Latest News

ශ්‍රී ලංකා නිදහස් පක්ෂය ඇතහැර නව අගමැති මහින්ද රාජපක්ෂ ඇතුළු නව කැබිනට් මණ්ඩලයේ ඇමතිවරුන් ඇතුළු මන්ත්‍රීවරු 50කට ආසන්න කන්ඩායමක් පොදුජන පෙරමුණේ සමාජිකත්වය ලබාගන්නා ලදි.

හිටපු ශ්‍රීලනිප මහලේකම් අනුර ප්‍රියදර්ශන යාපා ද පොදුජන පෙරමුණේ සාමාජිකත්වය ලබාගෙන ඇත.

නාමල් රාජපක්ෂ මන්ත්‍රීවරයා මීට පෙර ප්‍රකාශ කළේ නැවත කිසිදාක ශ්‍රී ලංකා නිදහස් පක්ෂයෙන් නැවත ඡන්දය නොඉලන්න බවයි.

නාමල් රාජපක්ෂ මහතා ගුවන් විදුලි නාලාකාවකට ප්‍රකාශයක් දෙමින් තමා ශ්‍රී ලංකා නිදහස් පක්ෂයෙන් ඉල්ලා අස්වන බවත්, නැවත එම පක්ෂයෙන් තරඟ නොකරන බවත් ප්‍රකාශ කර ඇත.

ඔහු තවදුරටත් පවසා පොදු ජන පෙරමුණේ සාමාජිකත්වය ලබාගන්නා බවත්, ඉදිරි මැතිවරණ පුළුල් පෙරමුණකින් තරඟ කිරීමට බලාපොරොත්තු වන බවත් ප්‍රකාශ කරන ලදි.

යලිත් කිසිදිනෙක තමා ශ්‍රී ලංකා නිදහස් පක්ෂයෙන් තරඟ නොකරන බවද ප්‍රකාශ කරන ලදි.

රටේ ප්‍රජාතන්ත්‍රවාදය හා ජනතාවගේ අයිතිවාසිකම් ආරක්ෂා කිරීමට බල කරමින්  කම්කරු හා විදේශ රැකියා නියෝජ්‍ය අමාත්‍යධූරයෙන් ඉල්ලා අස්වූ මනුෂ නානායක්කාර මහතා සම්බන්ධයෙන් සාවද්‍ය හා අපහාත්මක ප්‍රකාශ කිරීමට විරෝධය දක්වමින් ඩිලාන් පෙරේරා හා අරුන්දික ප්‍රනාන්දු යන මන්ත්‍රීවරුන් දෙදෙනාගෙන් රුපියල් මිලියන දහසක වන්දියක් ඉල්ලමින් එන්තරවාසියක් යවා ඇත.

හිටපු නියෝජ්‍ය ඇමැතිවරයා වෙනුවෙන් කොන්ටිනෙන්ටල් ලෝ ඇසෝසියේටිස් නීතීඥ ආයතනය මෙම එන්තරවාසි දෙක යොමු කර ඇති අතර එක් අයෙක්ගෙන් රුපියල් මිලියන පන්සියය බැගින් වන වන්දියක් ඉල්ලා තිබේ.

නිදහසේ මාධ්‍ය කේන්ද්‍රෙය්දී ඩිලාන් පෙරේරා මන්ත්‍රීවරයා ප්‍රවෘත්ති සාකච්ඡාවක් කැදවමින් හිටපු නියෝජ්‍ය ඇමැතිවරයා විදේශ ගතවීම සම්බනන්ධයෙන් ද්වේශසහගතව හා කීර්තිනාමයට හානියක් වන ආකාරයට ප්‍රකාශ නිකුත් කර තිබූ බව එම  එන්තරවාසියේ දැක්වේ. ඩිලාන් පෙරේරා මන්ත්‍රීවරයා ප්‍රවෘත්ති සාකච්ඡාවේදී ඉදිරිපත් කළ සියලුම කරුණු සාවද්‍ය බවත් එම චෝදනා සම්පූර්ණයෙන්ම ප්‍රතිකෂේප කරන බවත් එහි සදහන් වේ.

අරුන්දික ප්‍රනාන්දු මන්ත්‍රීවරයාද ජනාධිපති ලේකම් කාර්යාලයේදී පැවති සාකච්ඡාවකදී හිටපු නියෝජ්‍ය ඇමැතිවරයාගේ දේශපාලන ජීවිතයට දැඩි ලෙස හානි වන ආකාරයේ අසත්‍ය ප්‍රකාශයක් නිකුත් කර තිබෙන  බවද එය ජනමාධ්‍යයේ ප්‍රචාරය වී තිබෙන බවද එන්තරවාසියේ දැක්වේ. මෙම අසත්‍ය හා ද්වේශසහගත ප්‍රකාශ තරයේ ප්‍රතික්ෂේප කරන බවද එහි සදහන් වේ.

දින දහ හතරක කාලයක් තුළදී මෙම වන්දි මුදල ලබාදීමට කටයුතු කළ යුතු බවත් එහ පැහැර හරින්නේ නම් අධිකරණයේ නඩු පැවරීමට සිදුවන බවත් මනුෂ නානායක්කාර මහතා වෙනුවෙන් පෙනී සිටින නීතීඥ සමාගම ඩිලාන් පෙරේරා හා අරුන්දික ප්‍රනාන්දු යන මහත්වරුන්ට දැනුම්දී ඇත.

''සෞඛ්‍ය අමාත්‍යාංශයේ සම්පුර්ණ ස්වාධීන විගණනයක් සිදුකර ඉන් පසු වැඩ ආරම්භ කරමු'' යැයි සෞඛ්‍ය පෝෂණ හා දේශීය වෛද්‍ය අමාත්‍ය චමල් රාජපක්‍ෂ මහතා සෞඛ්‍ය අමාත්‍යංශයේ වැඩ භාරගැනීමෙන් පසු පැමිණි සිටි පිරිස අමතමින් එසේ පැවසීය. 

මේ ස්ථානයට මම අවේ ජනතා සේවකයෙක් හැටියට. අපි ඔබ සැම දනොම ජනතාවගේ සේවකයෝ. ජනතාව අපෙන් විශාල සේවයක් බලාපොරොත්තුවෙනවා. හිටපු අමාත්‍යතුමා සෞඛ්‍ය අමාත්‍යාංශය පිළිබදව විශේෂ ප්‍රකාශයකුත් කළා. නව ලේකම්තුමියත් මෙම සෞඛ්‍ය ක්‍ෂේත්‍රය පිළිබදව මනා දැනුමක්,අවබෝධයක් ඇති නිළධාරිණියක්. කාගේවත් කේලාම් හා ඕපාදුප අහන්නේ නැතිව යතාර්ථවාදීව අපිට ඉදිරියට වැඩ කරන්න පුල්වන් වෙයි කියලා අපි විශ්වාස කරනවා.මම ලේකම්තුමියගෙන් ඉල්ලා සිටිනවා, අපි අමාත්‍යාංශයේ සම්පුර්ණ ස්වාධීන විගණනයක් කරමු කියන එක. ඉන් පසුව අපි වැඩ ආරම්භ කරමු යැයි අමාත්‍යවරයා පැවසීය.

ට්‍රාන්ස්පේරන්සි ඉන්ටනැෂනල් ශ්‍රී ලංකා ආයතනය විසින් සංවිධානය කරනු ලද මෙරට අවංක රාජ්‍ය නිලධාරීන් අභිෂේක ගන්වන ඉන්ටෙග්‍රිටි අයිඩල් 2018 සම්මානයට, අනුරාධපුර දිස්ත්‍රික්කයේ තඹුත්තේගම කොට්ඨාශ අධ්‍යාපන අධ්‍යක්ෂ කරුණාරත්න බණ්ඩාර මහතා ජනතා ඡන්දයෙන් නොබෝදා තෝරා පත්කර ගන්න ලදී. ගුරුවරයෙකු, විදුහල්පතිවරයෙකු හා අධ්‍යාපන පරිපාලකයකු ලෙස ඔහු රටට හා අධ්‍යාපන ක්ෂේත්‍රයට සිදු කරන ලද සේවය අගයමින් මෙම සම්මානය පුද කරන ලදී. 

2016 වසරේදී කරුණාරත්න බණ්ඩාර මහතා විදුහල්පතිවරයෙකු වශයෙන් කටයුතු කළ සමයේ උතුරු මැද පළාතේ ප්‍රධාන අමාත්‍යවරයා විසින් පාසැල් උත්සවයක් සංවිධානය කරන ලෙස ඉල්ලීමක් කර තිබුණි. එම උත්සවයට පාසැල් සිසුවන්ගේ දෙමාපියන් සම්බන්ද නොකිරීම හේතු කොට ගෙන උරණවූ දේශපාලන අධිකාරිය, බණ්ඩාර මහතාට වහාම ක්‍රියාත්මක වන පරිදි ස්ථාන මාරුවක් ලබා දුන්නේය. එසේවුවද තමා අධ්‍යාපන දෙපාර්තමේන්තු රෙගුලාසි වලට යටත්ව ක්‍රියා කළ බැවින්, රාජ්‍ය සේවකයින්ට ආදර්ශයක් සපයමින් බණ්ඩාර මහතා දේශපාලන අධිකාරියට එරෙහිව ශ්‍රේෂ්ඨාධිකරණය ඉදිරියේ මුලික අයිතිවාසිකම් නඩුවක් පවරා ජයග්‍රහණය කරන ලදී. 

නොවැම්බර් 3 වන දින පැවති සම්මාන උළෙලේදී, මහනුවර මහා නගර සභාවේ පරිපාලන නිලධාරිනියක් වන ඉනෝකා කුලතුංග මිය, මහනුවර ශීක්ෂණ රෝහලේ ජ්‍යෙෂ්ඨ හෙද නිලධාරිනියක් වන කමනි අසෝකා ද සිල්වා මිය, වනජීවී සංරක්ෂණ දෙපාර්තමේන්තුවේ (බස්නාහිර පළාත) සහකාර අධ්‍යක්ෂයකවරයෙක් වන උපුල් ඉන්ද්‍රජිත් මහතා හා මහරගම පිලිකා රෝහලේ අභිනව අධ්‍යක්ෂක වෛද්‍ය වසන්ත දිසානායක මහතාද සම්මානයට පාත්‍ර වුනි. 

සම්මාන උළෙලේ ප්‍රධාන ආරාධිත අමුත්තිය ලෙස දේශමාන්‍ය ආචාර්ය රධිකා කුමාරස්වාමි මහත්මිය සහභාගී වුනි. අවසන් අපේක්ෂකයින් පස් දෙනාගේ වෘත්තිමය කැපවීම ඇගැයු ඇය, මෙසේ සඳහන් කළේය - "මොවුන් සියලු දෙනා සැඩපහරට විරුද්ධව උඩුගම් බලා ගමන් කරන්නන් වේ. දුෂ්කර පරිසරයක සේවය කරන මොවුන් රාජ්‍ය සේවයට ක්ෂේමභුමීන් බවට පත්ව ඇත." 

සම්භාවනීය අමුත්තන් ඇමතු කරුණාරත්න බණ්ඩාර මහතා, තමන්ට මුලින්ම අවංකත්වයේ මංසලකුණු කියාදුන් තම දෙමාපියන් සිහි කල අතර රාජ්‍ය සේවයට බැඳීමත් සමඟම අවංකභාවයේ වැදගත්කම පිළිඹිඹු කළ රාජ්‍ය සේවකයින්ටද තම ස්තුතිය පුද කළේය. එමෙන්ම තවදුරටත් රාජ්‍ය සේවයට කැපවීම සඳහා තමාට ධෛර්යය ලබාදෙන ආදරණීය බිරිඳ හා දරුවන්ටද බණ්ඩාර මහතා සිය ස්තුතිය පුද කළේය. 

Accountability Lab ආයතනය විසින් ලෝකයට හඳුන්වාදුන් ඉන්ටෙග්‍රිටි අයිඩල් සම්මාන උළෙල මුල්වරට 2014 වසරේ නේපාලයේ පවත්වන ලදී. එතැන් සිට වාර්ෂිකව දකුණු අප්‍රිකාව, නයිජීරියාව හා පාකිස්ථානය ඇතුළු රටවල් කිහිපයක අවංක රාජ්‍ය සේවකයින් අභිෂේක ගන්වා ඇත. 

Friday, 09 November 2018 13:23

ජපන් යන්න වරම්

ජපානයේ සංක්‍රමණික නීති ලිහිල් කෙරෙන කෙටුම්පතක් එරට කැබිනට් මණ්ඩලය විසින් අනුමත කරනු තිබේ.

විදෙස් මාධ්‍ය වාර්තා කර ඇත්තේ, මෙම නව නීතියට අනුව නව වීසා කාණ්ඩ දෙකක් යටතේ විදේශිකයින්ට කම්කරු රැකියා සඳහා ජපානයට ඇතුළු වීමට අවස්ථාව හිමිවනු ඇති බවයි.

කෙසේ වෙතත් මෙම නව නීතිය ක්‍රියාත්මක වීමට නම් අදාළ නීති කෙටුම්පත ජපාන පාර්ලිමේන්තුව තුළ සම්මත විය යුතු ය.

ජපානය සංක්‍රමණික නීති ඉතා දැඩි රටක් වන අතර රැකියා සඳහා එරටට ඇතුළුවිය හැකි විදෙස් ශ්‍රමික සංඛ්‍යාව සීමා සහිත වේ.

එහෙත් නව නීතිය යටතේ ඉදිකිරීම්, ගොවිතැන් සහ සෞඛ්‍ය යන අංශ සඳහා විදෙස් ශ්‍රමිකයින්ට ජපානයට ඇතුළු වීමේ නව දොරටු විවෘත වනු ඇති.

අදාළ නීතියට අනුව පළමු වීසා කාණ්ඩය යටතේ සිය පවුලේ සාමාජිකයින් ද සමග විදෙස් ශ්‍රමිකයෙකුට අවුරුදු 5ක් ජපානයේ සේවය කිරීමට වීසා හිමුවනු ඇති.

ඉහළ මට්ටමේ කුසලතා සහිත සේවකයින් දෙවන වීසා කාණ්ඩයට සුදුසුකම් ලබන අතර අවසනයේ ඔවුන්ට එරට පුරවැසිභාවය ලබා ගැනීම සඳහා ද අයදුම් කිරීමට ද හැකි වීම විශේෂත්වයකි.

කෙසේ වෙතත් කැබින්ට් මණ්ඩලයේ සම්මත වූ මෙම නව නීතිය එරට විරුද්ධ පක්ෂවල විවේචනයට ලක්ව ඇත.

ඔවුන් පවසන්නේ, නව නීතිය සම්මත වුවහොත් එය එරට වැටුප් සහ අපරාධ අනුපාතයට බලපෑමක් සිදුවනු ඇති බවයි.

එහෙත් ජපාන අග්‍රාමාත්‍ය ෂින් ෂෝ අබේ අවධාරණය කළේ, යෝජිත නීති කෙටුම්පත රටේ සංක්‍රමණික ප්‍රතිපත්තිය ඉක්මවා නොයන්නක් බවයි.

මේ යටතේ දැඩි කම්කරු හිඟතාවයට කඩිනමින් පිළියම් යෙදිය හැකි විශේෂ කුසලතා සහිත විදෙස් ශ්‍රමිකයින් පමණක් ජපානය විසින් පිළිගනු ඇති බව ජපාන අග්‍රාමාත්‍ය ෂින් ෂෝ අබේ වැඩිදුරටත් පවසී ය.

(නිව්ස් ෆස්ට්)

තමන් ඛනිජ තෙල් සම්පත් සංවර්ධන අමාත්‍යාංශයට ඉකුත් 28 වැනි දා ගිය අවස්ථාවේ ඇතිවූ සිද්ධියට වගකිව යුතු කිසිවෙක් මෙතෙක් අත්අඩංගුවට ගෙන නොමැති බව හිටපු ඛනිජ තෙල් සම්පත් සංවර්ධන අමාත්‍ය අර්ජුන රණතුංග මහතා පැවසීය.

එදින ඇතිවූ සිද්ධියේදී තමා හෝ තමන්ගේ ආරක්‍ෂකයින් ගැටුමක් ඇතිකර නොගත් බවත්, ගැටුමක් ඇතිකලේ නාගරික මන්ත‍්‍රීවරයෙක් ඇතුළු තෙල් සංස්ථා භූමියට පිටතින් පැමිණි පිරිසක් බවත් සිද්ධිය දැක්වෙන සී.සී.ටී.වී කැමරා දර්ශන පරීක්‍ෂා කිරීමේදී හොඳින් පැහැදිලි වන බව ද හිටපු ඇමැතිවරයා සදහන් කළේය.

තමන් අද ජීවත්ව සිටින්නේ තමන්ගේ ආරක්‍ෂක නිලධාරියා නිසා බව කී ඇමතිවරයා තමා නිදහසේ සිටියදී ඔහු සිරගතව සිටීම ගැන මෙන්ම සිද්ධියට වගකිව යුතු කිසිවෙක් සම්බන්ධයෙන් නීතිය ක‍්‍රියාත්මක නොවීම ගැන කණගාටු වන බව ද කීවේය.

 මෙම සී.සී.ටී.වී කැමරා දර්ශන මාධ්‍ය වෙත මුදාහැරීමට තමන් තීරණය කළේ ඉන්පසු හෝ තමාට සාධාරණයක් වනු ඇතැයි යන අපේක්‍ෂාවෙන් බව ද හිටපු ඇමතිවරයා පැවසුවේ කොළඹ දී පැවති මාධ්‍ය හමුවක් අමතමිනි.

(ලංකාදීප)

නව ජනාධිපති කාර්ය මණ්ඩල ප්‍රධානී ලෙස එච්.එම්.පී. හිටිසේකර මහතා පත්කර ඇත.

ඒ මහතා ජනාධිපති කාර්යාලයේ දී ජනාධිපති මෛත්‍රීපාල සිරිසේන මහතා අතින් සිය පත්වීම් ලිපිය ලබා ගත් අතර, ඔහු ජනාධිපතිවරයාගේ හතර වන කාර්ය මණ්ඩල ප්‍රධානියාද වේ.

දේශපාලන පක්‍ෂ බිහි කරන විට අපි සලකා බැලිය යුත්තේ සැමටම එකතු විය හැකි පක්‍ෂයක් ලෙස එම පක්‍ෂය තිබෙනවාද යන්නයි. නමුත් අද රටේ උතුරේ හෝ දකුණේ තිබෙන්නේ ජාතිවාදයෙන් බිහිවුණු පක්‍ෂයි. ඒ අනුව මුස්ලිම් කොංග‍්‍රසය, ද්‍රවිඩ සංවිධානය, කඳුරට ද්‍රවිඩ පෙරමුණ මේ ආදී වශයෙන් ගෝත‍්‍රික ගති ලක්‍ෂණ සහිත ජාතියට, ආගමට අනුව බිහි වූණු පක්‍ෂ රටේ බහුතරයක් තිබෙනවා.

අද රටේ යම් අස්ථාවර, අවිනිශ්චිත තත්ත්වයක් උද්ගත වී ඇති බව ඔබ අප හැම දෙනාටම බැලූ බැල්මට පෙනෙන්නට තිබෙනවා. නමුත් මේ අස්ථාවර තත්ත්වය තුළ මට නම් හිතෙන්නේ ස්ථාවර රජයක් බිහි වෙනවා කියායි. පසුගිය කාලය පුරාම රටේ පැවතුණේ අවිචාරමත් වැඩ පිළිවෙලක්. එම වැඩපිළිවෙල මුලූ මහත් රටේ ජනතාවම පිලිකුල් කළා. ඒ නිසා දේශපේ‍්‍රමීත්වය, ජාති හිතෛශීවන්ත බව මතු කර පෙන්වන ජනතාවාදි නායකත්ත්වයක් අද රටට අවශ්‍ය වී තිබෙනවා. එම නායකත්ත්ව දෙපල අද රටේ බිහි වී තිබෙනවා. එය රටේ ජනතාවගේ අති මහත් බලාපොරොත්තු සහිත වූ නව ගමනක ආරම්භය ලෙසයි මා සිතන්නේ. එම නායක දෙපලම පුළුල් අත්දැකීම් සහිත, දර්ශනයක් ඇති නායකයින් දෙපලක් ලෙස හැඳින්විය හැකියි.

උතුරු පළාත් ආණ්ඩුකාර රෙජිනොලඩ් කුරේ මහතා පසුගියදා කොලඹ ශ‍්‍රී ලංකා පදනම් ආයතනයේදී පැවැති උත්සවයකදීය.

ආක්‍රමණශීලී දළඹු විශේෂයක් වන “සේනා” නැමති දළඹු විශේෂය මේ වන විට අම්පාර ඇතුළු දිස්ත්‍රික්ක තුනකින් වාර්තා වී තිබේ.

සේනා දළඹුවා මුලින්ම හඳුනා ගෙන තිබෙන්නේ නයිජීරියාවෙන්, වන අතර මීට මාස තුනකට පමණ පෙර ඉන්දියාවෙන් වාර්තා වී ඇත. කෙසේ වුවද මේ වන විට අපේ රටේ දිස්ත්‍රික්ක තුනක බහුල වශයෙන් මෙම අගන්තුක ආක්‍රමණශීලී දළඹුවා වාර්තා වී තිබෙන බව කෘෂිකර්ම දෙපාර්තමේන්තුව අමාත්‍යාංශයේ පැවති ප්‍රගති සමාලෝචන රැස්වීමකදී ප්‍රකාශ කළේ ය.

නොසන්සිදෙන කුස ගින්නකින් පෙළෙන මෙම දළඹු විශේෂයට එක රැයක් තුළ අක්කර දහසක වගාවක් විනාශ කළ හැකි අතර එක් සතෙක්, එක් වරකට බිත්තර 200ක් දමනු ලබයි. එමෙන්ම මෙම දළඹුවාගෙන් හට ගන්නා සළඹයාට දිනකට කිලෝමීටර් 100ක දුරක් සුළං පාර ඔස්සේ පියඹා යෑමට හැකි නිසා එම සළඹයා මඟින් දළඹුවන් බෝ වීම සිඝ්‍රයෙන් සිදු වේ.

සේනා දළඹුවා කුඩා කාලයේ කොළ පැහැති වන අතර ඉන් පසු දුඹුරු පැහැයට හැරේ. සිරුර පුරාම ඉදිමුණු බිබිලි වැනි ලක්ෂණ ඇති අතර හිසෙහි යටිපැත්තේ සුදු පැහැයෙන් “‍ය්” අකුරට සමාන හැඩයකින් යුතු සලකුණක් ඇත.

එම නිසා වගාවන්ට හානි කරන ඉතාමත් දරුණු ගනයේ දළඹුවෙකු වන සේනා දළඹුවා වගාවන් අතර සිටින්නේ ද යන්න පිළිබඳ විමසිලිමත් වන ලෙස කෘෂිකර්ම අමාත්‍යාංශය ගොවීන්ගෙන් ඉල්ලා සිටී.

මෙම දළඹු විශේෂය මර්ධනය සඳහා අවශ්‍ය කෘමිනාශක යෙදීම මේ වන විට ආරම්භ කර ඇති අතර ඊට අවශ්‍ය මූල්‍ය ප්‍රතිපාදන වහාම ලබාදෙන ලෙස කෘෂිකර්ම අමාත්‍ය මහින්ද අමරවීර මහතා කෘෂිකර්ම අමාත්‍යාංශය නිලධාරීන් හට උපදෙස් දී ඇත.

Page 3 of 761

නවතම පුවත්

Stats

There are 28589 listings, 863 categories and 101 owners in our website