අමෙරිකා එක්සත් ජනපද ගුවන් හමුදාව ශ්‍රී ලංකාවට පරිත්‍යාග කරන Beechcraft King Air 360ER ගුවන් යානය එළඹෙන ජූනි මාසයේදී මෙරටට ගෙනඑන බව ද ඔස්ට්‍රේලියානු ගුවන් හමුදාව පරිත්‍යාග කරන Beechcraft King Air 350 වර්ගයේ ගුවන් යානය ඒ අනුව එළඹෙන මැයි මාසයේ දී මෙරටට ගෙනඑන බව ද සඳහන් කරන ඒ මහතා මෙම ගුවන් යානා අලුත්ම තත්ත්වයේ ගුවන් යානා බව ද කීවේය.
මෙම ගුවන් යානා ලබාදීම සම්බන්ධයෙන් සාකච්ඡා කිරීම සඳහා තමා පසුගිය දා සිංගප්පූරුවේ සංචාරයක නිරත වූ බව සඳහන් කළ ගුවන් හමුදාපතිවරයා එහි දී සාකච්ඡා වට තුනකට සහභාගි වූ බව ද C130 වර්ගයේ ගුවන් යානා දෙකක් ශ්‍රී ලංකා ගුවන් හමුදාවට ලබාදෙන ලෙස එම සාකච්ඡා අතරතුර අමෙරිකා එක්සත් ජනපදයෙන් ඉල්ලීමක් කළ බව ද සඳහන් කරයි. මේ අතර මෑතක දී ශ්‍රී ලංකාවට පැමිණි අමෙරිකානු රාජ්‍ය තාන්ත්‍රිකයන් සහ ජනාධිපති රනිල් වික්‍රමසිංහ මහතා අතර පැවැති සාකච්ඡා අතරතුර ගුවන් යානයක් ශ්‍රී ලංකාවට ලබාදෙන බවට ප්‍රකාශයක් කළ බව ද ඒ මහතා සිහිපත් කළේය.
කෙසේ වුවද මෙම ගුවන් යානා ශ්‍රී ලංකාවට ලබාදීම සම්බන්ධයෙන් වන රාජ්‍ය තාන්ත්‍රික සාකච්ඡා බෙහෙවින්ම සාර්ථක මට්ටමක පවතින බව පෙන්වාදුන් ඒ මහතා මෙම ගුවන් යානා ලැබෙන්නේ නම් එක් යානයක් හෝ එක්සත් ජාතීන්ගේ සාමසාධක රාජකාරි සඳහා යෙදවිය හැකිවන බව ද අමෙරිකාවෙන් ඉල්ලා තිබෙන C130 වර්ගයේ ගුවන් යානා දෙක ඉතාම සාධාරණ මිලකට ලබාගැනීම වෙනුවෙන් සාකච්ඡා කරගෙන යන බව ද පෙන්වා දුන්නේය. මේ අතර ඉන්දියාව ද මෑත කාලයේ ගුවන් යානයක් ශ්‍රී ලංකා ගුවන් හමුදාවට ලබාදුන් බව සිහිපත් කළ උදේනි රාජපක්ෂ මහතා එය අගය කළයුතු බව ද පැවැසීය.
DMN