දෙමළ ප්‍රගතිශීලී සන්ධානය ජනාධිපතිවරයා මුණගැසී මහින්ද රාජපක්ෂ පාර්ශ්වයට සහාය නොදක්වන බව දන්වා සිටි බව එහි නායක පාර්ලිමේන්තු මන්ත්‍රී මනෝ ගනේෂන් මහතා පැවසීය.

විනයගත දේශපාලන බලවේගයක් හැටියට නව දේශපාලන වෙනස පිළිගත නොහැකි බවත් ආණ්ඩුවට එක්වන්නැයි ජනාධිපතිවරයා කළ ඇරියුම ප්‍රතික්ෂේප කළ බවත් ගනේෂන් මන්ත්‍රීවරයා කීය.

2015 වසරේදී පිහිටුවාගත් මෙම සන්ධානය ප්‍රජාතන්ත්‍රවාදී ජනතා පෙරමුණ, ජාතික කම්කරු පෙරමුණ සහ කඳුරට ජනතා පෙරමුණ යන පක්ෂවලින් සමන්විතය.

මනෝ ගනේෂන්, පලනි දිගම්බරන්, වී. රාධා ක්‍රිෂ්ණන්, වේලු කුමාර්, තිලකරාජ් සහ අරවින්ද කුමාර් දෙමළ ප්‍රගතිශීලී සන්ධානය නියෝජනය කරන පාර්ලිමේන්තු මන්ත්‍රීවරු වෙති.

(ලංකාදීප)

පේරාදෙණිය විශ්වවිද්‍යාලයේ ආචාර්යවරයකු වන ආචාර්ය චරිත හේරත් මහතා ජනමාධ්‍ය හා ඩිජිටල් යටිතල පහසුකම් රාජ්‍ය අමාත්‍යාංශයේ නව ලේකම්වරයා ලෙස පත් කර තිබේ.

අමාත්‍ය මණ්ඩලය විසින් මෙම පත් කිරීම සිදු කර තිබේ. ආචාර්ය චරිත හේරත් මහතා මීට පෙර ද ජනමාධ්‍ය අමාත්‍යාංශයේ ලේකම්වරයකු ලෙස කටයුතු කර තිබේ.

LIN

''කඩකප්පල් ක්‍රියා කරන්න එපා. රාජ්‍ය නිලධාරීන්ට මෙවැනි ලිපියක් යැවීමෙන් වැරදි පණිවුඩයක් යනවා. මෙවැනි දෙයින් රාජ්‍ය සේවකයින් පොළොඹවාලන්න බෑ. මේ ලිපිය ප්‍රතික්ෂේප කරනවා.'' සම කැබිනට් මාධ්‍ය ප්‍රකාශක අමාත්‍ය මහින්ද  සමරසිංහ මහතා පවසයි.

හිටපු රාජ්‍ය පරිපාලන අමාත්‍යවරයා විසින් රාජ්‍ය සේවකයින් වෙත නිකුත් කර ඇති ලිපිය සම්බන්ධයෙන් අඳහස්  දැක්වූ අමාත්‍යවරයා බව ප්‍රකාශ කළේ, රජයේ ප්‍රවෘත්ති දෙපාර්තමේන්තුවේ පැවැති කැබිනට් තීරණ දැනුම්  දීමේ මාධ්‍ය හමුවට එක්වෙමිනි.

අතිගරු ජනාධිපතිතුමා බත්තරමුල්ල ජන හමුවේ දී සමනලුන් පිළිබඳ සිදු කළ ප්‍රකාශය කිසි සේත්ම ලිංගික  ජනකොටසක් ඉලක්ක කරගෙන සිදු කළ ප්‍රකාශයක් නොවන බව, එහිදී වැඩිදුරටත් අදහස් දැක්වූ අමාත්‍යවරයා පැවැසීය.

මහින්ද රාජපක්ෂ මහතා අග්‍රාමාත්‍යවරයා ලෙස පත් කිරීම ව්‍යවස්ථා විරෝධි නැතැයි එක්සත් රාජධානියේ පාර්ලිමේන්තු මන්ත්‍රී නේස්බි සාමිවරයා පැවැසීය.

ශ්‍රී ලංකාවේ වත්මන් දේශපාලන තත්ත්වය සම්බන්ධයෙන් අදහස් දක්වමින් ඔහු ඒ බව ප්‍රකාශ කළේය.

මහින්ද රාජපක්ෂ මහතා අග්‍රාමාත්‍යවරයා ලෙස පත් කිරීම ව්‍යවස්ථා විරෝධි යැයි එම පාර්ලිමේන්තුවේම මන්ත්‍රීවරයකු වන සර් හියුගෝ ස්වයර් කරන ලද ප්‍රකාශය පිළිබඳව තමාගේ කිසිදු සතුටක් නැතැයි ද හෙතෙම කීය.

රටක තීන්දු තීරණ ව්‍යවස්ථාවට අනුකූල ද නැද්ද යන්න ප්‍රකාශ කිරීමට විදේශිකයන්ට අයිතියක් නැතැයි ද  කීවේය.

තවදුරටත් අදහස් දැක්වූ නේස්බි සාමිවරයා මෙසේ ද කීය.

       “ශ්‍රී ලංකාවේ සිදු වූ කිසිවක් ව්‍යවස්ථා විරෝධි යැයි මා දකින්නේ නැහැ. එහෙත් එය අසාමාන්‍යයි. අසාමාන්‍යය දේවල් වෙනවා. එක්සත් රාජධානියෙත් එවැනි දේවල් වෙලා තියෙනවා. අප සම්පූර්ණ පාර්ලිමේන්තු කාලය අවසන් නොකරපු අවස්ථා තියෙනවා. මෙවැනි දේවල් තියෙනවා. මෙවැනි දේවල් හරි සාමාන්‍යයි. මේ දේවල් වෙනස් වෙනවා.

මේ සිදුවීම් දාමයට සම්බන්ධ පුද්ගලයන්, විශේෂයෙන්ම ජනාධිපතිවරයා රටේ යහපත වෙනුවෙන් කටයුතු කරනු ඇතැයි මා විශ්වාස කරනවා. ශ්‍රී ලංකාවේ ජනාධිපතිවරයා තමයි එරට විධායකය. ඔහු ඡන්දයෙන් තේරී පත්වුණු කෙනෙක්. ඔහු රටේ යහපත වෙනුවෙන් කටයුතු කරනු ඇතැයි මට විශ්වාසයි. මා අවස්ථා කිහිපයකදීම ශ්‍රී ලංකාවේ ජනාධිපතිවරයා හමු වී තිබෙනවා. ඔහු බුද්ධිමත් පුද්ගලයෙක්.

මම ශ්‍රී ලංකාවේ ව්‍යවස්ථාව කියවා නැහැ. විවිධ නීතිඥයන් විවිධ අදහස් පළ කරනවා. එය ස්වභාවික දෙයක්. රටක සිදුවීම් ව්‍යවස්ථානුකූල ද නැද්ද කියන්න අයිතියක් විදේශිකයන්ට නැහැ. හිටපු කනිෂ්ඨ අමාත්‍යවරයා ශ්‍රී ලංකාවේ සිදුවීම් ව්‍යවස්ථානුකූල නැතැයි සඳහන් කරමින් ප්‍රශ්නයක් නැගුවා.

එය එක්සත් රාජධානියේ පාර්ලිමේන්තුවේ නීතිය නෙමෙයි. අපට අපේ ව්‍යවස්ථාවක් තිබෙනවා. මගේ පනස් වසරක සේවා කාලයේදී මම ඉතා පරෙස්සමෙන් තමයි කටයුතු කළේ. මම කිසිදු අවස්ථාවකදී එක් පාර්ශවකට සහාය දක්වා නැහැ. ව්‍යාපාර සිදු කර නැහැ. මගේ මිතුරන්ද එසේ කරනු ඇතැයි මම බලාපොරොත්තු වෙනවා”.

එක්සත් රාජධානියේ පාර්ලිමේන්තු මන්ත්‍රී සර් හියුගෝ ස්වයර් පසුගිය සතියේදී එරට පාර්ලිමේන්තුවේදී විදේශ ලේකම් (විදේශ අමාත්‍යවරයාට) ජෙරමි හන්ට්ට ප්‍රශ්නයක් යොමු කරමින් ජාත්‍යන්තර ප්‍රජාව රනිල් වික්‍රමසිංහ මහතා තවමත් ශ්‍රී ලංකාවේ නීත්‍යනුකූල අග්‍රාමාත්‍යවරයා ලෙස පිළිගන්නා බව ප්‍රකාශ කළේය. 

(lankadeepa)

පසුගිය සතියේ නව රජයේ නියෝජ්‍ය අමාත්‍යවරයකු ලෙස දිවුරුම් දුන් පාර්ලිමේන්තු මන්ත්‍රී මනුෂ නානායක්කාර මහතා ඉල්ලා අස්වීමේ ලිපිය ජනාධිපතිවරයා වෙත යැවූ බව වාර්තා වේ.

එම ඉල්ලා අස්වීමේ ලිපියේ සිංහල පරිවර්තනය හා ඉංග්‍රිසි ලිපිය පහත දැක්වේ

මනුෂ නානායක්කාර,

පනාගමුව,

වංචාවල,

ගාල්ල.

2018-11-06

අතිගරු ජනාධිපති මෛත්‍රීපාල සිරිසේන මැතිතුමා,

ජනාධිපති ලේකම් කාර්යාලය,

කොළඹ.

අතිගරු ජනාධිපතිතුමනි,

නියෝජ්‍ය අමාත්‍යධූරයෙන් ඉල්ලා අස්වීමයි

ඔබතුමන් විසින් ගරු මහින්ද රාජපක්ෂ මැතිතුමා අග්‍රාමාත්‍යධූරයට පත් කිරීමෙන් සහ පාර්ලිමේන්තුව කල් තැබීමෙන් පසුව රට තුළ උද්ගතවූ දේශපාලන අස්ථාවරත්වය පිළිබද කාරුණික අවධානය යොමු කිරීමට කැමැත්තෙමි. උද්ගතවූ තත්වය පිළිබද ඔබතුමන් සමග කළ සාකච්ඡා අනුව සහ ඔබතුමාගේ උපදෙස් මත කම්කරු හා විදේශ රැකියා නියෝජ්‍ය අමාත්‍යධූරය භාරගතිමි.

නමුත් ගරු කතානායකතුමා නිකුත් කළ නිවේදනය මගින් වඩාත් බැරෑරුම් කරුණු ඉස්මතු කර ඇති බව මාගේ විශ්වාසයයි. ගරු කතානායකතුමන්ගේ නිවේදනය අනුව පාර්ලිමේන්තුව කල් දැමීම, ව්‍යවස්ථානුකූල නොවන, නීත්‍යානුකූල නොවන සහ පාර්ලිමේන්තු සම්ප්‍රදායට ඉදුරාම පටහැනි ක්‍රියාදාමයකි. විශේෂයෙන්ම ගරු කතනායකතුමන්ගේ නිවේදනයේ පහත සදහන් කොටස් උපුටා දැක්වීමට කැමැත්තෙමි. “පාර්ලිමේන්තුවේ ඇති කළ වෙනස්වීම් සියල්ල ව්‍යවස්ථා විරෝධී සහ සාම්ප්‍රදාය විරෝධීව සිදුකර ඇති බව බහුතරයේ අදහස වන බැවින් මෙම වෙනස්වීම්වලට පෙර පැවති තත්වය පිළිගන්නා ලෙස පාර්ලිමේන්තුවේ බහුතරය ඉල්ලා ඇති හෙයින් ඔවුනට හා නව පාර්ශවයට හිමි බහුතරය පෙන්වීමට හැකිවන තුරු පෙර පැවති තත්වය පිළිගැනීමට මා හට සිදුවන බව අවධාරණය කරමි.“

අතිගරු ජනාධිපතිතුමනි,

අප විසින් නව තනතුරුවල දිවුරුම්දෙන ලද නව රජයට මෙතෙක් කිසිදු ජාත්‍යන්තර පිළිගැනීමක් ලැබී නැති බව ඔබතුමා මැනවින් දන්නා කාරණයකි. මෙම තත්වය ප්‍රජාතන්ත්‍රවාදය සදහා වන මාගේ හෘදය සාක්ෂිය දැඩි ලෙස කැළඹූ අතර, ඒ  පිළිබද මාගේ දේශපාලන හිතවතුන් සහ පාක්ෂිකයින් සමග දීර්ඝ ලෙස සාකච්ඡා කළෙමි. මාගේ හෘදය සාක්ෂියේ සහ දේශපාලන අනුගාමිකයින්ගේ අදහස වූයේද ව්‍යවස්ථානුකූල නොවන සහ නීත්‍යානුකූල නොවන ආණ්ඩුව තුළ තවදුරටත් රැදී සිටිය නොහැකි බවයි. ප්‍රජාතන්ත්‍රවාදය, දේශපාලනික විශ්වාසයන් හා හෘදසාක්ෂිය මත තවදුරටත් ආණ්ඩුව තුළ කටයුතු කළ නොහැකි බැවින් මා හට හිමිවූ නියෝජ්‍ය අමාත්‍යධූරයෙන් ඉල්ලා අස්වීමට තීරණය කළෙමි.

2015 ජනවාරි 8 වැනිදා ඔබතුමන් වෙත ලැබුණ ජනවරම සහ ඉන් අනතුරුව ජාතික ආණ්ඩුවක් පිහිටුවීම කෙරෙහි අවධානය යොමු කරමි. එහි මූලිකාංග වූයේ බලය අනිසි ලෙස භාවිතා කිරීම හා ප්‍රජාතන්ත්‍රවාදී නොවන කාර්යයන්ට තිත තැබීමය. මේ දක්වා  ඔබතුමන් මාවෙත දැක්වූ  සහාය හා විශ්වාසය කෙරෙහි මාගේ කෘතඥතාවය පුදකිරීමට කැමැත්තෙමි.

නමුත් උද්ගතවී ඇති වාතාවරණය හමුවේ කතානායකතුමාගේ ප්‍රකාශය පිළිගනිමි. පාර්ලිමේන්තුවේ බහුතර මන්ත්‍රීවරුන්ගේ සහාය හිමිව ඇති ගරු රනිල් වික්‍රමසිංහ මැතිතුමා නීත්‍යානුකූල හා ව්‍යවස්ථානුකූල අගමැතිවරයා ලෙස පිළිගනිමි.

ස්තුතියි,

මෙයය,

විශ්වාසී,

මනුෂ නානායක්කාර

(පාර්ලිමේන්තු මන්ත්‍රී)

මම ඉතාමත් සතුටු වෙනවා වසර 04 කට පසුව, නැවත මහින්ද රාජපක්ෂ ගරු අගමැතිතුමත් සමග එකම වේදිකාවකට එන්න ලැබීම පිළිබ`දව. මිත‍්‍රවරුනි, නොවැම්බර් මාසය ලංකාවේ පුදුම මාසයක්, 2014 නොවැම්බර් 21 වනදා තමයි මම එදා මහින්ද රාජපක්ෂ මැතිතුමාගේ ආණ්ඩුවෙන් ඉවත් වුණේ. අවුරුදු 04කට පස්සේ මේ 2018 නොවැම්බර් මාසයේ තමයි අපි තමුන්නාසේලා නැවත එක වේදිකාවකට ඇවිල්ලා ඉන්නේ.

ජනාධිපති මෛත්‍රීපාල සිරිසේන මහතා ඒ බව පැවැසුවේ 05දා පැවැති පාර්ලිමේන්තු වටරවුමේ පැවැති රැස්වීමට සහභාගී වෙමිනි. තවදුරටත් කරුණු ඉදිරිපත් කළ ජනාධිපතිවරයා,

මේ රටේ අග‍්‍රාමාත්‍ය ධූරයේ හිටපු රනිල් වික‍්‍රමසිංහ මහත්තයා එයින් ඉවත් කරලා ව්‍යවස්ථානුකූලව හිටපු ජනාධිපති මහින්ද රාජපක්ෂ මැතිතුමා අගමැති ධූරයට පත් කළේ ඇයි, මෙහි අරමුණු කුමක්ද, මෙයින් බලාපොරොත්තු වන්නේ කුමක්ද, මෙයින් සිදු වූයේ කුමක්ද, මෙයින් සිදු විය යුත්තේ කුමක්ද, මේ පුටුවට මාරු කළේ ශරීර දෙකක් නොවේ. මේ පුටුවට මාරු කළේ මිනිස්සු දෙන්නෙක් නෙවේ. මේ මාරු වුනේ මේ රටට අහිතවත්, දේශයට අහිතවත් අපට නොගැළපෙන අපේ සිතුම් පැතුම් හදුනා නොගත් දේශීයත්වය අගය නොකරන විදේශීය න්‍යාය පත‍්‍රවලට වැඩ කරන් දර්ශනයයි අපි අගමැති පුටුවෙන් ඉවත් කළේ කියලා මම පැහැදිළිව තමුන්නාන්සේලාට කියන්න  ඕන.

එහෙමනම් මේ පුටුවට පත් කළේ කවුද, මේ පුටුවට පත් කළේ අපට, රටට ගැළපෙන දේශයට ගැළපෙන දේශීය සංස්කෘතිය හදුනන, දේශීයත්වය අගය කරන, විදේශීය දේශපාලන න්‍යාය පත‍්‍ර ප‍්‍රතික්ෂේප කරන ඔබේ අපේ සැබෑ මිනිසෙක් වූ මහින්ද රාජපක්ෂ මහතායි. ඒ නිසයි මම කිව්වේ මෙය පුද්ගලයන් දෙදෙනෙක් වෙනස් කිරීමට වඩා පුළුල් පරමාර්ථයක්, පුළුල් දැක්මක්, පුළුල් වෙනසක්. දේශපාලන වශයෙන් රටට විය යුතු වෙනසක්, කළයුතු දෙයක්, අගමැති පුටුවට නොගැළපෙන දර්ශනයක් ඉවත් කර ගැළපෙන දර්ශනයක් හිදුවීමත් කියන එක තමුන්නාන්සේලාට කියන්න  ඕන.

පාර්ලිමේන්තුව නීත්‍යනුකූලව රැස්කර දේපාර්ශයේම බහුතරය පෙන්වන තුරු තමාට පිඝිගත හැකිවන්නේ පෙර පැවැති තත්ත්වය බව කතානායක කරු ජයුසූරිය මහතා විසින් නිකුත් කළ නිවේදනයක දැක්වේ.

මේ පිළිබඳව කරු ජයසූරිය මහතා විසින් නිකුත් කළ නිවේදනය පහතින් දැක්වේ.

ඒ.එච්.එම් ෆවුසි මහතා ජාතික සමගිය, සංහිදියාව හා මුස්ලිම් ආගමික කටයුතු පිළිබද රාජ්‍ය අමාත්‍යවරයා ලෙස ජනපති ඉදිරියේ දිවුරුම් අද (03) පෙරවරුවේ ජනාධිපති කාර්යාලයේ දී ජනාධිපති මෛත්‍රීපාල සිරිසේන මහතා ඉදිරියේ දිවුරුම් දුන්නේ ය.

LIN

මහානගර හා බස්නාහිර සංවර්ධන අමාත්‍යාංශය වෙත ගිය අමාත්‍ය පාඨලී චම්පික රණවක මහතා සිය අමාත්‍යාංශයේ හා අනුබද්ධිත ආයතනවල නිලධාරීන් අමතා මේ වන විට අමාත්‍යාංශය හා ආයතන මගින් අරඹා ඇති සංවර්ධන ව්‍යාපෘති සියල්ලෙහිම කටයුතු, උද්ගතව ඇති දේශපාලන තත්ත්වය හමුවේ නොසැලී, නොකඩවා ඉටු කරන ලෙස උපදෙස් දෙන ලදී.

මහානගර අමාත්‍යාංශය යටතේ ක‍්‍රියාත්මක සැහැල්ලූ දුම්රිය පද්ධති ව්‍යාපෘතියේ ආයෝජනයට අදාලව ජපන් රජය විසින් මේ මාසයේදී අත්සන් තැබීමට නියමිතව තිබූ ඩොලර් බිලියන 1.4ක ගිවිසුමද මේ වන විට අත්හිටුවා ඇති බව මෙහිදී හෙළි වූ අතර, පවතින තත්ත්වය පිළිබද විමසිල්ලෙන් සිටින ඔවුන් තත්ත්වය යහපත් වුවහොත් පමණක් ඉදිරි තීන්දුවකට එළඹෙන බව සදහන් කර තිබූ බව වැඩිදුරටත් ප‍්‍රකාශ විය.

ජපන් රජයෙන් පමණක් නොව අන් රටවල් විසින් ද ජනතා සුභසිද්ධිය වෙනුවෙන් ලැබීමට තිබූ ආධාර සදහා මෙම තත්ත්වය හේතුවෙන් බාධා එල්ලවෙමින් පවතින බව සදහන් කළ අමාත්‍යවරයා, රටේ මහජනතාව වෙනුවෙන්, රාජ්‍ය නිලධාරීන් ලෙස තම රටේ නිලධාරී ප‍්‍රතිඥාවට අනුව රටේ ස්ථාවරත්වය වෙනුවෙන් කැපවී කටයුතු කරන ලෙස රැස්ව සිටි සැමගෙන් ඉල්ලා සිටින ලදී.

LIN