරය සම්බන්ධයෙන් වාර්තාවක් සකස් කරන ලෙසයි කර්මාන්ත සහ වාණිජ කටයුතු අමාත්‍යවරයා උපදෙස් ලබාදී ඇත්තේ. (hirunews)

- අපනයන සංවර්ධන මණ්ඩලයේ සභාපතිනි ඉන්දිරා මල්වත්ත

* නව අපනයන හඳුනා ගැනීමේ ප්‍රාදේශීය සම්මන්ත්‍රණ ‍මාලාව හෙටින් ඇරැඹේ
* අඩාල වූ කුඩා කම්හල් ජී.එස්.පී.+ අභියෝගයට මුහුණ දෙන්න සූදානම්
* ලෝ පතළ සන්නාම ගොන්නට ‘සිලෝන් සිනමන්’ (කුරුඳු)
* සපත්තු ඉංජ‍ිනේරු තාක්ෂණයෙන් ශ්‍රී ලංකාව ජාත්‍යන්තරයට

ශ්‍රී ලංකාවට ලැබී ඇති ජී.එස්.පී. බදු සහනය හේතු කොටගෙන යළි උදාවුණු යු‍‍රෝපා සංගම් වෙළෙඳ පොළ ඉල්ලුමට සරිලන ලෙස නව අපනයන ක්ෂේත්‍ර හඳුනා ගැනීම සඳහා අපනයනකරුවන් දැනුවත් කිරීමේ දීප ව්‍යාප්ත සම්මන්ත්‍රණ මාලාවක් දියත් කිරීමට ශ්‍රී ලංකා අපනයන මණ්ඩලය සූදානම් වේ. මෙම වැඩසටහන් මාලාවේ පළමුවැන්න මේ මස 29 වැනිදා කොළඹ ශ්‍රී ලංකා අපනයන සංවර්ධන මණ්ඩලයේදී පැවැත්වේ. එම සම්මන්ත්‍රණ මාලාවේ ‍දෙවැන්න ජූනි මස 07 වැනිදා මහනුවර දී ද තෙවැන්න ජූනි මස 13 වැනිදා ගාල්ලේදී සහ සිවුවැන්න ජ‍ූනි මස 15 වැනිදා කුරුණෑගලදී ද පැවැත්වීමට නියමිත ය.

මෙම සම්මන්ත්‍රණ මාලාව දිවයිනේ සියලුම අපනයනකරුවන්ට විවෘත වන අතර සම්ප්‍රදායික නොවන අපනයන හඳුනාගැනීම, ඒවා යුරෝපා සංගමයේ රටවල ඉල්ලුමට සරිලන අයුරු උසස් තත්ත්වයෙන් නිෂ්පාදනය කිරීම හා වෙළෙඳපොළ අවස්ථා හඳුනා ගැනීමට සුළු හා මධ්‍ය පරිමාණ අපනයනකරුවන්ට අවස්ථාවක් ලබාදීමේ අරමුණෙන් පැවැත්වෙන බව අපනයන සංවර්ධන මණ්ඩලයේ සභාපතිනි ඉන්දිරා මල්වත්ත මහත්මිය සිළුමිණට පැවැසුවා ය. ජී.එස්.පී. ප්ලස් සහනය යළි ශ්‍රී ලංකාවට හිමි වීමත් සමඟ මෙරට නව අපනයන කරුවනට එමඟින් අත්වන විශේෂ වාසි හා එම වාසි ලබාගැනීමට අපනයන සංවර්ධන මණ්ඩලයෙන් ලබාදෙන සහයෝගය කවරාකාර ද යන්න පිළිබඳ අප විසින් අසන ලද පැනයට පිළිතුරු දෙමින් සභාපතිනිය ඒ බව පැවැසුවා ය. ජී.එස්.පී. + සහනය නැවත හිමිවීම සහ ඒ සහනය අපට හිමිවන ඉදිරි වසර පහක කාලය සඳහා අපනයන ක්ෂේත්‍රයෙහි පවතින සූදානම පිළිබඳ සභාපතිනිය විසින් දක්වන ලද අදහස් අයුරින් මේ ලිපිය සැකසෙයි.

ජී.එස්.පී. + සහනය යළි හිමි වී තිබෙනවා. එයින් නිසි ඵල ලබා ගන්නට ශ්‍රී ලංකා අපනයන සංවර්ධන මණ්ඩලය අපේ අපනයනකරුවන්ට ලබාදෙන මාර්ගෝපදේශකත්වය කෙබඳු ද?

ජී.එස්.පී. + සහනය මෙරට ක්‍රියාත්මක වුණේ 2001 - 2009 කාල සීමාවේ. එය අප රටට අහිමි වුණේ 2010 දී මේ රජය පත්වූ පසුව එම සහනය යළිත් අප රටට ලබා ගන්නට හැකි වේය යන විශ්වාසයෙන් යුතුව අපි කටයුතු කළා. අපනයන සංවර්ධන මණ්ඩලය ගත වූ වසර දෙක හමාරක වැනි කාලය තුළ කටයුතු කළේ ඒ අරමුණෙන් යුතුවයි.

ජී‍.එස්.පී. + සහනය අහිමි වීමත් සමඟම ලංකාවේ එයින් ප්‍රතිලාභ ලත් ඇඟළුම් කම්හල් රැසක් වැසී ගියා. එසේ වැසී ගිය කම්හල් සංඛ්‍යාව 200 ක් පමණ වෙනවා. 25000 කට පමණ රැකියා අහිමි වූ බව කියනවා. මෙවර ජී.එස්.පී. + බදු සහනය ලැබීමත් සමඟ එසේ අඩාල වූ ඇඟළුම් කම්හල් යළි නිෂ්පාදන ඇරඹීම සඳහා අපි සූදානම් කර තිබෙනවා. මෙතෙක් අපේ රටෙන් යුරෝපා වෙළෙඳපොළ ජය ගෙන තිබුණේ ඇඟළුම් සහ පාවහන් අපනයන අංශ පමණයි. එම කර්මාන්ත වලට අමතරව නව අපනයන හඳුන්වා දීමට මෙන් ම එතෙර වෙළෙඳපොළ ඉලක්ක ජයගන්නා ආකාරයට ඒවා නිෂ්පාදනය කරන ආකාරය කියාදීමට හා වෙළෙඳපොළ සොයා ගන්නට අප උදවු කරනවා.

ඉහත සඳහන් කළ ආකාරයේ දැනුවත් කිරීමේ වැඩසටහන් පවත්වන්නේ ඒ අරමුණ ඇතිවයි. මෙතෙක් අප යුරෝපා සංගමයේ රටවලින් එංගලන්ත වෙළෙඳපොළටයි ප්‍රධාන වශයෙන් ම භාණ්ඩ අලෙවි කළේ එහෙත් යුරෝපා සංගමටය අයත් රටවල් 27 ක් තිබෙන බව අප අමතක නොකළ යුතු යි. ඒ රටවලින් විවිධ භාණ්ඩ සඳහා විශාල ඉල්ලුමක් තිබෙනවා. අපි ඒ අවස්ථාව ලබා ගන්නට උත්සාහ කරනවා.

එලෙස හඳුනාගත් නව අපනයන ක්ෂේත්‍ර මොනවාද?

මත්ස්‍ය අපනයනය සඳහා පැවැති යුරෝපා මත්ස්‍ය තහනම ඉවත් වූ පසුව 2016 ජූනි සිට දෙසැම්බර් මාස 6 තුළ අපේ ධීවර කර්මාන්තයෙහි අපනයන ආදායම 44% කින් වර්ධනයක් වී තිබෙනවා. සම්ප්‍රදායික ලෙස මසුන් අපනයනය කිරීම හැරුණු විට අගය එකතු කළ මත්ස්‍ය නිෂ්පාදන යුරෝපා සංගමයට අයත් රටවලට අ‍ෙලවි කරන්නට පුළුවන්. ජී.එස්.පී. + බදු සහනය ලැබුණු පසු එම ආදායම විශාල ලෙස ඉහළ යනු ඇතැයි අපේක්ෂා කරනවා.

සම්ප්‍රදායික ලෙස අපනයනය කළ කුරුඳු මිටි වෙනුවට කුරුඳු ආශ්‍රිත නව නිෂ්පාදන රැසක් අපි හඳුන්වා දී තිබෙනවා. කුරුඳු තේ, කුරුඳු කුඩු, කුරුඳු රසැති චුවින්ගම් සහ කුරුඳු පෙති වැනි අගය එකතු කළ නිෂ්පාදන රැසක් අපනයන කරුවන් වෙත හඳුන්වා දී තිබෙනවා. ඇඟලුම් ක්ෂේත්‍රයෙන් යු‍රෝපා වෙළෙඳපොළ වෙත හොඳම තත්ත්වයේ ක්‍රීඩා ඇඟලුම් අපනයනය කරන්නේ අපේ රටෙන්. උණුසුම් සහ සිසිල් පරිසරයට අනුව හැඩ ගැසෙන සුළු (Thermos sports wear)ක්‍රීඩා ඇඟළුම් සඳහා අද ලෝකයේ ශ්‍රී ලාංකික සන්නාම සඳහා ඉහළ ඉල්ලුමක් තියනවා. මෙම ව්‍යාපාර ක්ෂේත්‍රය තවදුරටත් සංවර්ධනය කරගැනීමට අපි අපනයනකරුවන් දිරි ගන්වනවා.

සපත්තු නිෂ්පාදනයට දැන් ඉංජිනේරු තාක්ෂණය හඳුන්වා දී තිබෙනවා. ප්‍රංශයෙන් පුහුණුකරුවන් ගෙන්වා සපත්තු ඉංජිනේරු තාක්ෂණය මෙරට සපත්තු නිෂ්පාදකයන්ට හඳුන්වා දුන්නා. යු‍රෝපා වෙළෙඳ පොළට සරිලන පරිදි සපත්තු නිර්මාණය, වර්ණ සංකලණය හා මෝස්තර හඳුන්වා දී තිබෙනවා. මැණික්, දියමන්ති, වාහන අමතර කොටස් ‍ඉලෙක්ට්‍රෝණික උපාංග , පාපැදි නිෂ්පාදනය, විද්‍යුත් හා විදුලි නිෂ්පාදන, සකස් කළ ආහාර පාන, නිමි ඇඳුම්, ආහාර රසකාරක, කුළුබඩු හා අධ්‍යාපන සේවා වැනි නව අපනයන භාණ්ඩ හා සේවා රැසක් මෙහිදී හඳුන්වා දෙනු ලබනවා.

වෙළෙඳපොළ හඳුනා ගැනීමට මණ්ඩලයෙන් සැපයෙන සහයෝගය කවරාකාරද?

එම අපනයන උසස් වෙළෙඳ පළ ඉල්ලුමට සරිලන ආකාරයට නිෂ්පාදනය කරන ආකාරය පිළිබඳ තාක්ෂණික ඥානය ලබාදීම, අන්තර්ජාතික වෙළෙඳපොළ ජයගන්නට අවශ්‍ය තත්ත්ව සහතික ලබා ගන්නා ආකාරය පෙන්වා දීම අපනයන වෙළෙඳ පොළ හඳුන්වා දීම මෙන් ම අපනයනකරුවන් මුණ ගැස්වීම සඳහා මැදිහත් කරුවකු මෙන් ම සේවා සපයන්නකු ලෙස කටයුතු කරනවා.

මේ වනවිට එලෙස සංවර්ධනය කර ඇති කර්මාන්ත මොනවාද?

කුරුඳු කර්මාන්තය. අද ලොව නන් දෙසින් ලංකාවේ කුරුඳු සඳහා විශාල ඉල්ලුමක් තියෙනවා. ඊට හේතුව ශ්‍රී ලංකාවේ කුරුඳු, පිරිසිදු කුරුඳු වීමයි. එහි රසය ලංකාවට ආවේණිකයි. කුරුඳු සඳහා ආදේශකයක් වන කැෂියා මිලෙන් අඩුයි. බොහෝ දුරට රසය සමානයි. ඒත් අ‍ෙප් රටේ කුරුඳු වල ඇති ඖෂධීය ගුණය කැෂියාවල නෑ. ඒ නිසා අපේ රටට ආවේණික කුරුඳු රසයට ඉහළ ඉල්ලුමක් තියෙනවා. එම වෙළෙඳපොළ ඉල්ලුම ජයගන්නට නම් අපි ජගත් ඇගැයුම් ක්‍රියාදාමයට එකතු විය යුතුයි. ඒ සඳහා අන්තර්ජාතිකව පිළිගත් භුගෝලීය අනන්‍යතා සහතිකය (Geographic Implication Certificate) ලබාගත යුතුයි. ඒ සඳහා විශාල වියදමක් මෙන් ම වෙහෙසක් දරන්නට වෙනවා. එහෙත් මේ වනවිට අපි ‘Ceylon Cinnamon’ යන සන්නාමය සඳහා GI සහතිකය ලබා ගැනීම සඳහා කටයුතු කරමින් සිටිනවා. එය ලබාගත් පසු ලංකාවේ තේ මෙන් ම ‘ලංකාවේ කුරුඳු’ ත් ලොව පිළිගත් සන්නාමයක් බවට පත් වෙනු ඇති.

කුරුඳු කර්මාන්තය දියුණු වන විට ඒ හා සම්බන්ධ සංචාරක අංශය දියුණු වෙනවා. අතීතයේදී ‘කුරුඳු තැලීම’ සුළු රැකියාවක් ලෙස සැලකුණත් දැන් ඒ කර්මාන්තයට උසස් තත්ත්වයක් ලබා දී තිබෙනවා. එදා වගේ බිම ඉඳගෙන කුරුඳු තලනවා වෙනුවට අද ඒ ශිල්පීන් නිල ඇඳුමක් ඇඳගෙන උස් ආසනවල හිඳගෙන මේසයක් මත තබාගෙන කුරුඳු තලනවා. ඒ සඳහා ම ‘කුරුඳු කාර්මික පීඨය’ නමින් පුහුණු ආයතනයක් අරඹා තිබෙනවා. එහිදී අන්තර්ජාතික උසස් වෙළෙඳපොළ ඉල්ලුමට සරිලන ආකාරයේ නිෂ්පාදන කිරීම සඳහා පුහුණුව ලැබූ කුරුඳු සැකැසුම්කරුවන්ට අන්තර්ජාතිකව පිළිගනු ලබන සහතිකයක් නිකුත් කරනවා.

ආහාර නිෂ්පාදන කර්මාන්තය ගත් විට අප ආයතනය මගින් නව නිෂ්පාදන හඳුන්වා දෙනවා. යහපත් නිෂ්පාදන පද්ධතිවලට එළැඹෙන්නට අවශ්‍ය දැනුම හා පුහුණුව ලබා දෙනවා. ආහාර වගා කිරීමේදී කෘෂි රසායන භාවිතයෙන් තොරව කාබනික පොහොර පමණක් යොදා වගා කිරීමේ සිට අස්වනු නෙලා ඇසුරුම්කර අපනයනය කරන තුරුම පිළිපැදිය යුතු නිසි ක්‍රියා පිළිවෙල අපි කියා දෙනවා. ශ්‍රී ලංකා ප්‍රමිති ආයතනය වැනි ආයතන, කාර්මික තාක්ෂණ ආයතනය, ආයෝජන මණ්ඩලය වැනි ආයතනවල සහයත් අපි ලබා ගන්නවා.

නව නිපැයුම්කරුවන්ට ඔබේ ආයතනයෙන් ලැබෙන සේවා මොනවාද?

නව නිපැයුම්කරුවන්ට තම භාණ්ඩ සඳහා විදේශීය ගැනුම් කරුවන් සොයා දෙන්නට හා ඔවුන් ගේ නිපැයුම් වැඩි දියුණු කරගන්නට අවශ්‍ය පූර්ණ සහයෝගය ලබාදෙනවා. අවශ්‍ය අවස්ථාවල ඔවුනට විදෙස් ප්‍රදර්ශනවලට නිර්මාණ ඉදිරිපත් කිරීමට හෝ ගැනුම් කරුවන් හමුවීමට ආර්ථික අපහසුතා ඇත්නම් අප ඒ ගැටලු විසඳා දීමට සූදානම්.

විදෙස් ප්‍රදර්ශන සඳහා සූදානමක් තිබෙන බව ඔබ කීවා?

නැවත ජී.‍එස්.පී. + සහනය අප රටට ලබාගැනීමට හැකිවේය යන විශාල බලාපොරොත්තුවක් අප වෙත තිබුණ. ඒ විශ්වාසය අනුව කටයුතු කරමින් අප මණ්ඩලය අඩපණ වී ගිය සුළු හා මධ්‍ය පරිමාණයේ කම්හල් දහයක් තෝරාගෙන ඒවා සංවර්ධනය කරන්නට සහය දැක්වූවා. පසුගිය වසර දෙක තුළ අපනයන ඉල්ලුමට සරිලන පරිදි භාණ්ඩ නිෂ්පාදනය සඳහා එම කම්හල් යළිත් සූදානම් කරන්නට අපනයන සංවර්ධන මණ්ඩලය කටයුතු කළා. දැන් ඔවුන් ජී.එස්.පී.+ අභියෝගයට මුහුණ දෙන්න සූදානම් ලබන සැප්තැම්බර් මාසයේදී පැරිසියේ පැවැත්වෙන අන්තර්ජාතික සොයිං ෆෙයාර් ඇඟළුම් ප්‍රදර්ශනය සඳහා මණ්ඩලය මගින් මේ කම්හල් 10 ඉදිරිපත් කරනවා. අන්තර්ජාතික වෙළෙඳපොළට පිවිසෙන්නට එය ඔවුන්ට මහඟු අවස්ථාවක් වනු ඇති.

ජී.එස්.පී. + සහනය ලැබීමත් සමඟ අපනයන ක්ෂේත්‍රයෙහි ආදායම කොතරම් ඉහළ යනු ඇතැයි අපේක්ෂා කරනවා ද?

2009 දී අවසාන වශයෙන් ඇඟළුම් අපනයනයෙහි වර්ධනය 16.5% ක් තිබුණා. 2010 දී ජී.එස්.පී. + සහනය අහිමි වීමත් සමඟ එම අගය 7‍.4% දක්වා අඩු වුණා. එහෙත් යුරෝපා වෙළෙඳ පොළ වෙත අපේ ඇඟළුම් නිෂ්පාදන 30% ක් අලෙවි කළා.

ජී.එස්.පී. + සහනය ලැබුණු පසු මත්ස්‍ය නිෂ්පාදන අපනයන ආදායම පමණක් 15 – 16% දක්වා වර්ධනයක් පෙන්වනු ඇතැයි අපේක්ෂා කරනවා‍.

2017 ජූනි සිට දෙසැම්බර් මාසය අතර කාලය තුළ ජී.එස්.පී. සහනය ලැබී‍මත් සමඟ ඇමෙරිකා ඩොලර් මිලියන 300 ක අපනයන ආදායමක් ලැබෙනු ඇතැයි අපේක්ෂිතයි. 2018 වසරේදී නිමි ඇඳුම් සඳහා පමණක් යුරෝපා වෙළෙඳපොළ ඇණැවුම් යළි ලැබුණු විට ඇමෙරිකා ඩොලර් මිලියන 500 - 600 අතර වර්ධනයක් වෙතැයි ගණන් බලා තිබෙනවා. (silumina)

ඉදිරි කාලයේ ශ්‍රී ලංකාවේ සංවර්ධන ව්‍යාපෘතිවල මුදල් ආයෝජනයෙන් තම රටට අපේක්ෂිත ආර්ථික ප්‍රතිලාභ ලැබේද යන්න ගැන පූර්ණ අධ්‍යයනයක් කිරීමට චීන රජයේ ඉහළ පෙළේනියෝජිත පිරිසක් මේ සතියේ දිවයිනට පැමිණෙති.

චීන රජයේ ණය ආධාර හා ආයෝජන ගැන මෙබඳු විමර්ශනයකට එරට ඉහළ පෙළේ නියෝජිත පිරිසක් ශ්‍රී ලංකාවට පැමිණෙන්නේ මුල්වරටය. මහ බැංකුව සිය වාර්තාව මගින් ප්‍රකාශ කර තිබෙන දත්ත අනුව ශ්‍රී ලංකාවේ ආයෝජනය කිරීමේ අවදානමක් තිබේද යන්න ඔවුන්ගේ පුළුල් විමර්ශනයට ලක්වන බව තානාපති අංශ ආරංචි මාර්ග කියයි.

අනතුරුව මෙම නියෝජිත පිරිස අධ්‍යයනය කරනු ලබන්නේ චීනයෙන් ශ්‍රී ලංකාවට මෙතෙක් ලබාදී තිබෙන ණය ප්‍රමාණය නියමිත කාලවකවානුවල පියවීමට ආර්ථික ශක්තිය තිබේද කියාය. ඉදිරි කාලයේ චීනය විසින් මෙරට සිදුකිරීමට යෝජිත ව්‍යාපෘතිවල ප්‍රයෝජනවත් බව ඒවා ගැන ශ්‍රී ලාංකික සමාජයේ හටගෙන තිබෙන මත ගැටුම් ගැනද චීන නියෝජිතයන් ගැඹුරින් අධ්‍යයනය කරනු ඇති බවත් වැඩිදුරටත් දැනගන්නට ඇත. (deshaya)

කොළඹ කොටස් වෙළඳපොළේ මිල දර්ශක ඊයේ පහත වැටීමක් පෙන්නුම් කළේ සති 9කින් ප්‍රථම අපගමනය සටහන් කරමින්.

සමස්ත දර්ශකය ඊයේ දිනය අවසන දී 6697ක් ලෙස සටහන් වූ අතර, මුළු පිරිවැටුම රුපියල් මිලියන 237ක්. (hirunews)

මේ වසරේ (2017) මුල් මාස දෙකේදී (ජනවාරි සහ පෙබරවාරි) ශ්‍රී ලංකාවේ අපනයන ආදායම සියයට 3.2 කින් පහත වැටී තිබේ.

මේ අනුව ගිය වසරේ (2016) ජනවාරි සහ පෙබරවාරි මාස දෙකේදී ඇමෙරිකානු ඩොලර් මිලියන 1790.2 ක්‌වූ අපනයන ආදායම මේ වසරේ (2017) ජනවාරි සහ පෙබරවාරි මාස දෙකේදී ඇමෙරිකානු ඩොලර් මිලියන 1732.5 ක්‌ දක්‌වා පහත වැටී තිබේ.

මේ අතර මේ කාලය තුළ ආනයන වියදම ඇමෙරිකානු ඩොලර් මිලියන 3028.4 සිට ඇමෙරිකානු ඩොලර් මිලියන 3409.6 ක්‌ දක්‌වා සියයට 12.6 කින් වර්ධනය වී තිබේ. මේ නිසාම මේ වසරේ (2017) මුල් මාස දෙකේ වෙළෙඳ හිඟය (අපනයන ආදායම සහ ආනයන වියදම අතර පරතරය) ඇමෙරිකානු ඩොලර් මිලියන 1677 ක්‌ දක්‌වා සියයට 35.4 කින් ඉහළ ගොස්‌ තිබේ.

ශ්‍රීලංකා මහ බැංකුව නිකුත් කළ නවතම වාර්තාවක මේ බව දැක්‌වේ.

ශ්‍යාම් නුවන් ගනේවත්ත (divaina)

මෙරටට ආයෝජන ගලා එම ඉහල නැංවීම සදහා වු නව ප්‍රතිසංස්කරණයන් ක්‍රියාත්මක කිරිම සදහා නව ලේකම් කාර්යාලයක් සංවර්ධන උපායමාර්ග හා ජාත්‍යන්තර වෙළද අමාත්‍යාංශය තුල ස්ථාපිත කිරිමට සූදානම් වනවා.

විවිධ රේඛීය අමාත්‍යාංශ සහ ආයතන අතර සම්බන්ධීකරණය හා සහයෝගිතාව පිළිබද ගැටළු නිරාකරණය කිරිම මෙහි අරමුණයි.

මෙම ලේකම් කාර්යාලය හරහා ආයෝජන සම්බන්ධයෙන් ශ්‍රී ලංකාවේ තරඟකාරීත්වය ඉහළ මට්ටමකට ගෙන ඒමට හැකි වනු ඇති. (hirunews)

මැදපෙරදිග කලාපයේ පවතින අහිතකර ආර්ථික සහ දේශපාලනික තත්ත්වයන් නිසා විදේශ සේවා නියුක්තිකයන්ගේ ප්‍රේෂණ ඉදිරියටත් අඩු වර්ධනයක් පෙන්නුම් කරනු ඇතැයි මහබැංකුව ප්‍රකාශ කරනවා.

එය අවසන් වරට ගණනය කළ පෙබරවාරි මාසයේදී ඇමරිකානු ඩොලර් මිලියන 568 යි දශම 7 ක් ලෙස දැක්වුණා.

එම අගය පෙර වසරට සාපේක්ෂව සියයට 2 යි දශම 6 ක සුළු වර්ධනයක් පමණයි. (hirunews)

ගිය වසරේ (2016) දී විදේශ ව්‍යවහාර මුදල්වලට සාපේක්‌ෂව ශ්‍රී ලංකා රුපියලේ අගය පිරිහීම නිසා සමස්‌ත රාජ්‍ය ණය ප්‍රමාණය රු. කෝටි 18660 කින් ඉහළ ගොස්‌ ඇතැයි මහ බැංකුව කියයි.

ගිය වසරේදී ඇමෙරිකානු ඩොලරයට සාපේක්‌ෂව ශ්‍රී ලංකා රුපියල සියයට 3.8 කින්ද, ජපන් යෙන් මුදලට සාපේක්‌ෂව ශ්‍රී ලංකා රුපියල සියයට 0.7 කින්ද, ඉන්දීය රුපියලට සාපේක්‌ෂව ශ්‍රී ලංකා රුපියල සියයට 1.7 කින්ද, යුරෝ මුදලට සාපේක්‌ෂව ශ්‍රී ලංකා රුපියල සියයට 0.3 කින් සහ වි. ගැ. හි වලට සාපේක්‌ෂව ශ්‍රී ලංකා රුපියල සියයට 0.9 කින්ද ගිය වසරේ (2016) දී පිරිහීමට ලක්‌ වීම නිසා මෙසේ රාජ්‍ය ණය ප්‍රමාණය විශාල වශයෙන් ඉහළ ගොස්‌ තිබේ.

මේ රුපියලේ පිරිහීම නිසා විදේශ ණය ප්‍රමාණය රු. කෝටි 16170 කින් සහ විදේශ ව්‍යවහාර මුදලින් වටිනාකම තක්‌සේරු කළ දේශීය ණය ප්‍රමාණය රු. කෝටි 2490 කින්ද ඉහළ ගොස්‌ ඇතැයි පසුගියදා නිකුත් වූ නවතම මහ බැංකු වාර්තාවේ සඳහන් වේ.

(දිවයින)

ශ්‍රී ලාංකීය නිෂ්පාදන සඳහා භූගෝලීය දර්ශක හඳුන්වා දීම සම්බන්ධයෙන් වන සංවාදයක් ඇති කරලීම සඳහා ප්‍රාථමික කර්මාන්ත අමාත්‍යංශයට අවශ්‍ය තාක්ෂණික සහාය ලබා දීමට එක්සත් ජාතීන්ගේ ආහාර සහ කෘෂිකර්ම සංවිධානය ඉදිරිපත් වී තිබෙනවා.

එම සංවිධානයේ ව්‍යාපෘති සම්බන්ධීකාරක ස්ටෙෆාන් පසේරි, ප්‍රාථමික කර්මාන්ත අමාත්‍යංශයේදී ඇමති දයා ගමගේ සහ අපනයන කෘෂිකර්ම දෙපාර්තමේන්තුවේ නිලධාරීන් සමඟ ඒ පිළිබඳව සාකච්ඡා පැවැත්වීය.

කෘෂි නිෂ්පාදනය අපනයන ක්ෂේත්‍රයේ නියැලී සිටින පෞද්ගලික අංශයේ පරදු දරන්නන් සහ නිලධාරීන්ගේ සහභාගීත්වයෙන් සිදු කෙරෙන මෙම සංවාදයේ අරමුණ වන්නේ භූගෝලීය දර්ශක සහිත ශ්‍රී ලාංකීය නිෂ්පාදන සඳහා දේශීයව හා විදේශීයව වෙළෙඳපොලක් ලබා ගැනීමයි.

තෝරාගත් ශ්‍රී ලාංකීය නිෂ්පාදනවලට භූගෝලීය දර්ශක සඳහා ලියාපදිංචිය, ආරක්ෂාව සහ අදාළ කටයුත්ත සඳහා මාර්ග සිතියමක් සැකසීම හා සම්පත් යෙදවීම පිළිබඳව එම සංවාදයේදී සාකච්ඡා කෙරෙනු ඇත. (hirunews)

ජනලේඛන හා සංඛ්‍යාලේඛන දෙපාර්තමේන්තුව විසින් ගණනය කරනු ලබන ජාතික පාරිභෝගික මිල දර්ශකයේ විචලනය මගින් මනිනු ලබන උද්ධමනය, ලක්ෂ්‍යමය පදනම මත 2017 මාර්තු මාසයේ දී වාර්තා කළ සියයට 8.6 හිසිට 2017 අප්‍රේල් මාසයේ දී සියයට 8.4 දක්වා පහළ ගියේය. 2017 අප්‍රේල් මස ලක්ෂ්‍යමය උද්ධමනය කෙරෙහි ආහාර කාණ්ඩය මෙන්ම ආහාර නොවන කාණ්ඩය ද දායක විය.

වාර්ෂික සාමාන්‍ය පදනම මත මනිනු ලබන ජාතික පාරිභෝගික මිල දර්ශකයෙහි වෙනස 2017 මාර්තු මාසයේ දී වාර්තා වූ සියයට 5.6 හි සිට 2017 අප්‍රේල් මාසයේ දී සියයට 6.0 දක්වා ඉහළ ගියේය.

මාසික වෙනස්වීම සැලකූ විට, ජාතික පාරිභෝගික මිල දර්ශකය 2017 මාර්තු මාසයේ වාර්තා වූ දර්ශක 119.5 සිට 2017 අප්‍රේල් මාසයේ දී දර්ශක අංක 121.0 දක්වා ඉහළ ගියේය.

ආහාර කාණ්ඩයට අයත් අයිතමයන් හි මිල ගණන් තුළ එළවළු, පොල්, කෙසෙල්, මාළු, අර්තාපල්, රතු ළූණු සහ කුකුල් මස් මිල ගණන් මාසය තුළ දී ඉහළ ගියේය. ආහාර නොවන කාණ්ඩය තුළ, රෙදිපිළි හා පාවහන්, ගෘහ භාණ්ඩ, ගෘහ උපකරණ හා ගෘහ ඒකක නඩත්තු කටයුතු, ප්‍රවාහන, ආපනශාලා සහ හෝටල්, විවිධ භාණ්ඩ හා සේවා උපකාණ්ඩයෙහි ඇතුළත් ඇතැම් අයිතමවල මිල ගණන් ද 2017 අප්‍රේල් මාසය තුළ දී ඉහළ ගියේය. මේ අතර නිවාස, ජලය, විදුලිය, ගෑස් හා අනෙකුත් ඉන්ධන, සෞඛ්‍ය, සන්නිවේදන, විනෝදාත්මක හා සංස්කෘතික සහ අධ්‍යාපන උපකාණ්ඩයෙහි මිල ගණන් මාසය තුළ දී නොවනස්ව පැවතිණි.

ආර්ථිකයෙහි යටිදැරි උද්ධමනය නිරූපණය කරන ජාතික පාරිභෝගික මිල දර්ශකයෙහි මූලික උද්ධමනය, ලක්ෂ්‍යමය පදනම මත 2017 මාර්තු මාසයේ දී පැවති සියයට 7.0 හි සිට 2017 අප්‍රේල් මාසයේ දී සියයට 5.9 දක්වා සැලකිය යුතු ලෙස පහළ ගියේය. මෙම පහළ යෑමට සාපේක්ෂව අඩු මාසික වෙනස්වීම සහ පදනමෙහි බලපෑම හේතු විය. වාර්ෂික සාමාන්‍ය මූලික උද්ධමනය 2017 අප්‍රේල් මාසයේ දී සියයට 6.6 හි නොවනසන් පැවතිණි.

Inflation-2017-05-23-11-47-30

(adaderana)

Business News

Stats

There are 28593 listings, 863 categories and 102 owners in our website