එමෙන්ම අඩු ආදායම්ලාභී පවුල් ලක්ෂ 28කට නොමිලේ සහල් කිලෝ 10 බැගින් ලබා දීමට කටයුතු කරන බවත් ඇමැතිවරයා කීවේය.
මෙම රුපියල් දස දහසේ දීමනාවෙන් රුපියල් 5,000ක් ජනවාරී මස සිට ගෙවීම ආරම්භ කළ අතර අප්‍රේල් සිට ඉතිරිය ගෙවන බවට රජය දුන් පොරොන්දුව ඉටු කරමින් මෙසේ ගෙවීම් ආරම්භ කරන බව ද ඇමැතිවරයා රාජ්‍ය සේවක වැටුප් වැඩි කිරීම සම්බන්ධයෙන් ‘දිනමිණ‘ කළ විමසුමකට පිළිතුරු ලබා දෙමිනි.
දැනට රාජ්‍ය සේවකයන්ට වසරකට වැටුප් ගෙවීමට රුපියල් කෝටි දසදහසක් වැය වන අතර අප්‍රේල් සිට තවත් 5,000කින් වැටුප් වැඩිවීමත් සමඟ රුපියල් කෝටි 1300-1400ත් අතර මුදලක් අමතරව දරන්නට වෙන බව ද ඇමැතිවරයා කීවේය.
එහි දී වැඩිදුරටත් අදහස් දැක්වූ ඇමැතිවරයා, අඩු ආදායම්ලාභි පවුල් ලක්ෂ 28ක් සඳහා සහල් කිලෝ 10 බැගින් අප්‍රේල් මාසයේදීත්, තවත් සහල් කිලෝ 10ක් මැයි මාසයේදීත් ලබාදීමට කටයුතු කරන බවයි.
අඩු ආදායම්ලාභින්ට සහනයක් ලෙසත්, ගොවීන්ට වී සඳහා ලබාදෙන මුදල ඉහළ නැංවීමට මඟ පෙන්වීමත් අරමුණු කරගෙන සිදු කරන මෙම වැඩපිළිවෙළ අනුව අප්‍රේල් මාසයේ ලබාදෙන සහල් කිලෝ 10ක ප්‍රමාණය එම මස 10 වන දිනට පෙර ලබා දෙනු ඇත. එමෙන්ම විශ්‍රාමිකයන් සඳහා අයවැයෙන් යෝජනා කළ වැඩිකළ රු. 2,500ක මුදල ද අප්‍රේල් මාසයේ සිට ලබාදෙන බව ද අමාත්‍යවරයා සඳහන් කළේය.
DN