ඒ අනුව ණය තිරසරභාවය ඇති කිරීමේ තවත් පියවරක් සම්පූර්ණ කරමින් ජාත්‍යන්තර ස්වෛරීත්ව බැඳුම්කර හිමියන්ගේ කමිටුව සමඟ ණය ප්‍රතිව්‍යූහගතකරණය පිළිබඳ අවසන් එකඟතාවට පැමිණි බව මුදල් රාජ්‍ය ඇමැති ශෙහාන් සේමසිංහ ප්‍රකාශ කරයි.
අමෙරිකානු ඩොලර් බිලියන 37ක් වන මුළු විදේශ ණය ප්‍රමාණයෙන් ඩොලර් බිලියන 12.5කට අදාළ ප්‍රතිව්‍යූහගතකරණය සිදුවීමට නියමිතව තිබෙන බව පෙන්වාදෙන ඇමැතිවරයා මෙම එකඟතාවන් තිරසාර ඉලක්කවලට අනුකූල වීම තක්සේරු කිරීම සඳහා නිල ණයහිමි කමිටුවේ සහ ජාත්‍යන්තර මූල්‍ය අරමුදලේ අනුමැතිය අවශ්‍ය බව ද පෙන්වා දෙයි.
ගෝලීය වශයෙන් පිළිගත් ප්‍රතිසංස්කරණයන් ක්‍රියාත්මක කිරීමට ශ්‍රී ලංකාව ගත් පියවර හේතුවෙන් මෙම එකඟතාවන් ඇති වූ බව ද ශෙහාන් සේමසිංහ මහතා පවසයි.
වසරකට වැඩි කාලයක් පැවැති සාකච්ඡාවලින් අනතුරුව මෙම එකඟතාවට පැමිණ තිබෙන අතර ඒ අනුව ජාත්‍යන්තර බැඳුම්කරවල සියයට 28ක නාමික අඩු කිරීමකට ණය හිමියන් එකඟ වී ඇත. ජාත්‍යන්තර බැඳුම්කර ප්‍රතිව්‍යූහගත කිරීම ජාත්‍යන්තර මූල්‍ය අරමුදල මඟින් ශ්‍රී ලංකාවට ලබා දී ඇති ප්‍රධාන කොන්දේසියක් වන අතර ශ්‍රී ලංකාව ද්වීපාර්ශ්වීය ණය හිමියන් සමඟ ණය ප්‍රතිව්‍යූහගතකරණ ක්‍රියාවලිය සඳහා මේ වන විටත් ගිවිසුම් අත්සන් කර තිබේ. මේ අතර 2024 විමධ්‍යගත අය-වැය වැඩසටහන යටතේ අනුමත කරන ලද සියලු ව්‍යාපෘති අගෝස්තු 31 වැනි දිනට පෙර අවසන් කළ යුතු බව ද මුදල් අමාත්‍යාංශය කියයි.
DN