අද අපේ රට ඉතා සංකීර්ණ, අර්බුදකාරී සහ අවාසනාවන්ත තත්වයකට ඇද වැටිලා තියෙනවා. රටක මූලික නීතිය පමණක් නොව, ප්‍රජාතන්ත්‍රවාදය හා සදාචාරයත් බිඳ වැටෙමින් පවතිනවා. මේ විනාශයට පත් වෙන්නේ අපේ රටේ අනාගතයයි. අපේ දූ දරුවන්ගේ අනාගතයයි. අපේ ශ්‍රේෂඨ ජාතියේ අනාගතයයි.

මෙතැන තියෙන්නේ කවුරු අගමැති තනතුර දරනවාද, කවුරු ජනාධිපතිකම දරනවාද, කවුරු මැති ඇමතිකම් දරනවාද, කවුරු ආණ්ඩු කරනවාද කියන ප්‍රශ්නය නෙවෙයි. මෙතන තියෙන්නේ ප්‍රජාතන්ත්‍රවාදය රකිනවාද නැද්ද කියන ප්‍රශ්නයයි. රටේ මූලික නීතිය ආරක්‍ෂා කරනවාද නැද්ද කියන ප්‍රශ්නයයි. රටේ ශීලාචාරකම ආරක්‍ෂා කරනවාද නැද්ද කියන ප්‍රශ්නයයි. ජනතා පරමාධිපත්‍යය ආරක්‍ෂා කරනවාද නැද්ද කියන ප්‍රශ්නයයි.

2015 ජනවාරියේදීත්, 2015 අගෝස්තුවේදීත් මේ රටේ ජනතාව අපට ජනවරමක් දුන්නේ මහින්ද රාජපක්‍ෂ පාලනය අවසන් කර, යහපාලනයක් ඇති කරන්නයි. ප්‍රජාතන්ත්‍රවාදී, ශීලාචාර සමාජයක් ඇති කරන්නයි. 

අපි ඒ ගමන ආරම්භ කළා. ජනවරමට අනුව අප ක්‍රියා කළා. ලංකා ඉතිහාසයේ ප්‍රථම වතාවට රටේ ප්‍රධාන පක්‍ෂ දෙක සියළු දේශපාලන භේද අමතක කර රට වෙනුවෙන් වැඩ කරන්න පටන් ගත්තා. 

අපි ප්‍රජාතන්ත්‍රවාදය ශක්තිමත් කළා. කඩා වැටෙමින් තිබූ ආර්ථිකය යළි ශක්තිමත් කිරීමේ පියවර ගත්තා. ගෙවා ගන්නට බැරිව තිබූ ණය බර ගෙවා ගන්නට පුළුවන් මට්ටමේ උපාය මාර්ග ක්‍රියාත්මක කළා. ජනතාව ශක්තිමත් කිරීමේ වැඩසටහන් දියත් කළා. ගම්පෙරළිය ඒ අතර විශේෂයි. 

අපි නිවැරදි මාවතට පිවිසුණා. සෙමෙන් වුණත් ඉදිරියට ගියා. බයක් සැකක් නැතුව ජීවත් වෙන්න පුළුවන් සමාජයක් ඇති කළා. අද ඔබ දකින්නේ ඒ සියල්ල විනාශ වී යන ආකාරයයි.  

පසුගිය කාලයේ මම අභියෝගයන්ට හා සිත් වේදනාවන්ට මුහුණ දුන්නා. මට අවලාද කිව්වා. අපහාස කළා. බැන වැදුණා. නමුත් මම ඉතා ඉවසීමෙන්, සංයමයෙන් හා ශීලාචාරව ඒවාට මුහුණ දුන්නා. මොකද මම හැම විටම ජනවරමට ගරු කළ නිසා. ජනවරම ආරක්‍ෂා කිරීම සඳහා මමත්, අපේ පක්‍ෂයත්, එක්සත් ජාතික පෙරමුණේ සියළු පක්‍ෂත් ඉතා සංයමයෙන් මේ අවස්ථාවන් හමුවේ කටයුතු කළා.

ඒ සංයමය හා ඉවසීම නිසා අවුරුදු තුනක් සමබරව රට ඉදිරියට ගෙනයන්න අපට පුළුවන් වුණා. එය ලේසි පාසු කාර්යයක් නෙවෙයි. ඒත් පසුගිය සති දෙකේ රට පත්වුණු අවුල දිහා බලන්න. රටක් පාලනය කිරීම වගකීමෙන්, සංයමයෙන් හා ඉවසීමෙන් කළ යුතු දෙයක් කියන්නේ අන්න ඒ නිසයි.

මගේ දේශපාලන ජීවිතයේ හැම විටම කටයුතු කළේ ප්‍රජාතන්ත්‍රවාදය වෙනුවෙන්. පුද්ගලිකත්වය කවදාවත් මම දේශපාලනයට ගාවා ගත්තේ නෑ. අවස්ථා දෙකකදී මගේ පුද්ගලිකත්වය අමතක කර, ජනාධිපති අපේක්‍ෂකත්වය අත හැරියා. ජනාධිපති අපේක්‍ෂක ලෙස ඉදිරිපත් වූ අවස්ථාවන්හිදී, කොටි සංවිධානය, ඔවුන් සමග එකඟතා ඇති කරගන්නා ලෙස මට පණිවිඩ එව්වා. නමුත් මම මගේ පුද්ගලික ජයග්‍රහණය හමුවේ රටට ද්‍රෝහි වුණේ නෑ. මම ඒ පණිවිඩ ප්‍රතික්ෂේප කළා. නමුත් ඒ සියල්ල මැද මම ප්‍රජාතන්ත්‍රවාදය ආරක්‍ෂා කළා. අදත් ආරක්‍ෂා කරනවා. ඒ වගේම ප්‍රජාතන්ත්‍රවාදය වෙනුවෙන් පෙනී සිටින සියළු දෙනා ඒකරාශී කරගන්නවා.

මම පසුගිය අවුරුදු දෙකක පමණ කාලයේ රට වෙනුවෙන් ඉවසුවා. කුමණ තත්වයක් මැද හෝ ජනතාව අපට ලබා දුන් ජනවරම ආරක්‍ෂා කිරීමට කැප වුණා.
නමුත් පසුගිය ඔක්තෝබර 26 වන දා ජනාධිපතිවරයා ව්‍යවස්ථා විරෝධී පියවරක් ගත්තා. ජනවරමට පිටු පෑවා. ජනතාව ප්‍රතික්ෂේප කළ කණ්ඩායමකට යළිත් බලය ලබා දෙන්නට උත්සාහ ගත්තා. එසේ කරමින් පාර්ලිමේන්තු සැසිවාරය කල් දැම්මා. ඒ අවස්ථාවේදීත් ව්‍යවස්ථාව ආරක්‍ෂා කරන්න අපි ඉදිරිපත් වුණා.

එතැනදීත් අප කියා සිටියේ ව්‍යස්ථාව අනුව කටයුතු කරන ලෙසයි. ආණ්ඩුක්‍රම ව්‍යවස්ථාවේ 42 වගන්තියේ 4 වන අනුවගන්තියේ මෙසේ සඳහන් වෙනවා.

"ජනාධිපතිවරයාගේ මතය අනුව පාර්ලිමේන්තුවේ විශ්වාසය උපරිම වශයෙන් ඇති පාර්ලිමේන්තු මන්ත්‍රීවරයා ජනාධිපතිවරය විසින් අග්‍රමාත්‍යවරයා ලෙස පත් කරනු ලැබිය යුත්තේය.”

පාර්ලිමේන්තු මන්ත්‍රීවරුන් 116 දෙනෙක් කතානායකවරයා හමුවී ජනාධිපතිවරයාගේ ක්‍රියාව නීති වරෝධී බව පෙන්වා දුන්නා. තවත් 8 දෙනෙක් දුරකථනයෙන් ඒ බව කතානායකවරයාට දන්වා සිටියා. ඉතින් කතානායකවරයා දන්වා සිටියේ  පාර්ලිමේන්තුව රැස්වූ විට බහුතර බලය පෙන්විය යුතු බවයි. එය වරදක් නෙවෙයි. ලෝකයේ පාර්ලිමේන්තු සම්ප්‍රදාය දන්නා අය එය නිවැරදි ක්‍රමය බව දන්නවා. මෑත ඉතිහාසයේ ඉන්දියානු පාර්ලිමේන්තුවේ අවස්ථා ගණනාවකදී එසේ සිදු කර තියෙනවා. පසුගිය අප්‍රේල් මාසයේ මට විරුද්ධව විශ්වාස භංග යෝජනාවක් ඉදිරිපත් වූ අවස්ථාවේ බහුතර බලය ඇත්තේ මට බව මම පාර්ලිමේන්තුවේදී පෙන්වුවා. 

නමුත් පාර්ලිමේන්තුව රැස්වීමට දින නියම කර තිබෙද්දී ජනාධිපතිවරයා ව්‍යවස්ථා විරෝධී ලෙස පාර්ලිමේන්තුව විසිරුවා හැරියා.

ජනාධිපතිවරයා පාර්ලිමේන්තු මන්ත්‍රීවරුන් මිළට ගැනීමක් ගැන සඳහන් කළා. ඒ මිළ ගණන් ගැන ඇත්තටම දන්නේ එතුමායි. මොකද අපේ පැත්තේ සිටි කීපදෙනෙක් හා ටීඑන්ඒ මන්ත්‍රීවරයෙක් ඒ පැත්තට අරන් මැති ඇමති ධූර පිරිනැමූයේ එතුමායි. මේ තත්වය නිසා සාමාන්‍ය ජනතාව තුළ පාර්ලිමේන්තු මන්ත්‍රීවරුන් පිළිබඳ තිබූ විශ්වාසය සම්පූර්ණයෙන්ම පාහේ බිඳ වැටී තියෙනවා. තමන් පත් කර යැවූ නියෝජිතයන් පිළිබඳව මහජන විශ්වාසය බිඳ වැටීම ඉතා අවාසනාවන්ත තත්වයක්.

පාර්ලිමේන්තුව රැස්වුණොත් මිනිස් ඝාතන සිදුවිය හැකි බවකුත් ජනාධිපතිවරයා සඳහන් කළා. අපේ රටේ වගේම අනෙකුත් රටවලත් පාර්ලිමේන්තුව ඉතා උණුසුම් වුණු අවස්ථා තියෙනවා. යම් යම් ගාලගෝට්ටි ඇතිවුණු අවස්ථාවන්ද තියෙනවා. නමුත් ලෝකයේ කිසිම රටක පාර්ලිමේන්තුවේ මිනිස් ඝාතනයක් සිදුවෙලා නෑ. 

පාර්ලිමේන්තුවේ පාලනය භාර කතානායකවරයාටයි. පාර්ලිමේන්තු සම්ප්‍රදායන් හා නීති රීති රකින්නේ එතුමායි. 

ගිය සතියේ පක්‍ෂ නායකයින් සමග කතානායකවරයා සාකච්ඡා කළා.  එතැනදී මෙවැනි ඝාතන පිළිබඳව කිසි අදහසක් ඉදිරිපත් වුණේ නෑ. ජනාධිපතිවරයා ළඟ මන්ත්‍රී ඝාතන සිදුවිය හැකි බවට තොරතුරු තිබුණා නම් කළ යුතුව තිබුණේ කතානායකවරයාට ඒ බව දැනුම් දීමයි. එවිට පක්‍ෂ නායකයින් සමග සාකච්ඡා කර සුදුසු පියවර ගැනීම කතානායකවරයාගේ වගකීමක්. නමුත් ජනාධිපතිවරයා එසේ නොකර, අත්තනෝමතික තීරණයක් ගත්තා.

රටේ ව්‍යවස්ථාව, ප්‍රජාතන්ත්‍රවාදය හා සදාචාරය පසෙකට දමා ගත් මේ තීරණය නිසා රට අවුලින් අවුලට පත්වුණා. අපේ රටේ ප්‍රතිරූපය සම්පූර්ණයෙන්ම විනාශ වුණා. ප්‍රජාතන්ත්‍රවාදය හා පාර්ලිමේන්තු සම්ප්‍රදායන් ගරු කරන ජනතාව කැළඹුණා. ජාත්‍යන්තර විශ්වාසය පලූදු වුණා.

නමුත් මේ තත්වයෙන් රට බේර ගැනීම සඳහා අප පුළුල් ජනතා සංවිධානයක් ගොඩනැංවීම ගැන සාකච්ඡා කරනවා. ඒ වගේම එක්සත් ජාතික පෙරමුණේ පක්‍ෂ අළුත් දේශපාලන සංධානයක් ඇති කර ගැනීමටත් බලාපොරොත්තු වෙනවා. අපි අලූත් මුහුණුවරකින් ජනතාව අතරට යනවා.

පසුගිය සති දෙක තුළ රටේ ඇති කළ අවුල් සහගත තත්වය නිසා තරුණ පරපුර විශාල වශයෙන් දේශපාලනය ගැන කලකිරී තියෙනවා. ශක්තිය ඇති අය රට අත් හැර යන්නට සූදානම් වෙනවා. එවැනි ශක්තියක් නැති තවත් තරුණ තරුණියන් විශාල පිරිසක් ඉන්නවා. ඔවුන්ගේ අනාගතය ගැන ඔවුන් බියෙන් පසුවෙනවා. මෙය කණගාටුදායක තත්වයක්.

මේ අවාසනාවන්ත තත්වයෙන් රට බේරා ගැනීම සඳහා බිඳුණු විශ්වාසය යළි තහවුරු කරන්නට අප ක්‍රියා කරනවා. ප්‍රජාතන්ත්‍රවාදය ශක්තිමත් කරන ව්‍යවස්ථාවක් රටට හඳුන්වා දෙනවා. ජනතාව භේද බින්න කිරීමට නොව එකමුතු කිරීමට කැපවෙනවා අපේ රටේ ප්‍රජාතන්ත්‍රවාදය, මූලික නීතිය, ශිෂ්ඨ සම්පන්න බව හා ජනතා පරමාධිපත්‍යය ආරක්‍ෂා කිරීම වෙනුවෙන් ඕනෑම අභියෝගයකට මුහුණ දීමට අපි සූදානම්. 

ඔබත් එන්න. අප හා එක්වන්න. අවිචාරවත්, ඒකාධිපති රෙජීමයකට යළිත් රට යටත් කිරීමට එරෙහිව අපි සටන් වදිමු. 

ප්‍රජාතන්ත්‍ර විරෝධී, කඩාකප්පල්කාරී වැඩවලින් රටක් ගොඩනගන්නට බැහැ. අපේ ජීවිත කාලය තුළ ජීවිත පරිත්‍යාගයෙන් ආරක්‍ෂා කළ මේ දේශය විනාශ කරන්නට අප ඉඩ දෙන්නේ නෑ. පුළුල් සංධානයක් තුළ ඒකරාශීවී, මේ ශාපයෙන් අපේ මව්බිම ගලවා ගන්නා බව මම ඔබට පොරොන්දු වෙනවා. ඒ සඳහා එකාවන්ව අපි අත්වැල් බැඳගමු.

ජපානයේ වෘත්තිය රැකියා සදහා යොමුවන ඉහළ මට්ටමේ කුසලතා සහිත විදේශික ශ්‍රමිකයින් සදහා ස්ථිර පදිංචිය සදහා අවස්ථාව ලබාදීමට ජපාන රජය තීරණය කර ඇත. ජපන් ජාතිකයින්ගේ ජනගහනයේ අඩුවීම හා වයස්ගත ජනගහනය ඉහළ යාම හේතුවෙන් ජපන් රජය විසින් මෙම තීරණය ගෙන තිබේ.

මෙම වැඩපිළිවෙල එළැඹෙන අප්‍රේල් මස සිට ක්‍රියාත්මක කිරීමට සැලසුම් කර තිබේ.

කාණ්ඩ 2ක් යටතේ මෙම වැඩසටහන ක්‍රියාත්මක කිරීමට නියමිත අතර පළමු කාණ්ඩය සදහා වසර 3ක තාක්ෂණික පුහුණුව හා ජපන් භාෂාව හදාරා තිබිය යුතුය. ඔවුන් සදහා වසර 5ක නේවාසික වීසා කාලයක් හිමිවන අතර, ඔවුන්ගේ පවුලේ සාමාජිකයින් සදහා මෙය වලංගු නොවේ. එසේම වසර 5ක විසා කාලයක් හිමිවු ශ්‍රමිකයින්ට වසර 10ක් දක්වා එරට සේවය කිරීමට අවස්ථාව සැලසේ. මෙම ශ්‍රමිකයින් සදහා ජපන් රජය විසින් නේවාසික පහසුකම් සලසා දෙනු ලැබේ.  කෘෂි, හෙද, සාත්තු සේවක, ආහාර පාන නිෂ්පාදනය, ඉදිකිරීම්, නැව්බඩුකරණ සහ නැව් යන්ත්‍රරෝපකරණ, ආගන්තුක සත්කාරය, ආහාර සේවා,  ධීවර කර්මාන්තය, නිෂ්පාදන කර්මාන්තශාලා; විද්‍යුත් සහ විදුලි උපකරණවලට අදාළ කර්මාන්ත, වාහන නඩත්තු කිරීම සහ ගුවන් සේවා වැනි රැකියා ක්ෂේත්‍ර සදහා රජය විසින් ලබාදෙනු ලබන නේවාසික පහසුකම් හිමිවේ.

දෙවන කාණ්ඩය යටතේ වර්ගීකරණය කරනු ලබන ශ්‍රමිකයින් සදහා ජපානයේ රැදීසිටිමේ නිශ්චිත කාලයක් සීමා නොකෙරේ. මෙම ශ්‍රමිකයින් සදහා ස්ථිර නේවාසික පහසුකම් ලබාදෙන අතර ඔවුන්ගේ පවුලේ ඥාතීන්හටද ජපානයේ රැදී සිටිමේ අවස්ථාව හිමිවේ.

නොයෙකුත් රටවල ආගමන විගමන ප්‍රතිපත්ති වෙනස්වීම හේතුවෙන් පවුලේ ඥාතීන් සමග ජපානයට පැමිණෙන ශ්‍රමිකයින් සදහා වසරකට වරක් මෙම වීසා බලපත්‍ර පිළිබදව සමාලෝචනයක් සිදුකරන අතර, බරපතල සිදුවීම් වාර්තා වුවහොත් වීසා බලපත්‍ර අවලංගු කිරීමට ජපන් රජය කටයුතු කරනු ලැබේ.

ජපානය තුළ නීතිවිරෝධිව රැදී සිටිම පාලනය කිරීම සදහා මෙම ක්‍රියාමාර්ගය හේතුවන බව එරට රජය විශ්වාසය පළකරයි. ජපානයේ නීතිවිරෝධි ලෙස රැදී සිටින පුරවැසියන්ගේ හා ජපන් සරණාගත ප්‍රතිපත්තිය උල්ලංඝණය කරමින් එරට රැදීසිටින සරණාගතයින්ගේ රටවල් සදහා මෙම අවස්ථාව හිමි නොවේ.‍

විදේශීය සේවකයන්ගේ පහසුව වැඩිදියුණු කිරීම සඳහා ජපන් රජය කටයුතු කරන අතර, ඔවුන්ගේ සේවා යෝජකයන් හෝ වෙනත් ආයතන වෙතින් ඔවුන්ගේ ජීවනෝපාය සහාය ලබා ගත යුතුය. ඔවුන්ගේ වැටුප් මට්ටම් ජපන් ශ්‍රමිකයින්ගේ වැටුප හා සමාන මට්ටමට බව එරට රජය සහතික කර තිබේ. 

පාර්ලිමේන්තු මැතිවරණය ජයග‍්‍රහණය කිරීම සඳහා පොදුජන පෙරමුණේ සාමාජිකයන්ගේ ඡන්ද ලබාගැනීමේ අරමුණින් ශ්‍රී ලංකා පොදුජන පෙරමුණේ සාමාජිකත්වය ලබාගැනීමට තමා සූදානම් නැතැයි නිපුණතා සංවර්ධන හා වෘත්තීය පුහුණු අමාත්‍ය දයාසිරි ජයසේකර මහතා පැවසීය.  

තමා ශ්‍රී ලංකා නිදහස් පක්‍ෂය වෙනුවෙන් හා එහි අභිවෘද්ධිය වෙනුවෙන් ක්‍රියාත්මක වන බවත් අමාත්‍යවරයා කීය.

ඉදිරි මහා මැතිවරණය ජය ගැනීම සඳහා    ජනාධිපති මෛත‍්‍රීපාල සිරිසේන මහතාගේ හා අගමැති මහින්ද රාජපක්‍ෂ මහත්වරුන්ගේ නායකත්වය යටතේ පොදු සන්ධානයක් ගොඩනැඟිය යුතු බවත් ඒ සඳහා ශ්‍රී ලංකා නිදහස් පක්‍ෂය, ශ්‍රී ලංකා පොදුජන පෙරමුණ, මහජන එක්සත් පෙරමුණ, ජාතික නිදහස් පෙරමුණ, පිවිතුරු හෙළ උරුමය හා දෙමළ පක්‍ෂ ඇතුලූ ප‍්‍රගතිශීලී බලවේග එකට එක්ව පොදු සන්ධානයක් ගොඩ නැඟිය යුතු බවත් සඳහන් කළේය.

මැතිවරණය ජයග‍්‍රහණය කිරීමේ අරමුණින් එක් එක් පක්‍ෂවලට යාම සහ ඒවායේ සාමාජිකත්වය ලබාගැනීමේ උවමනාවක් තමන්ට නැතැයි කී අමාත්‍යවරයා තමා කැප වන්නේ ශ්‍රී ලංකා නිදහස් පක්‍ෂයේ ඉදිරිගමන වෙනුවෙන් පමණක් යැයිද කීය.

(ලංකාදීප)

පාර්ලිමේන්තුවේ අයිතිවාසිකම්, ආණ්ඩුක්‍රම ව්‍යවස්ථාවේ උත්තරීතර භාවය හා ජනතා පරමාධිපත්‍ය ආරක්ෂා කිරීම තමා ලද වරප්‍රසාදයක් වන අතර එම ක්‍රියාකාරකම් සම්බන්ධයෙන් කවර ආකාරයෙන් වුව ප්‍රතිවිපාකයකට මුහුණදීමට තමා සූදානම් යැයි පාර්ලිමේන්තුවේ හිටපු කතානායක කරු ජයසූරිය මහතා නිවේදනයක් නිකුත් කරමින් සඳහන් කරයි.

එම නිවේදනය පහත දැක්වේ.

ප්‍රවෘත්ති නිවේදනයයි

පාර්ලිමේන්තුව නියෝජනය කළ විවිධ පක්ෂ නායකයන් සිදු වී ඇති පාර්ලිමේන්තුව විසුරුවාලීමට එරෙහිව ශ්‍රේෂ්ඨාධිකරණය ඉදිරියේ එය අභියෝගයට ලක්කරන බැව් මට දන්වා සිටියහ. ජනාධිපතිවරයාගේ ක්‍රියාවන් හි නීත්‍යානුකූලභාවය තීරණය කිරීමෙහි පාර්ලිමේන්තුව සතු වගකීම සහ අයිතිය ජනාධිපතිවරයා විසින් වලක්වනු ලැබීමේ හේතුවෙන් මෙම කරුණ පිළිබඳව අර්ථ නිරූපණයක් ලබා ගතයුත්තේ ශ්‍රේෂ්ඨාධිකරණයෙනි.

මහජනතාව තමන් නියෝජනය කරනු සඳහා තෝරා පත්කළ පාර්ලිමේන්තු මන්ත්‍රීවරුන්ගේ අයිතිය බලෙන් පැහැරගැනීම, පාර්ලිමේන්තුවේ භාරකරු ලෙස ගතවූ දෙසතිය තුළ මම විමසිල්ලෙන් නිරීක්ෂණය කළෙමි. විධායකය, ශ්‍රී ලංකා ස්වෛරීත්වයේ යාන්ත්‍රණය වන පාර්ලිමේන්තුව ඕනෑකමින්ම නොසලකා හැරීම ජනතා නිදහසට හා අයිතියට බරපතල අවදානමක් වනු ඇත.

මෙවන් බරපතල පසුබිමක ආණ්ඩුක්‍රම ව්‍යවස්ථාව ආරක්ෂා කිරීමෙහි දිවුරුම් දී ඇති සියළු රජයේ සේවක පිරිස් වෙත අවධාරණය කර සිටිනුයේ තමන් දුන් එම දිවුරුම පිළිබඳ යළිත් සිහිපත් කරන ලෙසයි. කිසියම් තැනැත්තෙකු හෝ බලයක් පිළිබඳ නොව මෙම ලියවිල්ල කෙරෙහි විශ්වාසය පලකළේ කවර කරුණක් නිසාදැයි ඔබ ඔබෙන්ම විමසා බැල්ම යෝග්‍ය වේ. අපගේ පරම බැඳීම පවතිනුයේ හුදෙක් ආණ්ඩුක්‍රම ව්‍යවස්ථාව වෙතය.

අප මවුබිමේ උත්තරීතර නීතිය වන ව්‍යවස්ථාව පිළිබඳ අප සතු වගකීම රාජ්‍ය සේවය මෙන්ම පොලීසිය හා අධිකරණයේ ස්වාධීනත්වය පිළිබඳ අපගේ වගකීම මතකයේ තබාගන්නා ලෙස මම ඔබගෙන් ඉතා ඕනෑකමින් ඉල්ලමි. කවුරුන් විසින් හෝ වේවා දෙනු ලබන නීත්‍යානුකූල නොවූ විධායකයේ නියෝග තරයේ ප්‍රතික්ෂේප කරන ලෙසද සියළු රාජ්‍ය නිලධාරීන්ගෙන් ඉල්ලා සිටීමට කැමැත්තෙමි.

ආණ්ඩුක්‍රම ව්‍යවස්ථාව යටතේ සිය වගකීම් දරන්නා වූ සියළු රටවැසියාගේ යුතුකම වනුයේ පක්ෂ දේශපාලනය හෝ පුද්ගල සබැඳියාව නොසළකා අද දවසේ රට පිළිබඳව ස්වදේශානුරාගයෙන් සිතා මවුබිමෙහි නිදහසත් ප්‍රජාතන්ත්‍රවාදයේ සුරක්ෂිත භාවයත් වෙනුවෙන් පෙනී සිටීමයි.

කල් තැබීමෙන් පසු පාර්ලිමේන්තුව කැඳවීමට තිබූ නොවැම්බර් මස 14 දින රජයේ ප්‍රතිපත්ති ප්‍රකාශණය ඉදිරිපත්කිරීමෙහිලා ජනාධිපතිවරයා වලක්වාලීමට මා අදහස්කළ බව ජ්‍යෙෂ්ඨ දේශපාලනඥයෙකු වන විදේශ කටයුතු පිළිබඳ අමාත්‍යවරයා අභූත චෝදනාවක් නඟමින් එම කරුණ පාර්ලි‍‍මේන්තුව විසිරුවා හැරීමට හේතු වන්නට ඇතැයි ප්‍රකාශ කිරීම පිළිබඳ මම විමතියට පත්වීමි.

තම කණ්ඩායමේ ක්‍රියාකාරකම් පිළිබඳ එම විදේශ කටයුතු පිළිබඳ අමාත්‍යවරයා වඩාත් අවංක හා විශ්වාසනීය හේතුවක් දැක්වූයේ නම්, ලෝකයා හමුවේ අප මව්බිමේ ගෞරවයට වන හානිය අවම කර ගැනීමේ ඉඩ ප්‍රස්ථාව තිබුණු බව මගේ විශ්වාසයයි.

කථානායක වරයෙකුගේ ක්‍රියාවන් සෑම කල්හිම විධායකයේ සතුටට හේතු වන්නේ නැත. පාර්ලිමේන්තුවේ ස්වාධීනත්වය පිළිබඳ මෙම සම්ප්‍රදායේ ඉතිහාසය 1641 දක්වා ගමන් කරන බව පෙන්වා දෙමි. ‍

බ්‍රිතාන්‍යයේ පළමු වැනි චාල්ස් රජු මහජන මන්ත්‍රී මණ්ඩලයේ සභිකයින් අත් අඩංගුවට ගැනීමට උත්සාහ කළ අවස්ථාවේ කථානායක විලියම් ලෙන්තල් එය වලකා ඔවුන් ආරක්ෂාකරනු වස් රජු ඉදිරියේ දණින් වැටී මෙසේ පැවසීය.

“ මහරජතුමනි, මා මේ පවසන කරුණු ඔබවහන්සේගේ චිත්ත ප්‍රීතියට හේතුවේවා! මෙම ස්ථානයේ සිදුවන දේ මාගේ දෙනෙතින් දැකීමටහෝ ඒ පිළිබඳ කිසිවක් පැවසීමට නොහැකි මුත්, මා කීකරු සේවකයෙකු පමණක් වන මෙම සභාව විසින් මා වෙත ලබා දී ඇති තීරණය හැර ඔබ වහන්සේ විසින් ඉල්ලා සිටින ආකාරයේ පිළිතුරක් ඔබ වහන්සේ වෙත ලබා දීමට නොහැකි බැවින් මා වෙත සමාව භජනය කරන සේක්වා.”

රජයේ නීත්‍යානුකූල භාවය පිළිබඳව තීරණයක් ගනු සඳහා පාර්ලිමේන්තුවේ ඡන්දයක් පැවැත්විය යුතු බවට මන්ත්‍රීවරු 124 දෙනෙකුගෙන් 116 දෙනෙකු මා පෞද්ගලිකව හමුවී ඉල්ලාසිටි අතර තවත් 08 දෙනෙක් දුරකථනයෙන් මා අමතා මෙම යෝජනාවට පක්ෂපාතීත්වය පළකොට සිටියහ. සියවස් ගණනක් තිස්සේ අපගේ පූර්වගාමී කථානායකවරුන් අනුගමනය කරමින් මන්ත්‍රී බහුතරය හා පාර්ලිමේන්තුව නියෝජනය කරන දේශපාලන පක්ෂ සතු අයිතිය සුරක්ෂිත කරනු සඳහා ඔවුන්ගේ ඉල්ලීමට ඉඩ දීමෙහි එකඟ වෙමින් මම සභාවේ ඡන්දයක් ගතයුතු බව ප්‍රකාශ කළෙමි.

රජයේ ප්‍රතිපත්ති ප්‍රකාශණයක් ඉදිරිපත්කිරීම වැළැක්විය යුතු බවට කිසිදු මන්ත්‍රීවරයෙකු ඉල්ලා නොසිටි අතර එවැන්නක් මාගෙන් ද අනුමත නොවනු ඇත.

හිටපු හමුදා නිලධාරියෙකු ලෙස මගේ මවුබිම අපේක්ෂා කළ කවර වූ හෝ කැප කිරීමක් ‍කිරීමට මම නිරතුරුව සූදානමින් සිටියෙමි. විධායකය හමුවේ පෙනීසිට පාර්ලිමේන්තුවේ අයිතිවාසිකම් ආණ්ඩුක්‍රම ව්‍යවස්ථාවේ උත්තරීතර භාවය, හා ජනතා පරමාධිපත්‍යය ආරක්ෂා කිරීම මා ලද වරප්‍රසාදයක් විය.

ඉහත සඳහන් මගේ ක්‍රියාකාරකම් පිළිබඳ කිසිඳු පැකිලීමකින් තොර කවර ආකාරයේ වුව ප්‍රතිවිපාකයකට මුහුණ දීමෙහි මා  සූදානම් බැව් වැඩිදුරටත් සඳහන් කරමි.

කරු ජයසූරිය
පාර්ලිමේන්තුවේ හිටපු කථානායක‘‘

(ලංකාදීප)

ජනාධිපති මාධ්‍ය අංශය විසින් ජනාධිපති මෛතී‍්‍රපාල සිරිසේන මහතා විසින් සිදු කරනු ලැබූ විශේෂ ප‍්‍රකාශයක් 2018. 11. 11 දින නිකුත් කර ඇත.

එම නිවේදනය සම්පූර්ණයෙන් පහත දැක්වේ.

තෙරුවන් සරණයි, දෙවි පිහිටයි,

ගෞරවනීය වන්දනීය මහා සංඝරත්නයෙන් අවසරයි,

සියලූම ගෞරවනීය ආගමික පූජතුමන්ලාගෙන් අවසරයි.

හිතවත්, දෙමාපියනි, දරුවනි, හිතවතුනි,

වර්තමාන දේශපාලන තත්ත්වය පිළිබ`දව පැහැදිලි කරමින් දින 14 ක් ඇතුළත ඔබ අමතන තුන්වන අවස්ථාව අද. මම පළමුවෙන්ම ගරු මහින්ද රාජපක්ෂ මහතා අගමැති ධූරයට පත්කීරීමෙන් අනතුරුව ඔක්තෝබර් 28 වනදා ඔබට මගේ අදහස් ඉදිරිපත් කළා.

ඒ වගේම නොවැම්බර් 05 වනදා බත්තරමුල්ලේ පැවති ජන හමුවේ දී දෙවන අවස්ථාවට දේශපාලන අදහස් මම ඔබට ප‍්‍රකාශ කළා. අද තුන් වන අවස්ථාවටයි මම ඔබ අමතන්නේ . මෙහි තිබෙන වැදගත්කම ශ‍්‍රී ලංකා පාර්ලිමේන්තුව විසුරුවා හැරීමෙන් පසුව මා විසින් ඔබ අමතන අවස්ථාව වීමයි. විශේෂයෙන්ම මා මුලින්ම ඔබට සඳහන් කරන්නට  ඕන ශ‍්‍රී ලංකා පාර්ලිමේන්තුව විසුරුවා හැරීමට හේතු වූ කරුණු ඉතාමත් සකෙවින් මෙන්ම කෙටියෙන්,

අපේ රටේ පාර්ලිමේන්තු සම්ප‍්‍රදාය, ශ‍්‍රී ලංකා පාර්ලිමේන්තුව ආරම්භ කරනු ලැබුවේ රාජ්‍ය මන්ත‍්‍රණ සභා යුගය අවසන් කරමින්, පළමුවෙනි පාර්ලිමේන්තුව ආරම්භ වුණේ 1947. එදා සිට අද දක්වා මහ මැතිවරණ පවත්මින්, ආණ්ඩු වෙනස් වෙමින්, නව රජයන් බලයට පත් වෙමින් මේ රටේ රාජ්‍ය පාලනය සිදුවී තිබෙනවා. විශේෂයෙන්ම වර්තමාන පාර්ලිමේන්තුවේ තත්ත්වය පසුගිය සතිය වන විට දේශපාලන වශයෙන් මෙන්ම සමාජමය වශයෙන් විනයගරුක සහ සදාචාරාත්මක සහ ශීලාචාර සමාජයක් ගොඩනැගීමේ කාර්යය උරුම වී තිබෙන රටේ උතුම්ම ස්ථානය, ජනතා පරමාධිපත්‍ය පැහැදිලිවන ඉහළම ස්ථානය වන පාර්ලිමේන්තුවේ මන්තී‍්‍රවරුන්ගේ වටිනාකම් රුපියල් මිලියන 100 සිට 150 දක්වා, ඒවගේම ඇතැම්විට සමහර මන්තී‍්‍රවරු මිලියන 500 දක්වා මිල නියම කර පෙන්වන්න පටන් ගත්තා.

අපේ රටේ පාර්ලිමේන්තුව තුළ ඇති වූ දේශපාලන අර්බුද සහ වෙනස්වීම් වලදී ඒ පිළිබඳව අපට අත්දැකීම් තිබෙනවා. මගේ මතකයේ තිබෙනවා 1964 දී ලේක්හවුස් පනතට විරුද්ධ වී පාර්ලිමේන්තුවේ ඇති වූ පරිවර්තනයන්. ඒ තුළ සිදු වූ ආණ්ඩු වෙනස. නමුත් 47 සිට අද දක්වා කාලය ගත් විට විසුරුවා හරින ලද පාර්ලිමේන්තුවල දූෂිත වූ තත්ත්වයක් අපිට දැනගැනීමට වාර්තා වන්නේ නැහැ. 2015 ඇති වූ මහ බැංකු මංකොල්ලය, ඉන් පසුව ඇති වූ විවිධ දූෂණ අක‍්‍රමිකතාවලට තිබූ සම්බන්ධතාවය, මහින්ද රාජපක්ෂ මහතා අගමැතිවරයා ලෙස පත්කිරීමෙන් පසුව පාර්ලිමේන්තුවේ බහුතරය පෙන්වීම ස`දහා ඇතිවූ දේශපාලන උණුසුම් සහගත තත්ත්වයේදී මන්තී‍්‍රවරුන්ගේ වටිනාකම් මම පෙර කී පරිදි මිල නියම කිරීම ඒ අය විසින් කරනු ලැබුවා. එය ඉතාමත්ම කනගාටුදායක තත්ත්වයක්. ඔබේ ගෞරවනීය ඡුන්දය ලබාගෙන පාර්ලිමේන්තුවට පැමිණි මෙම නියෝජිතයන් තමන්ගේ වටිනාකමට වාණිජ්‍ය වටිනාකමක්, මිලක් නියම කිරීම මොනතරම් දේශපාලන වශයෙන් ඛේදජනක ද අවසනාවන්ත ද යන්න ඔබ සෑම කෙනෙක්ම පිළිගන්නා වූ දෙයක්.

ඒ තුළ ප‍්‍රධාන වශයෙන්ම ඇති වූ තත්ත්වය මූලික කාරණයක් වුණා පාර්ලිමේන්තුව විසුරුවන්න. පාර්ලිමේන්තුව විසුරුවා හැරීමට දෙවන කාරණය ලෙස මුල් වූයේ හිටපු කථානයක කරු ජයසුරිය මහතාගේ හැසිරීම පුදුමාකාර වීම. ඒ ගැන මම ඉතාම කනගාටු වෙනවා. එතුමා මගේ ඉතාම හිතවතෙක්, මිත‍්‍රයෙක්. අපේ රටේ පාර්ලිමේන්තු සම්ප‍්‍රදාය තුළ පත් වූ කාථානායකවරු මධ්‍යස්ත හා අපක්ෂපාතිභාවය ඉහළින්ම පෙන්නුම් කළා 1947 සිට මේ දක්වාම. පාර්ලිමේන්තුවේ ස්ථාවර නියෝග, පාර්ලිමේන්තු සම්ප‍්‍රදාය පිළිබඳව නොසලකමින්, ඒ වගේම ජනාධිපතිවරයා සතු බලතල වලින් අග‍්‍රාමාත්‍යවරයෙක් පත්කිරීමේදී එය පිළිනොගන්නා ස්වභාවයක් ඇති කරමින් එතුමා විසින් කරනු ලැබූ ප‍්‍රකාශනයන් සහ එතුමාගේ හැසිරීම පාර්ලිමේන්තුව විසුරුවා හැරීමට මුල් වූ දෙවන කාරණය කියලා මම මෙහි දී සඳහන් කරන්න  ඕන.

මෙහි දී මා මතක් කරන්න  ඕන අපි දේශපාලන තත්ත්වයන් සැලකිල්ලට ගැනීමේ දී ඔබේ මතකය මම යොමු කරනවා 2015 ජනවාරි 08 වෙනිදා පැවති ජනාධිපති මැතිවරණයෙන් පසුව ඊට පසුදා ජනාධිපති ධූරයේ දිවුරුම් දී, ඊට මොහොතකට පසුව ගරු රනිල් වික‍්‍රමසිංහ මහතා අගමැති ධූරයට පත් කරනු ලැබුවේ පාර්ලිමේන්තුවේ මන්තී‍්‍ර මණ්ඩලයේ 225 න් 162 ක බලයක් තිබූ දි.මු ජයරත්න මහතා ඉවත් කර. රනිල් වික‍්‍රමසිංහ මහත්තයා පත්වුණේ මන්තී‍්‍රවරුන්ගේ සංඛ්‍යාව 41 ක් තිබියදී. ඒ අවස්ථාවේ අද කතා කරන බහුතරය පිළිබඳව කථා නොකළ  බව ඔබේ මතකයේ තිබෙනවා.

බොහෝ විට සම්ප‍්‍රදාය වන්නේ ජනාධිපතිවරයාට විශ්වාසය තැබිය හැකි පාර්ලිමේන්තුවේ මන්තී‍්‍රවරු බහුතරයකගේ කැමැත්ත ගත හැකි මන්තී‍්‍රවරයෙකු, අගමැතිවරයා වශයෙන් ආණ්ඩුක‍්‍රම ව්‍යවස්ථාවේ තිබෙන එකඟතාවයන් අනුව පත් කිරීම. එසේ පත්කිරීමෙන් පසුව පාර්ලිමේන්තුවේ බහුතරය ලබා ගැනීම සඳහා කෙරෙන ස්ථාවර නියෝග, ආණ්ඩුක‍්‍රම ව්‍යවස්ථාව නීති රීති යටතේ කටයුතු කරනු ලබනවා. එහෙත් අගමැතිවරයෙක් පත් කර පාර්ලිමේන්තුවට යන පළමු දිනයේදීම කිසියම් ආකාරයක ඔහු කෙරෙහි විශ්වාසය තිබේ ද යන්න බහුතරය විමසීමේ ඡන්ද විමසීමක් කිසි දවසක අපේ පාර්ලිමේන්තු සම්ප‍්‍රදායේ සිදුවී නැහැ. ස්ථාවර නියෝග තුළ එවැන්නක් සිදුවන්නෙත් නැහැ.

නමුත් පාර්ලිමේන්තුවේ ඒ තිබූ සම්ප‍්‍රදායන් කඩ කරමින් ගරු කරු ජයසූරිය මහතා විසින් නිකුත් කරනු ලැබු නිවේදන අංක 02 යටතේ, එතුමා නිකුත් කළ පළමු නිවේදනයේ සඳහන් වුණා මහින්ද රාජපක්ෂ මහතා පිළිගනිමින් අගමැතිවරයාට තිබෙන අයිතිවාසිකම් හා වරප‍්‍රසාද පාර්ලිමේන්තුවේ හිමිකරන බව. ඒ කියන්නේ විශේෂයෙන්ම අගමැතිවරයාට අයත් පාර්ලිමේන්තුවේ ආසනය. ඒ වගේම පාර්ලිමේන්තුවේ අග‍්‍රාමාත්‍ය කාර්යාලය. එය පළමු ප‍්‍රවෘත්ති නිවේදනයේ තිබුණත්, ඊට දින කිහිපයකට පසුව නිකුත් කළ දෙවැනි ප‍්‍රවෘත්ති නිවේදනය ඊට වඩා හාත්පසින්ම වෙනස් වූ ප‍්‍රවෘත්ති නිවේදනයක් බවට පත්වුණා. එහි එතුමා කියා සිටියා හිටපු අගමැති රනිල් වික‍්‍රමසිංහ මහතා අගමැතිවරයා වශයෙන් පිළිගන්නා බව. මේ තත්ත්වයන් සැලකිල්ලට ගැනීමේ දී ඒ ඇතිවූ තත්ත්වය මා දැඩි ලෙස අවධානයට යොමු කළා.

ඒ වගේම දෙපාර්ශ්වයේ ඇතැම් මැති ඇමතිවරුන්ගේ ප‍්‍රකාශ නිකුත් වුණා, මාධ්‍ය තුළ විවිධ සාකච්ඡුා මගින්, 14 වෙනිදා පාර්ලිමේන්තුව රැුස් වූ අවස්ථාවේදී විශාල ගැටුමක් ඇතිවන බවත්, ඇතැම්විට කිහිප දෙනෙකුගේ මරණය පවා සිදුවිය හැකි බවත් ඇතැමුන් ප‍්‍රකාශ කළා. එසේ එම සිද්ධිය සිදුවීමට මම ඉඩ හැරියා නම් 14 වෙනිදා පාර්ලිමේන්තුව රැස් කර එම ගැටුම ඔබෙත්,  මගෙත් මේ ආදරණීය මාතෘ භූමියේ නගරයක්, ගමක් පාසා ඇතිවන ගැටලූ සහගත තත්ත්වය, විශේෂයෙන්ම රටේ  සිවිල් ජනතාවට අතර කලබලයක්, බරපතළ තත්ත්වයක් නිර්මාණය වන බව පෙනී ගියා.

ඒ නිසා ඒ සියල්ලටම වඩාත් සුදුසු විසඳුම වන්නේ ඒ 225 හේ ගැටුම්සහගත තත්ත්වයක් එහි නිර්මාණය වෙමින් රට පුරා විශාල ගැටුම් සහගත සාමය කඩවන තත්ත්වයකට රට පත් වීමට ඉඩ හැරීම නොව මගේ වගකීම සහ යුතුකම වන්නේ ප‍්‍රජාතන්ත‍්‍රවාදය උසස් ලෙස ගුරු කොට සලකමින් නිදහස් සාධාරණ යුක්ති සහගත මැතිවරණයක් සඳහා මන්ත‍්‍රීවරු තෝරා පත් කර ගැනීමටත් මේ තිබෙන තත්ත්වයන් විසඳා ගැනීමටත් අපේ රටේ පුරවැසියන් ඡුන්ද බලය හිමිවූ ලක්ෂ එකසිය පනහක සංඛ්‍යාවට එම බලය පැවරීමත්. ඒ නිසා මන්ත‍්‍රීවරු අතරේ ඇති වූ දූෂිත තත්ත්වයත් කථානායකවරයාගේ ක‍්‍රියා කලාපයත් ගැටුම් සහගත තත්ත්වයන් නිර්මාණය වීමත් මේ සියල්ල සැලකිල්ලට ගනිමින් ඇති වූ දේශපාලන අර්බුදය විසඳා ගැනීම සඳහා සුදුසුම ප‍්‍රජාතන්ත‍්‍රවාදී යුක්තිසහගත වූත් සාධාරණ වූත් තීන්දුව විය යුත්තේ එය පොදු ජනතාවට භාරදීම යන ඒ උතුම් ප‍්‍රජාතන්ත‍්‍රවාදී පරමාර්ථය ඉටු කරමින්  තමයි මම පාර්ලිමේන්තුව විසුරුවා හැර මහ මැතිවරණයක් පැවැත්වීමට තීරණය කළේ. ඒ තුළින් දැන් තිබෙන තත්ත්වයට පැහැදිලි ස්ථිරසාර විසඳුමක් මහ මැතිවරණයකින් ඇති වන බව ප‍්‍රකාශ කරන්නට  ඕනෑ.

මෙහි දී මහ මැතිවරණය පැවැත්වීමේ පූර්ණ බලධාරීන් වන්නේ මැතිවරණ කොමිෂන් සභාවයි. මැතිවරණ කොමිෂන් සභාවට අපි සම්පූර්ණ සහයෝගය දිය යුතු වෙනවා. මැතිවරණ නීතිරීති ආරක්ෂා කරමින් රට තුළ මැතිවරණ කොමිසම විසින් ප‍්‍රජාතන්ත‍්‍රවාදී සාධාරණ සහ යුක්තිසහගත මැතිවරණයක්  පැවැත්වීමට ඔබ අප සෑම කෙනෙක්ම අපගේ ඉහළම සහයෝගය මැතිවරණ කොමිසමටත් රාජ්‍ය නිලධාරීන්ටත් ආරක්ෂක කටයුතුවල යෙදෙන පොලීසිය ඇතුළු ත‍්‍රිවිධ

හමුදාවටත් සහයෝගය ලබා දෙමුයි කියන ගෞරවනීය ඉල්ලීම මා ඔබට ඉදිරිපත් කරන්නේ ඉතාමත්ම නිහතමානී ලෙසයි. නව ආණ්ඩුවක් අපි තෝරා ගත්තා. ඒ වගේම දුෂිතයන් ඉවත් කර රාජ්‍ය පාලනය සඳහා පිරිසිදු මන්ත‍්‍රී මණ්ඩලයක් තෝරා පත් කර ගැනීම ගෞරවනීය ඔබට භාරයි. අප ප‍්‍රධාන වශයෙන්ම ප‍්‍රජාතන්ත‍්‍රවාදය තුළ ඒ ජනමතයට හිස නමමින් මහ මැතිවරණයක් පැවැත්වීම කාගේත් ප‍්‍රසාදයට ලක් වූ කාරණයක් තීරණයක් විදියටයි මා දකින්නේ.

රටේ දැවෙන ප‍්‍රශ්න ජීවන වියදම, සමෘද්ධිමත් ආර්ථිකයක් ඇති කිරීම වගේම දේශීය කර්මාන්ත ශක්තිමත් කිරීම වගේම පිරිසිදු විදේශීය ආයෝජන දූෂණයෙන් තොරව ලබා ගැනීම, සදාචාර සම්පන්න විනයගරුක සමාජයක් ගොඩනැගීම, ප‍්‍රජාතන්ත‍්‍රවාදය ශක්තිමත් කිරීම වැනි කරුණු සියල්ලටම මා හිතනවා විසඳුම වෙන්නේ මේ මැතිවරණය පවත්වා ඔබේ තීරණය අනුව නව ආණ්ඩුවක් පත් කර ගැනීම යි.

ඒ නිසා අපේ ආදරණීය මාතෘභූමිය නව මඟකට අපි අරගෙන යනවා. රටේ අද ජීවත් වන ජනතාවට වගේම හෙට උපදින දරුවන් සඳහා නව තාක්ෂණික ලෝකය තුළ සදාචාරසම්පන්න වූ අපේ සිරිත් විරිත්, සම්ප‍්‍රදායයන්, සංස්කෘතීන් ආරක්ෂා කරමින් දැනුම මුල් කරගත් සමාජයක් ඒ වගේම උගත් බුද්ධිමත් පිරිසක්

වගේම ප‍්‍රබුද්ධ පරිණත රාජ්‍ය පාලකයන් පිරිසක් පත් කිරීම සඳහා ඔබට මේ ඉතාමත්ම විශිෂ්ට වූ අවස්ථාව උදා වී තිබෙනවා. ඒ නිසා මූලික වශයෙන්ම මැතිවරණය පැවැත්වීම සම්බන්ධයෙන් දැනට කර ඇති නිවේදනය තුළ ගැසට් නිවේදනයත් ඒ වගේම මැතිවරණ කොමිසම ගෙන ඇති තීන්දුවලටත් අපි සම්පූර්ණ සහයෝගය ලබා දෙනවා. එහිදී මැතිවරණයක නීතිරීති තුළ මීට පෙර දැක අත්දැකීම් ඇති මැතිවරණ නීතිරීති උල්ලංගණය වන කරුණු අතර මුල්වන කාරණා එකක් දෙකක් මා ඔබට මතක් කරන්න කැමතියි.

මූලික වශයෙන්ම දේශපාලන පක්ෂවල මැතිවරණ ව්‍යාපාර සඳහා අපේක්ෂකයන්ගේ මැතිවරණ ව්‍යාපාර සඳහා රාජ්‍ය දේපළ අවභාවිතයෙන් සම්පූර්ණයෙන්ම ඉවත් වීම. රජයේ වාහන පාවිච්චි කිරීම සම්පූර්ණයෙන් ඉවත් වීම. පසුගිය ආණ්ඩුව තුළත් වර්තමාන භාරකාර ආණ්ඩුව තුළත් දැනට කටයුතු කරන මේ අවස්ථාවේ දී ඒ එක් එක් අමාත්‍යාංශවලට මන්ත‍්‍රීවරුන්ට පාවිච්චි කිරීමට වාහන ලබා දී තිබුණු බව ඔබ සෑම කෙනෙක්ම දන්නවා. අද ආණ්ඩුක‍්‍රම ව්‍යවස්ථාවේ 19 වන සංශෝධනය අනුව බලය තිබෙන්නේ භාරකාර ආණ්ඩුවක් විදියට නාම යෝජනා දීම නිවේදනය කිරීමේ සිට පාර්ලිමේන්තුව රැුස් කරන කාලය දක්වා ඇමති මණ්ඩලය සහ අගමැති ජනාධිපති කියන මේ ඇමති මණ්ඩලයෙන් සමන්විත භාරකාර මණ්ඩලයටයි. ඒ නිසා එම ජනාධිපති, අගමැති, ඇමති මණ්ඩලයේ සාමාජිකයන් හැර වෙනත් කිසියම්ම කෙනෙකුට හිටපු රාජ්‍ය ඇමතිවරු, හිටපු නියෝජ්‍ය ඇමතිවරු, හිටපු මන්ත‍්‍රීවරු ඒ කිසිවකුට රජයේ වාහන සහ රජයේ පොදු දේපළ භාවිත කිරීම මැතිවරණ නීතිය යටතේ සම්පූර්ණයෙන්ම තහනම් බව ඔබ දන්නා දෙයක්. ඒ නිසා ආණ්ඩු වෙනස් වීමක් ඇති වූ මේ අවස්ථාවේ හිටපු මැති ඇමතිවරුන් භාරයේ තිබූ සියලූම රජයේ වාහන, සම්පත් වහාම අදාළ අමාත්‍යාංශයේ ලේකම්වරයාට භාරදෙන ලෙස ඒ මැති ඇමතිවරුන්ගෙන් මා ගෞරවයෙන් ඉල්ලා සිටිනවා. එසේ භාරදීම ප‍්‍රමාද වුව හොත් මට සිදුවෙනවා පොලීසිය යොදවා නීතිය ක‍්‍රියාත්මක කරමින් එම වාහන ආපසු ලබා ගැනීමට පමණක් නොව එවැනි කටයුතු කරන කවුරුන් හෝ වේවා කුමන පක්ෂයක හෝ වේවා ඒ අයට විරුද්ධව ඉතාමත් තදින් නීතිමය ක‍්‍රියාමාර්ග ගැනීමටත් සිදුවනවා. ඒ නිසා රජයේ වාහන පාවිච්චි කිරීම, රජයේ සම්පත් පොදු දේපළ පාවිච්චි කිරීම මේ අවස්ථාව තුළ සම්පූර්ණයෙන්ම නොකළ යුතු නීතියෙන් තහනම් දෙයක් බව ඔබට මා මෙහි දී කාරුණිකව සිහිපත් කරනවා.

ඒ නිසා මේ මැතිවරණ කටයුතු සිදුකිරීම සඳහා අපි මැතිවරණ කොමිසමට, රාජ්‍ය නිලධාරීන්ට, පොලීසිය, ත‍්‍රිවිධ හමුදාව ඒ සියලූ දෙනාටම අපේ සම්පූර්ණ සහයෝගය ලබා දෙනවා. මැතිවරණ කාලසීමාව තුළ ගැටුම් ඇති කර නොගනිමින් සාමකාමීව ඉතාමත් අවබෝධයෙන් කටයුතු කරමින් ඒ සාමකාමී ප‍්‍රජාතන්ත‍්‍රවාදී මැතිවරණයක් පැවැත්වීමේ වගකීම දේශපාලන පක්ෂ නායකයන්, මැති ඇමතිවරු, අපේක්ෂයන්, අපේක්ෂකයන්ගේ ආධාරකරුවන් රටේ පොදු ජනතාව ඒ සෑම කෙනෙකුටම පැවරෙන්නා වූ ඉතාමත්ම පුළුල් වගකීමක් බව ඔබ දන්නවා. ඒ සියල්ල සිහිපත් කරමින් මා මේ ඉදිරිපත් කළ කරුණු අනුව අපේ උතුම් රට ඉදිරියට ගෙන යන්නට සමෘද්ධිමත් ආර්ථිකයක් ඒවගේම නවෝදයක් ප‍්‍රබුද්ධ රාජ්‍යයක් ලෝකයේ ශ්‍රේෂ්ඨ උතුම් රාජ්‍ය පාලනයක් සහිත ඉතාම සාදාචාරසම්පන්න සාමකාමී ගුණවත් සමාජයක් ස්වදේශිකත්වය මුල්කරගත් වටිනාකම් ඇතිව අපේ සංස්කෘතිය අපේ දේශීයත්වය ස්වදේශිකවාදය  මුල්කරගත් රාජ්‍ය පාලනයක් සඳහා ඔබ සියලූ දෙනගේ සහයෝගය මා ඉතාම කාරුණිකව ගෞරවයෙන් ඉල්ලා සිටිනවා.

ධම්මෝ හවේ රක්ඛති ධම්මචාරී

නහි වේරේන වේරානී

සම්මන්තී ද කුදාචනං

අවේරේන ච සම්මන්ති

ඒස ධම්මෝ සනන්තනෝ

ශ්‍රී ලංකා නිදහස් පක්ෂය ඇතහැර නව අගමැති මහින්ද රාජපක්ෂ ඇතුළු නව කැබිනට් මණ්ඩලයේ ඇමතිවරුන් ඇතුළු මන්ත්‍රීවරු 50කට ආසන්න කන්ඩායමක් පොදුජන පෙරමුණේ සමාජිකත්වය ලබාගන්නා ලදි.

හිටපු ශ්‍රීලනිප මහලේකම් අනුර ප්‍රියදර්ශන යාපා ද පොදුජන පෙරමුණේ සාමාජිකත්වය ලබාගෙන ඇත.

නාමල් රාජපක්ෂ මන්ත්‍රීවරයා මීට පෙර ප්‍රකාශ කළේ නැවත කිසිදාක ශ්‍රී ලංකා නිදහස් පක්ෂයෙන් නැවත ඡන්දය නොඉලන්න බවයි.

නාමල් රාජපක්ෂ මහතා ගුවන් විදුලි නාලාකාවකට ප්‍රකාශයක් දෙමින් තමා ශ්‍රී ලංකා නිදහස් පක්ෂයෙන් ඉල්ලා අස්වන බවත්, නැවත එම පක්ෂයෙන් තරඟ නොකරන බවත් ප්‍රකාශ කර ඇත.

ඔහු තවදුරටත් පවසා පොදු ජන පෙරමුණේ සාමාජිකත්වය ලබාගන්නා බවත්, ඉදිරි මැතිවරණ පුළුල් පෙරමුණකින් තරඟ කිරීමට බලාපොරොත්තු වන බවත් ප්‍රකාශ කරන ලදි.

යලිත් කිසිදිනෙක තමා ශ්‍රී ලංකා නිදහස් පක්ෂයෙන් තරඟ නොකරන බවද ප්‍රකාශ කරන ලදි.

රටේ ප්‍රජාතන්ත්‍රවාදය හා ජනතාවගේ අයිතිවාසිකම් ආරක්ෂා කිරීමට බල කරමින්  කම්කරු හා විදේශ රැකියා නියෝජ්‍ය අමාත්‍යධූරයෙන් ඉල්ලා අස්වූ මනුෂ නානායක්කාර මහතා සම්බන්ධයෙන් සාවද්‍ය හා අපහාත්මක ප්‍රකාශ කිරීමට විරෝධය දක්වමින් ඩිලාන් පෙරේරා හා අරුන්දික ප්‍රනාන්දු යන මන්ත්‍රීවරුන් දෙදෙනාගෙන් රුපියල් මිලියන දහසක වන්දියක් ඉල්ලමින් එන්තරවාසියක් යවා ඇත.

හිටපු නියෝජ්‍ය ඇමැතිවරයා වෙනුවෙන් කොන්ටිනෙන්ටල් ලෝ ඇසෝසියේටිස් නීතීඥ ආයතනය මෙම එන්තරවාසි දෙක යොමු කර ඇති අතර එක් අයෙක්ගෙන් රුපියල් මිලියන පන්සියය බැගින් වන වන්දියක් ඉල්ලා තිබේ.

නිදහසේ මාධ්‍ය කේන්ද්‍රෙය්දී ඩිලාන් පෙරේරා මන්ත්‍රීවරයා ප්‍රවෘත්ති සාකච්ඡාවක් කැදවමින් හිටපු නියෝජ්‍ය ඇමැතිවරයා විදේශ ගතවීම සම්බනන්ධයෙන් ද්වේශසහගතව හා කීර්තිනාමයට හානියක් වන ආකාරයට ප්‍රකාශ නිකුත් කර තිබූ බව එම  එන්තරවාසියේ දැක්වේ. ඩිලාන් පෙරේරා මන්ත්‍රීවරයා ප්‍රවෘත්ති සාකච්ඡාවේදී ඉදිරිපත් කළ සියලුම කරුණු සාවද්‍ය බවත් එම චෝදනා සම්පූර්ණයෙන්ම ප්‍රතිකෂේප කරන බවත් එහි සදහන් වේ.

අරුන්දික ප්‍රනාන්දු මන්ත්‍රීවරයාද ජනාධිපති ලේකම් කාර්යාලයේදී පැවති සාකච්ඡාවකදී හිටපු නියෝජ්‍ය ඇමැතිවරයාගේ දේශපාලන ජීවිතයට දැඩි ලෙස හානි වන ආකාරයේ අසත්‍ය ප්‍රකාශයක් නිකුත් කර තිබෙන  බවද එය ජනමාධ්‍යයේ ප්‍රචාරය වී තිබෙන බවද එන්තරවාසියේ දැක්වේ. මෙම අසත්‍ය හා ද්වේශසහගත ප්‍රකාශ තරයේ ප්‍රතික්ෂේප කරන බවද එහි සදහන් වේ.

දින දහ හතරක කාලයක් තුළදී මෙම වන්දි මුදල ලබාදීමට කටයුතු කළ යුතු බවත් එහ පැහැර හරින්නේ නම් අධිකරණයේ නඩු පැවරීමට සිදුවන බවත් මනුෂ නානායක්කාර මහතා වෙනුවෙන් පෙනී සිටින නීතීඥ සමාගම ඩිලාන් පෙරේරා හා අරුන්දික ප්‍රනාන්දු යන මහත්වරුන්ට දැනුම්දී ඇත.

''සෞඛ්‍ය අමාත්‍යාංශයේ සම්පුර්ණ ස්වාධීන විගණනයක් සිදුකර ඉන් පසු වැඩ ආරම්භ කරමු'' යැයි සෞඛ්‍ය පෝෂණ හා දේශීය වෛද්‍ය අමාත්‍ය චමල් රාජපක්‍ෂ මහතා සෞඛ්‍ය අමාත්‍යංශයේ වැඩ භාරගැනීමෙන් පසු පැමිණි සිටි පිරිස අමතමින් එසේ පැවසීය. 

මේ ස්ථානයට මම අවේ ජනතා සේවකයෙක් හැටියට. අපි ඔබ සැම දනොම ජනතාවගේ සේවකයෝ. ජනතාව අපෙන් විශාල සේවයක් බලාපොරොත්තුවෙනවා. හිටපු අමාත්‍යතුමා සෞඛ්‍ය අමාත්‍යාංශය පිළිබදව විශේෂ ප්‍රකාශයකුත් කළා. නව ලේකම්තුමියත් මෙම සෞඛ්‍ය ක්‍ෂේත්‍රය පිළිබදව මනා දැනුමක්,අවබෝධයක් ඇති නිළධාරිණියක්. කාගේවත් කේලාම් හා ඕපාදුප අහන්නේ නැතිව යතාර්ථවාදීව අපිට ඉදිරියට වැඩ කරන්න පුල්වන් වෙයි කියලා අපි විශ්වාස කරනවා.මම ලේකම්තුමියගෙන් ඉල්ලා සිටිනවා, අපි අමාත්‍යාංශයේ සම්පුර්ණ ස්වාධීන විගණනයක් කරමු කියන එක. ඉන් පසුව අපි වැඩ ආරම්භ කරමු යැයි අමාත්‍යවරයා පැවසීය.