Education News

සිකුරාදා, 10 මාර්තු 2017 09:30

සුඛෝපභෝගීත්වයේ හුවාවි සළකුණ

ලෝකයේ ස්මාට්ෆෝන් මිළ දිනෙන් දින ඉහළ යද්දී සන්නාමය වෙනුවෙන් නිකරුනේ මුදල් යොදවනු වෙනුවට, මිළ අඩු එහෙත් විශේෂාංග අතින් ඉතා ඉහළින් ඇති ස්මාට්ෆෝන් මිලදීගන්නට මිනිසුන් යොමුවුනා. ඒ අතර හුවාවේ, සයෝමි, ඔපෝ වන්ප්ලස් වැනි සන්නාමයන් ඉදිරියෙන් සිටියේ, ඔවුන් ප්‍රධාන පෙළේ නිෂ්පාදනවල විශේෂාං ඒ අයුරින්ම තබානිමින් ඒවායේ මිලෙන් අඩකටත් අඩුවෙන් එම නිෂ්පාදන වෙළඳපොලට එක් කළ නිසායි.

මෙලෙස හඳුන්වා දෙන්නේ එයාකාරයේ අඩු මිල සන්නාමයකින් නිමවූ ඉතා අධික මිළැති ස්මාට්ෆෝනයක්. ඒ Huawei සමාගමේ Mate 9 Porsche Design උපාංගයයි. පසුගිය ජනවාරි මාසයේ නිකුත් වූ මෙම උපාංගය මගින් බ්ලැක්බෙරි වැනි සමාගම් Porsche Design ලෙසින් ඉදිරිපත් කළ සුඛෝපභෝගී ස්මාට්ෆෝන්වලම දිගුවක් නිරූපණය වන අතර ඒවා පෝෂ් ඩිසයින් සමාගමේ නිෂ්පාදන ලෙස වෙළඳපොලට එක්වන්නේ ඒවායේ ඇති සුවිශේෂී හැඩයත් සමගයි.

මෙලෙස පෝෂ් ඩිසයින් ලෙස ස්මාට්ෆෝන්, ඉයර්ෆෝන්, ස්පීකර්, අවු කණ්නාඩි, අත් ඔරලෝසු වැනි දෑ වෙළඳපොලට නිකුත් වුනු අතර මේ සටහන වෙන්වන්නේ රුපියල් දෙලක්ෂ තිස්දහසකට ආසන්න මිලකින් වෙළඳපොලට එන Huawei Mate 9 Porsche Design නිෂ්පාදනය සම්බන්ධවයි.

අඟල් 5.5ක AMOLED capacitive touchscreen තිරයක් සහ ඩුවල් සිම් පහසුකම සමග Huawei Mate 9 Porsche Design ස්මාට්ෆෝනය වෙළඳපොලට එයි. ඔක්ටා කෝ ප්‍රොසෙසරයකින් ජවගැන්වෙන මෙය ධාවනය වන්නේ Android 7.0 Nougat මෙහෙයුම් පද්ධතිය මතිනි. මෙහි රැම් අගය ගිගාබයිට් 6කි. බාහිරින් මතක චිප ඇතුළත් කළ නොහැකි මුත් ගිගාබයිට් 256ක් දක්වා ඉහළ දැමිය හැකි අති විශාල බාහිර මතකයක් එහි ඇතුළත්ය. ප්‍රධාන කැමරාව මො පික්සල් 20ක් සහ 12ක් ලෙසින් වූ කැමරා දෙකක පද්ධතියක් ලෙසින් නිමවා ඇත. ඉදිරිපස ද්විතියික කැමරාව මෙගා පික්සල් 8 ක් වේ.

මෙහි Fingerprint (front-mounted), accelerometer, gyro, proximity, barometer, compass ලෙසින් වන සංවේදකයන් ඇතුළත්ය. ග්‍රැෆයිට් කළු වර්ණයෙන් එන මෙම Huawei Mate 9 Porsche Design ස්මාට්ෆෝනය 4000 mAh ප්‍රමාණයේ බැටරියකින් බලගැන්වේ.

( රච්න්ත ජයවර්ධන_අද )

මෙස්‌ අයිනාක්‌ (Mes Aynak) යනු ඇෆ්ගනිස්‌ථානයේ ලෝගාර් පළාතේ පිහිටා ඇති ප්‍රදේශයයකි.

කාබුල් නගරයේ සිට කිලෝමීටර් 40ක පමණ දුරක්‌ අග්නිදිග දිශාවට වන්නට පිහිටා ඇති, ගහකොළ නොමැති මුඩුබිමක්‌ බඳු මේ නිම්න භූමිය කරුණු දෙකක්‌ නිසා වැදගත් වෙයි.

එයින් එකක්‌ වන්නේ ඇෆ්ගනිස්‌ථානයේ පිහිටා ඇති විශාලතම තඹ නිධියක්‌ එහි පිහිටි නිසා ය.

එය ලෝකයේ පිහිටි උකහා නොගත් විශාලතම තඹ නිධියක්‌ ලෙස ද හැඳින්වේ.

දෙවැන්න වන්නේ අතීතයේ පැවැති සේද මාර්ගයේ වැදගත් තැනක පිහිටා තිබූ නගරයක්‌ ලෙස හඳුනාගෙන ඇති මේ ස්‌ථානයේ පිහිටා තිබූ බෞද්ධ පුදබිමක නටබුන් විශාල ප්‍රමාණයක්‌ ද හඳුනාගෙන තිබීම ය.

Mes_Aynak-02.jpg

උක්‌ත තඹ නිධිය භාවිතයට ගැනීම සඳහා ගන්නා උත්සාහය නිසා මේ පුරාවිද්‍යාත්මක උරුමය මේ වන විට විනාශ වී යැමේ තර්ජනයට ලක්‌ ව ඇත.

-vidusara

සම්පූර්ණයෙන්ම කාබන් වලින් සැදුනු ලොව ප්‍රථම නැනෝලේසරය (නොහොත් ස්පේසරය) හඳුන්වා දීමට ඕස්ට්‍රේලියාවේ මොනෑෂ් විශ්ව විද්‍යාලයේ ආචාර්ය උපාධිය හදාරන චානක රූපසිංහ සමත්ව ඇත.

සාමාන්‍ය ලේසරයක් නැනෝ පරිමාණයේ (<100nm ) සැදිය නොහැකි වන අතර මේ සඳහා ස්පෙසර් (spaser – surface plasmon amplification by stimulated emission of radiation ) යන සංකල්පය භාවිතා වෙයි.

පරිඝනක චිප වල ට්‍රාන්සිස්ටර වෙනුවට නැනෝලේසර් භාවිතා කිරීමෙන් එහි වේගය සිය ගුණයකින් වැඩි කිරීමටත් ප්‍රමාණයෙන් කුඩා කිරීමටත් හැකිය.

හඳුන්වා දුන් නැනෝලේසරය ග්‍රෆීන් (graphene) සහ කාබන් නැනෝටියුබ් (carbon nanotubes) වලින් සෑදී ඇත. මෙම නිසා මෙම නැනෝලේසරය භාවිතා කොට සාදන උපාංග ඉතා ශක්තිමත්, නම්‍යශීලී වන අතර ඉහල උෂ්ණත්ව වලට ඔරොත්තු දෙයි.
මීට අමතරව මෙම නිෂ්පාදන පරිසරයට හා සෞඛ්‍යයට ද හිතකර වනු ඇති.

මේ වන විට නැනෝ – අංශු පිලිකා සෛල අසලට ගෙන යාමේ උපක්‍රම විද්‍යාඥයන් සොයාගෙන තිබෙන අතර මෙම ක්‍රම යොදාගනිමින් ග්‍රෆීන් සහ කාබන් නැනෝටියුබ් අංශු පිලිකා සෛල අසලටලංකර නැනෝලේසරය ක්‍රියාත්මක කොට අධික තාපයක් ලබා දීමේ හැකියාව පවතී.

මෙමගින් සාමාන්‍ය සෛල විනාශ නොකොට පිලිකා සෛල පමණක් විනාශ කිරීම මෙහි තවත් ප්‍රයෝජනයක් විය හැකි බව පර්යේෂකයෝ පවසති.

චානක මහාචාර්ය මලින් ප්‍රේමරත්න මහතාගේ පර්යේෂණ කණ්ඩායම යටතේ නැනොලේසර් පිළිබඳව පර්යේෂණ කටයුතු සිදු කරන අතර ප්‍රථම උපාධිය ලබාගත්තේ මොරටුව විශ්ව විද්‍යාලයෙනි.

-reporter

ලොව ප්‍රථම වතාවට කෘත්‍රිම කලලයක් නිර්මාණය කිරීමට කේම්බි්‍රජ් විශ්වවිද්‍යාලයේ විද්‍යාඥයන් කණ්ඩායමක් සමත් වී තිබේ.

එම විශ්වවිද්‍යාලයේ මහාචාර්ය මැග්ඩලෙනා සෙන්රිකා ගොට්ස් (ර්චඨඤචතඥදච ඛඥදපඪජඬච ට්ධඥබල) ගේ නායකත්වයෙන් යුත් විද්‍යාඥ කණ්ඩායමක් විසින් මේ කලලය නිර්මාණය කර තිබේ.

පර්යේෂණය සඳහා මීයන් යොදාගෙන එම කෘත්‍රිම කලල දෙක නිර්මාණය කර ඇත.

ස්වාභාවික සංසර්ගයක් සිදු නොකොට කෘත්‍රිමව මාංස පේෂීන් සහ අස්ථීන් අඩංගු අංශු ශුක්‍රාණු සමඟ නිසි ලෙස සංයෝග කර කලලයේ පිහිටුවා මේ පරීක්ෂණය සිදු කළ බව මහාචාර්ය මැග්ඩලෙනා ප්‍රකාශ කරයි.

මේ කලල නිර්මාණයේ මීළඟ අදියර සඳහා මිනිසුන් භාවිත කිරීමට කටයුතු කරන බව මහාචාර්යවරිය පවසයි.

මහාචාර්ය මැග්ඩලෙනා ප්‍රකාශ කරනුයේ මනුෂ්‍ය කලලයක් නිර්මාණය කිරීමේදී විශාල පරිවර්තනයක් කිරීමට සිදුවන බැවින් මනුෂ්‍ය කලලයක් නිර්මාණය කිරීම සඳහා තවත් බොහෝ කාලයක් ගත වනු ඇති බවයි.

මේ පර්යේෂණ ක්‍රියාවලිය සාඵල්‍යතා ප්‍රතිකාර දියුණු කිරීම සඳහා ඉතාම වැදගත් පියවරක් වනු ඇති බවද මහාචාර්යවරිය සඳහන් කරන්නීය.

කෙසේ වුවද කෘත්‍රිම මනුෂ්‍ය කලලයක් නිර්මාණය කිරීමේ ක්‍රියාවලිය නීති මඟින් පාලනය කර සහ තහනම් කර ඇති බවද ඇය පවසන්නීය.

-රෝහණ බමුණුආරච්චි _මව්බිම

"ළෙන්ගතු ස්පර්ශ කිරීම්" වැඩි වශයෙන් සිදු කිරීම හේතුවෙන් ලිංගික සේවනයේ යෙදෙන පුද්ගලයෝ වඩාත් සතුටින් පසු වෙති.

වැඩි වශයෙන් ලිංගික සේවනයේ යෙදෙන පුද්ගලයන් වඩාත් සතුටින් පසුවීමේ නැඹුරුවක් පවතින බව අධ්‍යයනයකින් හෙළිව ඇතැයි ඉන්ඩිපෙන්ඩන්ට් පුවත්පත වාර්තා කරයි.

අධ්‍යයනය සඳහා පුද්ගලයන් හාරසිය දෙනෙකු සහභාගී වී ඇති අතර ලිංගික සේවනයේ යෙදෙන වාර ගණන, කොපමණ සතුටින් සිටීදැයි යන්න සහ ජීවිතයේ තෘප්තිමත්භාවය, සිය සහකාරිය හෝ සහකරු අතර කොපමණ ළෙන්ගතු ස්පර්ශ කිරීම් සිදු වනවා දැයි යන්න (තුරුළට ගැනීම, වැළඳ ගැනීම, සිප ගැනීම සහ එකිනෙකා ස්පර්ශ කර ගැනීම) පිළිබඳ ඔවුන්ගෙන් විමසා තිබේ.

-බීබීසී-

වසර මිලියන සිය ගණනකට පෙර මිහිමත විසූ ඩයිනෝසරයන්ගේ පෙනුම පිළිබඳ විවිධ මත පවතී.

අදින් වසර මිලියන 160 කට පෙර විසූ එක් ඩයිනෝසර විශේෂයකට, පක්ෂීන්ට සමාන හැඩයකින් යුත් පාද තිබී ඇති බව පොසිල අධ්‍යයන විද්‍යාඥයෝ පවසති.

පිහාටු සහිත එම විශේෂයට පක්ෂීන්ගේ පියාපත්වලට සමාන බාහු යුගලයක් පිහිටා තිබී ඇති බවත් විද්‍යාඥයන්ගේ මතයයි.

අදාළ ඩයිනෝසර විශේෂයේ හැඩරුව පිළිබඳ සැඟවුණු කරුණු අනාවරණය කර ගැනීම සඳහා විද්‍යාඥයන් විසින් ඉතා ප්‍රබල මට්ටමේ ලේසර් කිරණ යොදා ගත්හ.

වසර කෝටි පහළොවකටත් අධික කාලයකට පෙර විකාශනය වූ බවට විශ්වාස කෙරෙන පියාසර කිරීමේ මූලාරම්භය පිළිබඳ අදහසක් ලබා ගැනීමට එම අධ්‍යයනය උපකාරී වේ.

හොංකොං විශ්වවිද්‍යාලයේ මයිකල් පිට්මන් කියා සිටියේ අදාළ අධ්‍යයනය පක්ෂීන්ගේ මූලාරම්භය පිළිබඳ දැනට පවතින අවබෝධය කෙරෙහි බලපාන සන්ධිස්ථානයක් බවය.

"Anchiornis නමැති පිහාටු සහිත ඩයිනෝසරයෙකුගේ අස්ථි අතර සුරැකිව තිබූ ඇසට නොපෙනෙන ඉතා සියුම් පටක පිළිබඳ කරුණු අනාවරණය කර ගැනීම සඳහා අපි ඉතා ප්‍රබල මට්ටමේ ලේසර් කිරණ යොදා ගත්තා" ඔහු පැවසීය.

පක්ෂීන්ගේ මූලාරම්භය සිදු වූ බවට විශ්වාස කෙරෙන වකවානුවේ එනම් ජුරාසික් යුගයේ අග භාගයේ ඉහත කී ඩයිනෝසර විශේෂය චීනයේ විසූ බව විද්‍යාඥයෝ පවසති.
'Anchiornis' ඩයිනෝසරයන්ට පියාසර කිරීමේ හැකියාව තිබුණේ දැයි යන්න පැහැදිලි නොමැත.

(BBC)

සිය දිවි හානි කරගැනීමේ අවදානමක් ඇතැයි විශ්වාස කෙරෙන ගිණුම් හිමියන් හඳුනා ගැනීමට ෆේස් බුක් සමාගම නව තාක්ෂණික පද්ධතියක් (artificial intelligence) උපයෝගී කර ගැනීමේ වැඩ පිළිවෙලක් දියත් කරයි.

යමෙකු සිය ෆේස්බුක් ගිණුමේ කරන ප්‍රකාශ මෙන්ම ඊට ලැබෙන ප්‍රතිචාර සහ අදහස් දැක්වීම් විශේෂ ගණිතමය රීති පද්ධතියක් (algorithm) හරහා පරීක්ෂා කිරීම තුළින් සිය දිවි නසා ගැනීමට ඉඩ ඇති පුද්ගලයන් කළින් හඳුනා ගැනීමට උත්සාහ කිරීම ෆේස්බුක් සමාගමේ අරමුණය.

මෙම ව්‍යාපෘතිය හරහා මානුෂීය විමර්ශන කණ්ඩායමක් විසින් සිය දිවි නසා ගැනීමේ අවදානමක් පවතින ගිණුම් හිමියන් හඳුනාගනු ලැබීමෙන් අනතුරුව, ඔවුන් සම්බන්ධ කර ගනිමින් එම තත්වයෙන් මිදීමට අවශ්‍ය සහය ලබා දීමට ෆේස්බුක් සමාගම බලාපොරොත්තු වේ.

ෆේස්බුක් සමාගම හඳුන්වා දී ඇති එම විශේෂ ගණිතමය රීති පද්ධතිය මේවනවිට පරීක්ෂා කර තිබෙන්නේ ඇමෙරිකාව පමණි.

ෆේස් බුක් ගිණුම් හරහා කෙරෙන පළකිරීම් සහ අදහස් දැක්වීම් විශේෂ ගණිතමය රීති පද්ධතියක අධාරයෙන් වර්ග කිරීම තුළින් ත්‍රස්තවාදීන් විසින් පවත්වාගෙන යනු ලබන ගිණුම් හඳුනා ගැනීමට ක්‍රියා කරන බව ෆේස්බුක් නිර්මාතෘ මාර්ක් සකර්බර්ග් පසුගිය මාසයේ නිවේදනය කළේය.

ෆේස්බුක් ලයිව් උපාංගය හරහා සියදිවි නසා ගැනීමේ අවස්ථා මැඩලීමේ නව විධික්‍රම ප්‍රකාශයට පත් කරනු ලැබ ඇති ෆේස්බුක් කළමනාකාරිත්වය මේ වන විට ඇමරිකාවේ මානසික සෞඛ්‍ය ආයතන කීපයක් සමග සහයෝගයෙන් කටයුතු කරමින් සියදිවි නසා ගැනීමේ මානසික මට්ටමක සිටින ගිණුම් හිමියන් 'මැසෙන්ජර්' හරහා අදාළ සහන ආයතන වෙත යොමු කිරීමේ යෙදී සිටී.

(BBC)

මෝටර් රථ ධාවන තරගවලදී අපට හැම විටම තරග බිම දක්නට ලැබෙන්නේ මිනිසුන් සහිතව ධාවනය වන මෝටර් රථ පමණි. හැමදාම ඒ සම්ප්‍රදාය ඒ විධියටම පැවැතිය යුතුද?. මේ ප්‍රශ්නයට පිළිතුරක් සෙවූ නව නිර්මාණකරුවෝ පිරිසක් මෝටර් රථ ධාවන තරගවලදී ධාවන කළ හැකි අමුතු මාදිලියක මෝටර් රථයක් නිපද වූහ. මේ මෝටර් රථය හැඳින්වෙන්නේ “රොබෝ කාර්” යන නමිනි.

රොබෝ කාර් සතු කැපී පෙනෙනම විශේෂත්වය නම්, මෝටර් රථ ධාවන තරග බිමේදී රියදුරෙකු රහිතව තරග වදින්නට හැකි ආකාරයට නිෂ්පාදනය වී තිබීමයි. එමෙන්ම එය විද්‍යුත් බලයෙන් ධාවනය වන්නට ද හැකි අන්දමේ මෝටර් රථයක් වීමයි. රොබෝ කාර් බාර්සිලෝනාහි මොබයිල් වර්ල්ඩ් කොංග්‍රසයේදී පසුගියදා එළි දැක්විණ.

මෝටර් රථය එළි දැක්වීමේදී, මෝටර් රථයේ සුවිශේෂ ලක්ෂණ අනාවරණය කරන්නට නිර්මාණකරුවෝ අමතක නොකළහ. ඔවුන් කියා සිටියේ මේ මෝටර් රථය කිලෝ ග්‍රෑම් 975ක් පමණ බරැති එකක් බවයි. මෝටර් රථයේ දිග මීටර 4.8ක් පමණ වේ. එය මීටර 2ක පමණ පළලකින් යුතු එකකි. රොබෝ කාර්, මෝටර් හතරකින් ධාවනය වන අන්දමට නිර්මාණය කර තිබේ.

ඒ සෑම මෝටරයක්ම කිලෝවොට් 300ක ධාරිතාවකින් යුක්ත ඒවා බව සඳහන් වේ. රේඩාර් පද්ධති, සංවේදක සහ කැමරා රැසක් මෝටර් රථයේ පාලනය සඳහා සවි කර තිබේ. මෝටර් රථයේ ධාවන කටයුතු වඩාත් තියුණුව කරගෙන යාමට නවතම මාදිලියේ කෘත්‍රිම බුද්ධි කට්ටලයක් සවිකර ඇත. මේ සියලු පහසුකම් හේතුවෙන් මෝටර් රථයට අංශක 360ක පරාසයේ පවතින දත්ත වරකට ඉතා හොඳින් ග්‍රහණය කරගන්නට ඉඩ ලැබෙන බව නිර්මාණකරුවෝ පවසති. එමෙන්ම පැයට කිලෝමීටර 320ක (පැයට සැතපුම් 200ක) පමණ වේගයකින් මෝටර් රථයට ගමන් කරන්නට හැකියාව ඇත.

රොබෝ රේස් යන නමින් නම් කරන ලද මෝටර් රථ ධාවන තරග විශේෂයක් ඉදිරියේදී හඳුන්වා දීමට බලාපොරොත්තු වේ. එකී මෝටර් රථ ධාවන තරග පැවැත්වෙන්නේ රොබෝ රේස් වර්ගයේ මෝටර් රථ අතර පමණි. තරගය සඳහා විවිධ මෘදුකාංග ඇතුළත් කර සකස් කරන ලද විවිධ මාදිලියේ මෝටර් රථ ඉදිරිපත් කෙරෙනු ඇත.

ඒ මෝටර් රථ සියල්ලක්ම මනුෂ්‍යයයන්ගේ මැදිහත් වීමෙන් තොරව ධාවනය වන ඒවාය. එනිසා නුදුරු අනාගතයේදී, මෝටර් රථ ධාවන තරග බිමේදී තරග වදින මෝටර් රථ මිස තරග වදින මනුෂ්‍යයින් දකින්නට නොලැබෙනු නිසැකය.

රොබෝරේස් සමාගමේ ප්‍රධාන විධායක නිලධාරි ඩෙනිස් ස්වර්ඩ්ලොව් මේ ගැන පවසන්නේ මෙවැන්නකි. “.... මේ මෝටර් රථය නිෂ්පාදනය කිරීම රොබෝරේස් සමාගම කරන ලද විශාල කාර්යයක් ලෙස සලකන්න පුළුවන්. මේ මාදිලියේ මෝටර් රථ භාවිතය ලෝකයේ සෙසු රටවල් සමඟ බෙදා හදා ගන්න ඉදිරියේදී අපි බලාපොරොත්තු වෙනවා.

රියදුරෙකු රහිතව විදුලි බලයෙන් ධාවනය වන මෝටර් රථ, මොර්ටර රථ ධාවන තරග බිමට එකතු කිරීම අති දැවැන්ත පියවරක් ඉදිරියට තැබීමක් හැටියට සලකන්න පුළුවන්. මිනිසුන් හා රොබෝවරුන් සමීප වීම මේ හරහා ඉදිරියේදී තව දුරටත් සිදු වෙයි. ...”

මෝටර් රථයට නිර්මාණ දායකත්වය ලබා දුන් ඩැනියෙල් සිමොන් පවසන්නේ මෝටර් රථ ධාවන තරග ඉතිහාසය අලුතින් ලියන්නට ඔවුන් කළ මේ නිර්මාණය සමත්වනු ඇති බවය.

Robot-Car-02.jpg

-මංජුලා විජයරත්න-mail online ඇසුරෙනි_දිනමිණ

පොඩි කාලෙ ඉඳලා මේ වනකොට කඩදාසි කොතරම් ප්‍රමාණයක නම් ලියලා ඇතිද කියලා කල්පනා කරගෙන යද්දී ඒ සඳහා පරිසරයෙන් ඉවත් කෙරුණු ගස් ප්‍රමාණය මතක් වෙලා සිහිසුන් වෙන්න වුණත් පුළුවන්. දැන් නම් කෘත්‍රීමව හෝ ඉවතලන දේවල්වලින් කඩදාසි හැදුවත් ඒ කාලේ පොත්වල තිබිලා පිදුරුගස් හමුවෙන හැටි ඔබට අමතක නැතුව ඇති. හරිනම් ශාක සංහතියේ නාමයෙන් විභාග තහනම් කරන්න ඕනා.

මොකද ඒවාට කොළ ගොඩක් වැය වෙන නිසා. සටහන් තබා ගන්න අවශ්‍ය නිසා, පසු කාලීනව වුණත් බලන්න හැකි නිසා පොත්වල වැරැද්දක් කියන්නට බැහැ. එනමුත් සටහන් ලියන කුඩා පොත, තවත් විදියකට කිව්වොත් කටු වැඩ පොත, ගෙදර වැඩ ලියන පොත ආදී වශයෙන් අපිට අමතක වෙන ඒවා සටහන් කරගන්නට පොඩි පොතක් තිබුණා. මේක බොහොම ඉක්මණට ඉවර වෙනවා විතරක් නෙවෙයි, අලුත් එකක් ගන්න කියලා මතක් වෙන්න ලියා ගන්නත් අන්තිමට පොතක් නැති වෙනවා.

තාක්ෂණය කොතරම් දියුණු වෙලාද කියනවා නම් මේ වන විට මැකිය හැකි සටහන් පොතක් දැන් තිබෙනවා. ඒ කියන්නේ, පොත ඉවර වුණාම ඒක විසි කරන්නට ඕන නැහැ. ඒ වෙනුවට පොතේ ලියපුවා මකලා දාලා ආයෙත් මුල ඉඳලා ලියන්න පටන් ගන්න පුළුවන්.

රොකට් බුක් සමාගම විසින් එළි දක්වන මෙම එවර්ලාස්ට් නෝට් බුක් නමැති සටහන් පොත ගැන නිෂ්පාදකයන්ගේ වචනයෙන් ම කියනවා නම්, එය හුදෙක් සාම්ප්‍ර‍දායික වයිට් බෝඩ් එකක් නෙවෙයි. කෙරෙන දේ එක ම වුණත් මින් ලැබෙන අත්දැකීම සාමාන්‍ය පොතක ලියනවා වගේ ම රළු පෘෂ්ඨයක වියළි තීන්තෙන් ලිවීම තමයි. එකම වෙනස, සාමාන්‍ය පෑනකික් සහ පොතක ලියනවා මෙන් නොව ලියන දේ මකා දැමීමට ද හැකි වීමයි. මෙහි පිටු කෘත්‍රීම පොලියස්ටර්වලින් ඉතා සුමට මතුපිටක් ඇති පරිදි සකසා තිබෙනවා.

අකුරු ලිවීමේ මෙන් ම චිත්‍ර‍ හෝ කටු සටහන් ඇඳීම ද පහසු කරවමින් එහි තනි රූල් වෙනුවට තිත් මඟින් එකට සම්බන්ධ නොවුණු කොටු දැලක් ආකාරයට සකසා තිබෙන නිසා නිර්මාණකරණයේදී සහ සැලසුම් ශිල්පයේදී පරිමාණ ගැනීමට එය වඩාත් පහසුවක් වෙනවා. එවර්ලාස්ට් සටහන් පොත් සමඟ පයිලට් ෆ්‍රික්ෂන් නම් තීන්ත මැකීම සඳහා නම් දරා ඇති වෙනත් සමාගමක පෑනක් ද ලැබෙනවා. එම පෑන්වල උෂ්ණත්ව සංවේදී තීන්ත ඇති අතර සාමාන්‍ය කඩදාසියක වුව ද ලියා මකනයකින් තදින් මැකීමෙන් එය ඉවත් කර ගන්නට පුළුවන්.

ඒත් එය තාවකාලිකයි. උෂ්ණත්වයේ ප්‍රබල වෙනස්කම් සමඟ එසේ මකා දමන ලද දේවල් නැවත මතු විය හැකි අතර ඔබ කොළවල අත තදින් ලියන කෙනෙක් නම් තීන්ත ගැඹුරට කා වදින නිසා මකනයෙන් මැකීමේදී ඝර්ෂණය නිසා හට ගන්නා තාපය ගැඹුරට ළඟා වන ප්‍රමාණය අඩු නිසා මැකී යන්නේත් නැහැ. හැබැයි ජාඩියට මූඩිය වගේ පෑනට එවර්ලාස්ට් කොළේ ලැබුණම අඩුපාඩුත් මැකිලා ගිහින් අකුරුත් මකන්නට හැකි ආකාරයේ පොරොන්දම් ගැලපීමක් සිද්ධ වෙනවා.

පයිලට් ෆ්‍රික්ෂන් කියන්නේ අපි සාමාන්‍යයෙන් දන්න ජෙල් පෑනක් වගේ ම තීන්ත සහිත පෑනක්. ඒ කිව්වේ, බොල්පොයින්ට්වලින් ලීවාම ක්ෂණිකව වියළී ගියත් සුමට පොත්වල ජෙල් පෑනකින් ලිව්වාම බොඳවී යාම්, වේලීමට කල් ගත වීම නිසා භාවිත අපහසුතා ආදිය ඇති වෙන්න පුළුවන්නේ. නමුත් මේ කඩදාසිය මතදී එවන් සංසිද්ධියක් සිදුවන්නේ නැහැ. ලියා මොහොතකින් එය ඇඟිල්ලෙන් පිසදැම්මත් තීන්ත කොළය පුරා ගෑවෙන්නේ නැහැ. මෙය මකන්නට නම් තෙත මාත්තු කරන ලද රෙදි කඩකින් පිස දැමිය යුතු වෙනවා.

අපි හැමදාම ස්මාර්ට් දේවල් ගැන කතා කරනවානෙ. ඉතින් ඔබ බලනවා ඇති කෝ මේක මේ නිකංම නෝට් පොතක් ද කියලා. ඔන්න ස්මාර්ට් සමර්ථකම් ගැන කියන්න දැන් තමයි වෙලාව. එවර්ලාස්ට් සටහන් පොත සාමාන්‍ය පොතක්. පෑනත් එහෙම යි. නමුත් මේ සමඟ අපූරු ඇප් එකක් ඇපල් සහ ඇන්ඩ්‍රොයිඩ් දුරකතන සඳහා ඔවුන් ලබා දී තිබෙනවා. එයට ඔබ සටහන් පොතට යොමු කළාම ඒවා ස්කෑන් කරලා ඡායාරූප ආකාරයට ගබඩා කරගන්නට හැකියාව තිබෙනවා. සාමාන්‍යයෙන් අපි කොළයක ඡායාරූපයක් ගන්න ගියාම එක්කෝ අත ඇද වෙනවා, ආලෝක තත්ත්වවල ප්‍ර‍ශ්න, පොතත් එක්ක අවට මේසයේ තිබෙන දේවල් එක්ක බාධා රැසකට මුහුණ දෙන්නට සිදු වෙනවා. ඒත් මේ පොතේ කොළය වටේට කළු පැහැති දාරයක් යොදා තිබෙනවා.

එමඟින් ඇප් එකට පිටුවේ හතර මායිම හොඳින් හඳුනා ගැනීමට හැකි වන නිසා එකවරම ගොඩැල්ලේ තරම දැනගෙන වළ කපන්නට, අනවශ්‍ය බාහිර පසුබිම රහිතව පැහැදිලි ඡායාරූපයක් ලබා ගන්නට හැකියාව තිබෙනවා. එසේ ම ඔබ පොතේ පිටු කුමන පිළිවෙළට ඡායාරූපගත කළත් ඒවා පොතේ පිටුවල පිළිවෙළට ම සකසා ගන්නටත් ඇප් එකට පුළුවන්. ඒ හැකියාව ඊට ලබාදී තිබෙන්නේ පොතේ සෑම පිටුවකම කොනක තිබෙන QR කේතය හරහා යි. එහි පිටු අංකය ඇතුළත් කර තිබෙනවා.

ඔබ ලබා ගත් ඡායාරූප ගූගල් ඩ්‍රයිව්, ඩ්‍රොප් බොක්ස් ආදී අන්තර්ජාල ගොනු ගබඩා කිරීමේ සේවාවන් හතකට යොමු කරන්නටත් පුළුවන්. ඒ සඳහා ඔබට කරන්නට තිබෙන්නේ පොතේ පිටුවල යටින් තිබෙන එම අයිකන හතෙන් ඔබට අවශ්‍ය ඒවා මත කතිරයක් යොදා තෝරා දීමයි. ඉතින් ඔබ සටහන් ගන්නා අතරතුරේම ඒවා ගබඩා විය යුතු ස්ථානයත් ලබා දෙන අතර පසුව ගෙදර ඇවිත් ස්කෑන් කළ වහා ඔබ එසේ සලකුණු කළ ඒවාට අදාලව යොමු කරන්නට ඇප් එක සමර්ථකම් දක්වනවා.

මේ වසරේ මැයි මාසයේදී වෙළෙඳපොළට නිකුත් කිරීමට නියමිත මෙම අපූරු නිෂ්පාදනය තැපැල් ගාස්තු රහිතව රුපියල් පන්දහසකට මිල කර තිබෙන අතර එම පැකේජයට පෑනක් ද අඩංගු කර තිබෙනවා.

ඉතින්, ජලයට සහ උග්‍ර‍ පාරිසරික තත්ත්වවලටත් ඔරොත්තු දෙන, ජීවිත කාලයේ ම ලියන්න පුළුවන් මේ පොතේ ‘අ’යන්න පුරුදු වෙන්න වගේ ම පස්සෙ කාලෙක අවසන් කැමති පත්‍රයත් ලියලා එ්කෙන් ම තමන්ගේ දරුවෙක්ට පොත පවරන්නත් ඔබට පුළුවන්.

_දිනමිණ

ඔබේ දරුවාට හොඳ උපදේශකයෙක් ලෙස ක්‍රියාකළ හැකි වීම කෘතිම බුද්ධියේ නවතම වර්ධනයයි. මිත්‍රශීලි රොබෝවරයකුගේ පෞරෂත්වය මඟින් දරුවන්ගේ හැසිරීමට බලපෑම් කිරීමේ හැකියාවක් ඇති බව පර්යේෂණාත්මක අධ්‍යයනයකදී හඳුනාගෙන ඇති බව වාර්තා වේ. උදාහරණයක් ලෙස මෙම අධ්‍යයනයේදී උද්යෝගීමත් හෝ මධ්‍යස්ථ (උදාසීන) වැනි පෞරෂයන් ඇති රොබෝවරු සමඟ ක්‍රීඩාවේ යෙදීමෙන් දරුවන් විවිධ ක්‍රියාකාරකම් වල වැඩි කාලයක් ගත කිරීමට මෙන්ම ඒ සඳහා අමතර ජවයක් යෙදවීමටද යොමුවන බව පැහැදිලි වී තිබේ.

මේ සඳහා Tega නම් මිත්‍රශීලි රොබෝවරයෙක් භාවිතා කරමින් පර්යේෂණ මාලාවක් දියත් කරමින් අධ්‍යනය සිදු කර ඇත. දරුවන්ගේ හැසිරීම සඳහා Tega ගේ පෞරෂත්වය කෙසේ බලපාන්නේ දැයි දැන ගැනීම සඳහා විවිධාකාර ප්‍රතිචාර දැක්විය හැකි ලෙස Tega ක්‍රමලේඛ කර තිබේ.

පර්යේෂණ මඟින් අපේක්ෂා කළ අවසාන ජයග්‍රහණය නම් දරුවන් තුල සෙමින් ඇතිකර වර්ධනය කළ යුතු ගුණවත් හා නැණවත් චර්යාවන් දරුවාට ලබා දිය හැකි මිතුරෙකු නිර්මාණය කිරීම බව පර්යේෂණ කණ්ඩායමේ සාමාජික හා ඊශ්‍රායලයේ ටෙල්අවිව් විශ්ව විද්‍යාලයේ Goren Gorden ප්‍රකාශ කරයි.

දරුවන් 40 ක් Tega සමඟ ප්‍ර‍හේළිකා තරඟයකට සහභාගි විය. ඉන් ළමයින් 20 ක් ඉදිරියේTega උදාසීන (මධ්‍යස්ථ) පෞරෂත්වයක් ඇතිව තරඟ කරන ලදි. එනම් තරඟයෙන් Tegaජයගත් විට “මම ගැටළුව විසඳුවා” ලෙසද, පරාජය වූ විට “ඒක හරි අමාරුයි” යන වදන් වලින් ප්‍රතිචාර දක්වන ලදි. එහෙත් ඉතිරි දරුවන් ඉදිරියේ Tega වඩා තරඟකාරි ස්වරූපයකින් (උද්යෝගිමත්) තරඟ කරමින් ජයග්‍රහණය කල විට “ඒක හරි අමාරුයි ඒත් මම හොඳින් උත්සහ කර ඔබව පරාජය කළා” යැයිද Tega පරාජය වූ විට “ඔබ බොහොම හොඳින් තරඟ කර මා පැරදුවා” යැයිද ප්‍රකාශ කරන ලදි.

Tega ගේ මෙම විවිධ වදන් ප්‍රතිචාර මඟින් හැසිරීමේ වෙනස පැහැදිලි කිරීමට අපහසු වුවත් එමඟින් වූ බලපෑම අනුව දරුවන්ගේ ප්‍රතිචාරය පැහැදිලිව හඳුනාගත හැකි විය. දෙවන කණ්ඩායමේ දරුවන් වඩා වැඩි උත්සහයකින් තරඟ කළ අතර පරාජය වූ විට ජයග්‍රහනය සඳහා වූ ඔවුන්ගේ අධිෂ්ඨානය වැඩි වූ බවද මැසචුසෙටිස් (Massachusetts) තාක්ෂණ ආයතනයේ Hae Won Park පවසයි. ඔහු මෙම අධ්‍යයන කණ්ඩායමේ මූලිකයාය.

දරුවන් කතන්දර අසා සිට කතාව තුල ජීවත් වීමට පටන් ගන්නා විට ඔවුන් මවට හෝ කතාන්දරය පවසන්නා දෙසට වඩාත් ළං වෙමින් කතාන්දර කරු (මව) දෙස ඉතා ආශාවෙන් බලා සිටින බව නිරීක්ෂණය කල හැකිය. කෙසේ වෙතත් ඒ ආකාරයෙන් රසවත් ලෙස කතාන්දර කීමට සැමටම නොහැකිය. එහෙත් රසවත් ලෙස කතාන්දර කීම දරුවාට ඉතා වැදගත් වේ.

මේ අනුව දෙපසින් සිටින් වර්ග දෙක එහෙත් පෙනුමින් එකහාසමාන Tega රොබෝවරුන් දෙදෙනකුට කතාන්දරයක් කීමට දරුවන් යොමු කරන ලදි. දරුවා කතාන්දරය රසවත් කර කියන විට දකුණු පස සිටි Tega කතාන්දරය තුල ජීවත් වන දරුවකු සේ පෙර සඳහන් කළ පරිදි විවිධ ප්‍රතිචාර දක්වමින් දරුවාගේ කතාන්දරය අසා සිටියේය. වම් පසින් සිටි Tegaවිශේෂ ප්‍රතිචාර නොමැතිව කතාව අසා සිටියේය. පසුව කළ විමසුමේදී දරුවන් දකුණු පස සිටි Tega ට කතාන්දර කීමට බොහෝ කැමැත්තක් දැක්වූ අතර දරුවා කෙරෙහි Tega ගේ දැඩි අවධානය නිසා දරුවා දිගු කථා කීමටත්, සංකීර්ණ දෙබස් භාවිතා කරමින් තම ශබ්ද කෝෂය වර්ධනය කර ගැනීමටත් උත්සහ කළ බව පැහැදිලි විය.

අන්තර්ජාලයේ පිළිගත් විද්‍යාත්මක ප්‍රභව ඇසුරෙණි. - vidathanet

Education News

Image

Stats

There are 28560 listings, 863 categories and 102 owners in our website