මෙම අවබෝධතා ගිවිසුම් ශ්‍රී ලංකාවේ සංචාරක කර්මාන්තයේ අනාගත දිශානතිය ප්‍රස්ථාරගත කිරීම අරමුණු කරගනිමින් අත්සන් කිරීම සංචාරක, ඉඩම් සහ ක්‍රීඩා, යෞවන කටයුතු අමාත්‍ය හරීන් ප්‍රනාන්දු මහතාගේ ප්‍රධානත්වයෙන් සිදුවිය.
සංචාරක ක්ෂේත්‍රය ශක්තිමත් කිරීම වෙනුවෙන් සෞඛ්‍ය අමාත්‍යාංශය, බුද්ධ ශාසන අමාත්‍යාංශය, ආගමික හා සංස්කෘතික කටයුතු අමාත්‍යාංශය, නාගරික සංවර්ධන සහ නිවාස අමාත්‍යාංශය, වනජීවී හා වන සම්පත් සංරක්ෂණ අමාත්‍යාංශය යන ආයතන සමඟ සහයෝගීතාවයෙන් මෙම අවබෝධතා ගිවිසුම් අත්සන් කිරීම සිදුවිය.
ගිවිසුම් යටතේ මුල පිරීම් ක්‍රියාත්මක කිරීම සඳහා ශ්‍රී ලංකා සංචාරක සංවර්ධන අධිකාරිය (SLTDA) විසින් රුපියල් මිලියන 113 ක් වෙන් කර ඇත.
අවබෝධතා ගිවිසුම්වල දක්වා ඇති ප්‍රධාන මුල පිරීම් අතරට සෞඛ්‍ය අමාත්‍යාංශයේ සහාය ඇතිව ශ්‍රී ලංකා සංචාරක සංවර්ධන අධිකාරිය (SLTDA) විසින් මූලිකත්වය ගෙන මෙරට සංචාරක ක්ෂේත්‍රය ශක්තිමත් කරමින් විදෙස් සංචාරකයින්ගේ සෞඛ්‍යමය ආරක්ෂාව සැලසීම අරමුණු කරගනිමින් සංචාරකයන් සඳහා විශේෂිත ගෙවන සෞඛ්‍ය වාට්ටු සංවර්ධනය කිරීම සඳහ ගිවිසුම්ගත වීම සිදුවිය.
මෙම ගීවිසුම් ගතවීම අනුව අවම සෞඛ්‍ය පහසුකම් සහිත රෝහල් 04 කට මූල්‍ය පහසුකම් සපයා සංචාරකයින්ට ඔබින සුවපහසු ගෙවන වාට්ටු ස්ථාපිත කිරීම සිදුවේ. ඒ අනුව දඹුල්ල, බණ්ඩාර‌‌වෙල, පොතුවිල් සහ තිස්සමහාරාම රෝහල් සංවර්ධනය කිරීමට නියමිත අතර, ඉහත සදහන් එක් රෝහලක සුවපහසු ගෙවන වාට්ටු පහසුකම් ඇති කිරීම වෙනුවෙන් රුපියල් මිලියන 20 බැගින් රුපියල් මිලියන 80 ක මුල්‍ය ප්‍රතිපාදන වෙන් කෙරෙනු ඇත.
මධ්‍යම සංස්කෘතික අරමුදල (CCF) සමඟ එක්ව සීගිරියේ සංචාරක ප්‍රවාහනය සඳහා විදුලි කරත්ත සැපයීම තවත් වැදගත් මුලපිරීමකි. මීට අමතරව, වෙරළ සංරක්ෂණ දෙපාර්තමේන්තුව සහ වනජීවී සංරක්ෂණ දෙපාර්තමේන්තුව සමඟ ඇතිකරගත් අවබෝධතා ගිවිසුම් මගින් දේශීය සහ විදේශීය සංචාරකයන් සඳහා හඳුනාගත් වෙරළබඩ ප්‍රදේශවල සහ යාල ප්‍රධාන ආකර්ෂණ ස්ථාන, එනම් සංචාරක කලාප සඳහා සනීපාරක්ෂක සහ නාන පහසුකම් වැඩිදියුණු කිරීම කෙරෙහි අවධානය යොමු කර ඇත.
මෙම උත්සවයේ තවත් කැපී පෙනෙන විශේෂත්වයක් වනුයේ අලුතින් දියත් කරන ලද සංචාරක වාහන ආනයන යෝජනා ක්‍රමය සඳහා උත්සවාකාරයෙන් අනුමැතිය පිරිනැමීමයි. සංචාරකයින්ගේ ප්‍රවාහන පහසුකම් සඳහා වැඩිවන ඉල්ලුම සපුරාලීමට බස්රථ 250 ක් සමඟ විදුලි හා දෙමුහුන් වෑන් රථ 750 ක් ආනයනය කිරීමට අප්‍රේල් මාසයේදී කැබිනට් මණ්ඩල අනුමැතිය හිමිවිය. ඒ අනුව මෙම උත්සවයේදී සංචාරක කර්මාන්තය සඳහා වාහන ආනයනයට අදාළ පළමු වාහන බලපත්‍ර 10 සංකේතාත්මකව ප්‍රධානය කිරීම සිදුවිය.
තවද, ශ්‍රී ලංකාවේ සමුද්‍ර සංචාරක ව්‍යාපාරයේ ප්‍රධානතම අංගයක් වන ශ්‍රී ලංකාවේ සමුද්‍ර සංචාරක ව්‍යාපාරයේ දියුණුව සඳහා වන සැලසුම් විස්තර කෙරෙන විස්තීර්ණ සමුද්‍ර සංචාරක මාර්ග සිතියම එළිදැක්වීමේ දිනය ප්‍රකාශයට පත් කිරීමට ද ශ්‍රී ලංකා සංචාරක සංවර්ධන අධිකාරිය (SLTDA) අදහස් කරයි.
මෙම විශේෂ අවස්ථාවේ අදහස් දක්වමින් සංචාරක අමාත්‍ය හරීන් ප්‍රනාන්දු මහතා පැවසුවේ, සංචාරක ක්ෂේත්‍රයේ ප්‍රවර්ධනය උදෙසා අන්තර් අමාත්‍යාංශ සම්බන්ධතා සහ සහයෝගීතා ප්‍රයත්නයන් කෙරෙහි අවධානය යොමු කිරීම ඉතා වැදගත් බවයි
“සංචාරක ව්‍යාපාරයේ ප්‍රධාන ප්‍රශ්නය පහසුකම් පිළිබඳව බවත් අපගේ රේඛීය අමාත්‍යාංශ සමඟ එක්ව කටයුතු කිරීම මෙම ගැටලු විසඳීමට ප්‍රධාන වූවක් බවත් අපි තේරුම් ගත්තා. අප සිටින්නේ කර්මාන්තයට වැඩි ආයෝජනයක් අවශ්‍ය මොහොතක වන අතර එහිදී සංචාරකයින් රැකබලා ගැනීම ප්‍රධාන ප්‍රමුඛතාවයක් විය යුතුය,
මෙම අවබෝධතා ගිවිසුම් මගින් ශ්‍රී ලංකාවට පැමිණෙන අමුත්තන්ගේ සමස්ත අත්දැකීම වැඩි දියුණු කරමින් සංචාරක ක්ෂේත්‍රයේ තිරසාර සංවර්ධනය සහ ශක්තිමත් කිරීම සහතික කිරීම සහ වැඩි සහයෝගීතාවයක් ඇති කිරීම සඳහා වැදගත් පියවරක් නියෝජනය කරයි.
මෙම අවස්ථාවට සංචාරක හා ඉඩම් අමාත්‍ය හරීන් ප්‍රනාන්දු, බුද්ධශාසන, ආගමික හා සංස්කෘතික අමාත්‍ය විදුර වික්‍රමණායක, ශ්‍රී ලංකා සංචාරක සංවර්ධන අධිකාරියේ සභාපති පාලිත ප්‍රනාන්දු, අධ්‍යක්ෂ ජනරාල් B.H.R. Sariffo Deen, නියෝජ්‍ය අධ්‍යක්ෂ ජනරාල් උපාලි රත්නායක සෞඛ්‍ය අමාත්‍යාංශයේ ලේකම් විශේෂඥ වෛද්‍ය පාලිත මහීපාල, ආගමික හා සංස්කෘතික අමාත්‍යාංශයේ ලේකම් සෝමරත්න විදානපතිරණ යන මහත්වරු ඇතුලු පිරිසක් එක්ව සිටියහ.
DM