Friday, 11 October 2019 10:08

අපේ එකමුතුකම ඇත්නම් තව මොනවද කරන්න බැරි?

කණ්ඩායමක් තුල එකමුතු කම හා ආත්ම විශ්වසය ඇත්නම් ලොකු ගමනක් යා හැකි බව තමන් තරයේ විශ්වාස කරන බව පාකිස්තානය පරදවා විස්සයි 20 තරගාවලිය 3-0ක් ලෙස ජයගත් ශ්‍රී ලංකා ක්‍රිකට් නායක දසුන් ශානක පවසයි.

අනු හයේ ලෝක කුසලානය දිනාගත් ලාහෝර් පිටියේදී පාකිස්තානය පරදවා ලැබූ ඓතිහාසික ජයග්‍රහණය වැටී තිබූ ශ්‍රී ලංකා ක්‍රිකට් ක්‍රීඩාව නැවැත ජයග්‍රාහී මාවතට යොමු කිරීමක් බව ශ්‍රී ලංකා විස්සයි 20 නායකයාගේ අදහසවී තිබේ.

“තරග ජය ගන්න නම් ආත්ම විශ්වාසය ඉතා වැදගත්. දැන් බිය චකිතය තරුණ ක්‍රීඩකයන් තුළ නෑ. කණ්ඩායම තුළ එකිනෙකා අතර විශ්වාසය ගොඩනැගී තිබූ නිසා නායකයෙකු විදිහට මට පීඩනයක් තිබුණේ නෑ. එකමුතු කමයි ආත්ම විශ්වසයයි ඇත්නම් අපට මොනවද කරන්න බැරි” දසුන් ශානක පැවැසීය.

“ක්‍රීඩා පිටිය ඇතුලේ විශේෂ දේවල් කතා කරන්න තිබුණේ නෑ. ටීම් මීටින් එකේ කතා කළ දේ ක්‍රියාවට නගන්න පමණයි තිබුණේ. පාකිස්තානය පන්දුවට පහර දෙද්දී අපි ඔවුන්ව පස්සට අදින්න අදින්න ඔවුන්ගේ ලකුණු වේගය ඉහළ ගියා. ලෝක කුසලානයක් දිනාගත් ක්‍රීඩා පිටියෙන්ම යළිත් නැගී සිටීමට හැකිවීම විශාල ආශිර්වාදයක් කියා හිතනවා. මේ නැගී සිටීමත් සමග ශ්‍රී ලංකාවේ ජනතාව දැන් ක්‍රිකට් වලට ආදරය කරයි” හෙතෙම විශ්වාසය පළ කළේය.

සංචාරක ශ්‍රී ලංකාව හා පාකිස්තානය අතර විස්සයි 20 තරගාවලිය ජය ගැනීමෙන් අනතුරුව ලාහෝර් ක්‍රීඩා පිටියේදී පුහුණුකරු රොමේස් රත්නායක මහතා ද සහභාගී වූ විශේෂ මාධ්‍ය හමුවකදී මේ බව සඳහන් කළේය.

මේ මාධ්‍ය හමුවේදී ශ්‍රී ලංකා ක්‍රිකට් නායකයා හා පුහුණුකරු යන දෙදෙනාම විදෙස් ක්‍රීඩකයන් සහභාගීවන ශ්‍රී ලංකා ප්‍රීමියර් ලීග් තරගාවලියක අවශ්‍යතාව පිළිබඳ ශ්‍රී ලංකා මාධ්‍යවේදීන්ට කරුණු හෙළි කළහ. ජාත්‍යන්තරය සමග කරට කර සිටින හොඳම විස්සයි 20 කණ්ඩායමක් ශ්‍රී ලංකාවෙන් බිහි කර ගැනීමට නම් එම අඩුපාඩුව සම්පූර්ණ විය යුතු බව ඔවුහූ පැවැසූහ.

“ඉදිරියේදී ලෝක කුසලාන තරගාවලි දෙකක් අපට මුහුණ දෙන්න තියෙනවා. ක්‍රිකට් ගහන හැම රටකම විදෙස් ක්‍රීඩකයන් සහභාගීවන ප්‍රීමියර් ලීග් තරගාවලි පැවැත්වෙනවා. අපේ ක්‍රීඩකයන් මේ තරම් හොඳට කළත් වෙනත් රටවල් අපේ ක්‍රීඩකයන් තුන් හතර දෙනෙකු හැරෙන්න ගන්නේ නෑ. එහෙම වෙන්නේ අපේ රටේ ඒ වගේ තරගාවලියක් නැති නිසයි. පාසල් වියේ සිට ඉදිරියට එන ක්‍රීඩකයන් ක්‍රීඩා සමාජවලට ක්‍රීඩා කොට පසුව ශ්‍රී ලංකාව අත් හැර වෙනත් රටවලට යන්නේ ඔවුන්ට නිසි තැනක් නොළැඹෙන නිසයි. අපේ ගොඩක් ක්‍රීඩකයෝ අද ඉන්නේ ඔස්ට්‍රේලියාවේ. ඒ අයගෙන් යම් අදහසක් ගන්නවත් තරුණ ක්‍රීඩකයන්ට අවස්ථාවක් නෑ. අන්තර්ජාතික මට්ටමේ තරග ක්‍රීඩා කළොත් පමණයි ඒ අත්දැකීම ගන්න පුලුවන් වෙන්නේ” දසුන් ශානක පැවැසීය.

“මා ගොඩක් මහන්සියෙන් තමයි ක්‍රිකට් ක්‍රීඩාවේ යෙදී ඉන්නේ. මා එය අත්දැකීමෙන් දන්නවා. රටක ප්‍රීමියර් ලීග් තරගාවලියක් පැවැත්වුණාම ඒ රටේ ක්‍රීඩකයන් ඉදිරියට එනවා වාගේම වෙනත් රටවල් ඔවුන්ව තරගවලට ගෙන්වා ගන්නවා. පසුගිය කාලයේ ඒ අඩුව ගොඩක් තදින් දැනුණා. අපි දිගින් දිගටම තරග පරාජය වන්නත් මේක හේතුවක්. මොකද එක් කණ්ඩායමක් විතරයි ගහන්නේ අනිත් ක්‍රීඩකයන්ගේ දක්ෂතා දකින්නේ නෑ. පාකිස්තානයට තරුණ කණ්ඩායමක් අවේ නැත්නම් මේ මුහුණු කවදාවත් දකින්න ලැබෙන්නේ නෑ. මාගේ අදහස මේ දක්ෂතා හැමෝම දකින්න අවශ්‍ය බවයි. ලසිත් මාලිංග, තිසර පෙරේරා, සීකුගේ ප්‍රසන්න හා දික්වැල්ල වැනි කිහිප දෙනකු පමණයි වෙනත් රටවල ප්‍රීමියර් ලීග් ගන්නේ. මේ තත්ත්වය වඩාත් පුලුල් කරන්න නම් අපට විස්සයි 20 ප්‍රීමියර් ලීග් තරගාවලියක් අවශ්‍යමයි” දසුන් ශානක පැවැසීය.

මේ පිළිබඳ පුහුණුකරු රොමේෂ් රත්නායක මහතා ද ඒ හා සමාන අදහසක් පළ කළේය. “එවැනි උසස් මට්ටමේ තරගාවලියක් තිබුණා නම් ඉතා හොඳ දෙයක්. 2011දී අපේ රටේ එවැනි තරගාවලියක් පැවැත්වූවා. මා දන්නේ නෑ ඉන් පස්සේ එවැනි තරගාවලියක් පැවැත්වීමට අපට හැකියාවක් නැත්තේ ඇයි කියා. ශ්‍රී ලංකා ක්‍රිකට් ඉදිරියේදී මේ ගැන යමක් කරයි” ශ්‍රී ලංකා පුහුණුකරු සඳහන් කළේය.

(Dinamina)

Sports News

Stats

There are 28560 listings, 863 categories and 102 owners in our website