පසුගිය 24 වැනිදා පැවැති අමාත්‍ය මණ්ඩල විශේෂ රැස්වීමේදී සියලු රජයේ විශ්‍රාමිකයන්ට දැනට ගෙවන රුපියල් 2500ක දීමනාවට අමතරව රුපියල් තුන්දහසක් එක් කර එළඹෙන සැප්තැම්බර් මස සිට රුපියල් 5500ක අන්තර්කාලීන දීමනාවක් ගෙවීමට අනුමැතිය හිමි විය. මෙම දීමනාව ගෙවීමට රජය තීරණය කරනු ලැබුවේ රාජ්‍ය වැටුප් විෂමතා පිළිබඳ සොයා බැලීම සඳහා පත්කෙරුණු විශේෂඥ කමිටුවේ සමාලෝචනය පරිදිය. මැතිවරණය අවසන් වනතුරු එම දීමනාව නොගෙවන ලෙස මැතිවරණ කොමිසම මඟින් සියලු අමාත්‍යාංශ ලේකම්වරුන් වෙත ඊයේ දැනුම් දී තිබිණි.
රජය මඟින් ක්‍රියාත්මක කරනු ලබන විවිධ සංවර්ධන වැඩසටහන් සහ සුබසාධන වැඩසටහන් මෙම මැතිවරණ සමයේ නතර කරන ලෙස මැතිවරණ කොමිසමේ සභාපති ආර්.එම්.ඒ.එල්. රත්නායක මහතා විසින් මීට පෙර ජනාධිපති ලේකම් සමන් ඒකනායක මහතාට ලිපියකින් දැනුම්දී තිබුණු අතර එම වැඩසටහන් අනීතික නොවන බැවින් ඒවා නතර කිරීමට රාජ්‍ය නිලධාරීන්ට උපදෙස් දීමට හැකියාවක් නැතැයි එම ලිපියට පිළිතුරු යවමින් ඒකනායක මහතා දැනුම්දී තිබිණි.
මැතිවරණ කොමිසම ඊයේ සියලු අමාත්‍යාංශ නිලධාරීන් කැඳවා කැබිනට් මණ්ඩලය මඟින් ගෙන ඇති තීරණය අනුව විශ්‍රාම වැටුප් දීමනාව නොගෙවන ලෙස දැනුම් දී තිබේ. එසේ දැනුම් දෙනු ලැබූවත් කැබිනට් මණ්ඩල තීරණය අනුව එම දීමනාව ගෙවන ලෙස දන්වමින් අදාළ චක්‍රලේඛය රාජ්‍ය පරිපාලන ස්වදේශ කටයුතු පළාත් සභා සහ පළාත් පාලන අමාත්‍යාංශයේ ලේකම් ප්‍රදීප් යසරත්න මහතා සියලු අමාත්‍යාංශ ලේකම්වරුන්ට යැවීමට ඊයේම (07) පියවර ගෙන තිබිණි.
DN