කොළඹ ජාතික රෝහලේ ප්රතිකාර ලබමින් සිටි රෝගීන් තිදෙනකු ප්රමිතියෙන් තොර බව කියන ‘හියුමන් ඉමියුනොග්ලොබියුලින්“ එන්නත් මාත්රා එන්නත් කිරීමෙන් පසු මරණයට පත්වූ බවට වාර්තා ලැබී ඇතැයි අගතියට පත් පාර්ශ්වය වෙනුවෙන් අධිකරණයේ පෙනී සිටි ජනාධිපති නීතිඥ නලින්ද ඉන්දතිස්ස මහතා මාලිගාකන්ද මහේස්ත්රාත් ලෝචනී අබේවික්රම මහත්මිය හමුවේ ඊයේ (04) දැනුම් දුන්නේය.
කොළඹ ජාතික රෝහලේ ප්රතිකාර ලබමින් සිටි රෝගීන් තිදෙනකු ප්රමිතියෙන් තොර බව කියන ‘හියුමන් ඉමියුනොග්ලොබියුලින්“ එන්නත් මාත්රා එන්නත් කිරීමෙන් පසු මරණයට පත්වූ බවට වාර්තා ලැබී ඇතැයි අගතියට පත් පාර්ශ්වය වෙනුවෙන් අධිකරණයේ පෙනී සිටි ජනාධිපති නීතිඥ නලින්ද ඉන්දතිස්ස මහතා මාලිගාකන්ද මහේස්ත්රාත් ලෝචනී අබේවික්රම මහත්මිය හමුවේ ඊයේ (04) දැනුම් දුන්නේය.
මෙම සිද්ධියේ අගතියට පත් පාර්ශ්වය වන අල්ලස හෝ දූෂණය නාස්තියට එරෙහි පුරවැසි බලය වෙනුවෙන් අධිකරණයේ පෙනී සිටි ජනාධිපති නීතිඥවරයා එම කරුණු ඉදිරිපත් කරමින් අධිකරණයෙන් ඉල්ලා සිටියේ එම කරුණ මෙම නඩුවට අදාළ කරගන්නා ලෙසය.
කොළඹ ජාතික රෝහලේ විශේෂඥ වෛද්ය ජේ. ඒබ්රහිම් මහතා භාරයේ ඇති 16 වන වාට්ටුවට ඉකුත් අගෝස්තු මස 13 වැනිදා ඇතුළත් කර ප්රතිකාර ලබමින් සිටි ඇඳඉහපත් අංක 144882 උදය පෙරේරා, ඇඳඉහපත් අංක 147477 ජොයොනිකා අබේවර්ධන සහ ඇඳඉහපත් අංක 147293 අශෝක පලිසේන යන රෝගීන් තිදෙනා අදාළ එන්නත ලබාදීමෙන් පසු දැඩි අසාත්මිකතාවය හේතුවෙන් මරණයට පත්ව ඇතැයි ජනාධිපති නීතිඥවරයා අධිකරණයට දැනුම් දුන්නේය.
මෙහි දී නීතිපතිවරයා නියෝජනය කරමින් අධිකරණයට කරුණු ඉදිරිපත් කළ නියෝජ්ය සොලිසිටර් ජනරාල් ලක්මිණී ගිරිහාගම මෙනෙවිය සඳහන් කළේ, ඉකුත් නඩු දිනයේ දී මෙම සිවිල් සංවිධානය විසින් අපරාධ පරීක්ෂණ දෙපාර්තමේන්තුවට භාරදෙනු ලැබූ අදාළ ලේඛනය සම්බන්ධයෙන් විමර්ශනයක් සිදුකළ බවත් එම සිද්ධියට අදාළව කොළඹ ජාතික රෝහලේ වෛද්යවරුන් සමඟ සාකච්ඡාවක් පැවැත්වූ බවත්ය.
මෙම සිද්ධියෙන් මරණයට පත් වූ එක් රෝගියකුට ප්රශ්නගත එන්නත ලබා දී ඇති අතර, එහි දී යම් අසාත්මිකතාවක් ඇතිවීමෙන් පසු ඒ අවස්ථාවේ දී වෛද්යවරු ඔහුගේ ජීවිතය බේරාගෙන ඇති නමුත් පසුව ඔහු මියගොස් ඇති බවත් එහි දී වහාම වෛද්යවරු අදාළ බෙහෙත ඉවත් කර ගෙන ඇති බවත් නියෝජ්ය සොලිසිටර් ජනරාල්වරිය අධිකරණයට දැනුම් දුන්නාය.
ඒ අනුව ඉන්දියානු ණය යෝජනා ක්රමය යටතේ මෙරටට ගෙන්වූ ‘හියුමන් ඉමියුනොග්ලොබියුලින්“ සහ පිලිකා නාශක ඖෂධයක් වන ‘රිටොක්සිමැප්“ එන්නත් මාත්රා රජයේ රෝහල්වලට ලබාදීමෙන් පසු මරණයට පත්වූ හෝ මේ වනවිට රෝගීන් බවට පත්වූ අය සම්බන්ධයෙන් වාර්තාවක් ලබන මැයි මස 30 වැනිදාට පෙර අපරාධ පරීක්ෂණ දෙපාර්තමේන්තුවට ලබා දෙන ලෙස ඉකුත් නඩු දිනයේ දී සෞඛ්ය සේවා අධ්යක්ෂ ජනරාල්වරයාට නියෝග කළ පරිදි එම වාර්තා ලද පසු පරීක්ෂණ ආරම්භ කරන බව ද නියෝජ්ය සොලිසිටර් ජනරාල්වරිය අධිකරණයට කරුණු ඉදිරිපත් කළාය.
මෙම නඩුවේ පළමු සැකකරු වන අයුසුලේට් බයොටෙක් ෆර්මා සමාගමේ හිමිකාර සුගත් ජානක ප්රනාන්දු විසින් ටෙන්ඩර් ක්රමවේදනයෙන් පසු වෛද්ය සැපයුම් අංශයට ලබාදෙන ලද අදාළ එන්නත් මාත්රා කුමන රෝහල් වෙත යැව්වාද? ඒවා ලබාදුන් වාට්ටු මොනවාද? මෙම එන්නත් ලබාදීමෙන් පසු යම් අසාත්මිකතාවක් සිදුවී හෝ යම් ප්රතික්රියාවක් සිදුවී කිසියම් රෝගියකු මරණයට පත්වී තිබේද? කවරෙකු හෝ මේ වන විටත් රෝගී තත්ත්වයෙන් සිටීත්ද? එම රෝගීන්ට අදාළව ඇති රෝගය වර්ගීකරණය කරන්නේ කෙසේද? ඒ සම්බන්ධයෙන් වන විශේෂඥ මතය කවරේද? මරණයට පත්වූ රෝගීන් සිටිත් නම් ඔවුන්ගේ මරණ පරීක්ෂණ වාර්තාව මෙන්ම, එම රෝගීන්ගේ දුරකතන අංක, ලිපින සහිත සවිස්තර නාමලේඛනයක් අපරාධ පරීක්ෂණ දෙපාර්තමේන්තුවට ලබා දෙන ලෙසට ප්රශ්නාවලියක්ද සහිතව සෞඛ්ය සේවා අධ්යක්ෂ ජනරාල්වරයාට යොමු කර ඇතැයි ද නියෝජ්ය සොලිසිටර් ජනරාල්වරිය අධිකරණයට දැනුම් දුන්නාය.
ප්රමිතියෙන් තොර හියුමන් ඉමියුනොග්ලොබියුලින් එන්නත් මාත්රා මිල දී ගැනීමේ සිද්ධිය සම්බන්ධයෙන් වැඩිදුර මහේස්ත්රාත් පරීක්ෂණය ඊයේ (08) අධිකරණය හමුවේ යළි කැඳවූ අවස්ථාවේ දී මෙම කරුණු ඉදිරිපත් විණී.
මෙම සිද්ධියට අදාළ සැකකරුවන් ලෙස හිටපු සෞඛ්ය සහ පරිසර අමාත්ය කෙහෙළිය රඹුක්වැල්ල සහ සෞඛ්ය අමාත්යාංශයේ හිටපු ලේකම් ජනක චන්ද්රගුප්ත යන අයවලුන් ඇතුළු සැකකරුවන් 09 දෙනකු බන්ධනාගාරය මගින් අධිකරණය හමුවට ඊයේ (28) ඉදිරිපත් කර තිබුණු අතර පස්වැනි සැකකරු ඇප මත සිටිමින් අධිකරණයේ පෙනී සිටියේය.
පැමිණිල්ල වෙනුවෙන් නීතිපතිවරයා නියෝජනය කරමින් නියෝජ්ය සොලිසිටර් ජනරාල් ලක්මිණී ගිරිහාගම මෙනෙවිය සමඟ අපරාධ පරීක්ෂණ දෙපාර්තමේන්තුවේ විශේෂ විමර්ශන ඒකකයේ නිලධාරීහු අධිකරණය හමුවේ පෙනී සිටියහ.
හිටපු සෞඛ්ය අමාත්ය කෙහෙළිය රඹුක්වැල්ල මහතා ඇතුළු එම නඩුවේ සැකකරුවන් 07 දෙනකුගේ ඇප ඉල්ලීම් අධිකරණය විසින් ඉකුත් මාර්තු මස 14 වැනිදා ප්රතික්ෂේප කරනු ලැබූ අතර, නඩු විභාගය අවසන් වනතුරු එම සැකකරුවන් රක්ෂිත බන්ධනාගාර ගත කරන ලෙස ද නියෝග කෙරිණී.
ඒ අනුව එම සැකකරුවන් ලබන 22 වැනිදා තෙක් තවදුරටත් රක්ෂිත බන්ධනාගාර ගත කිරීමට අධිකරණයෙන් නියෝග නිකුත් විය.
මෙම නඩුවේ 10 වැනි සැකකාර සෞඛ්ය අමාත්යාංශයේ අතිරේක ලේකම් සමන් රත්නායක, 11 වන සැකකාර වෛද්ය සැපයුම් අංශයේ නියෝජ්ය අධ්යක්ෂ වෛද්ය අරඹේගෙදර තුසිත සුදර්ශන යන සැකකරුවන් දෙදෙනා සම්බන්ධ ඇප නියෝගය හෙට (10) සිදු කරන බව නියම කළ අධිකරණය එම සැකකරුවන් දෙදෙනා එදින තෙක් රක්ෂිත බන්ධනාගාර ගත කිරීමටද අධිකරණයෙන් නියෝග නිකුත් විණි.
පැමිණිල්ල වෙනුවෙන් අධිකරණයට කරුණු ඉදිරිපත් කළ නියෝජ්ය සොලිසිටර් ජනරාල් ලක්මිණී ගිරිහාගම මෙනෙවිය මෙසේ ප්රකාශ කළාය.
‘‘ස්වාමිනී, මෙම සිද්ධියට අදාළව දෙවැනි සහ අටවැනි සැකකරුවන් රිට් අයැදුම්පත්ර ඉදිරිපත් කරලා තියෙනවා. මේ වන විට එහි විමසීම් සිදුවෙමින් පවතිනවා. අදාළ ප්රමිතියෙන් තොර එන්නත් මාත්රා භාවිත කරලා යම් රෝගියකු මිය ගියාද නැතහොත් මේ වන විටත් රෝගී වී ඇත්ද යන්න සම්බන්ධයෙන් පැමිණිල්ල ලබාදෙන ප්රශ්නාවලියට පිළිතුරු සහිත වාර්තාවක් ලබන මැයි මස 30 වැනිදාට පෙර අපරාධ පරීක්ෂණ දෙපාර්තමේන්තුවට ලබා දෙන ලෙස සෞඛ්ය සේවා අධ්යක්ෂ ජනරාල්වරයාට නියෝගයක් නිකුත් කරන ලෙසට ඉල්ලා සිටිනවා. ඒ වාර්තාවෙන් පසු ඊට වගකිව යුතු නිලධාරීන් සම්බන්ධයෙන් විමර්ශනය කළ හැකි වෙනවා.”
අධිකරණය – මෙම එන්නත් ලබාදීමෙන් පසු කිසියම් අයකු මරණයට පත්වෙලා තිබෙනවා නම්, ඒ ඒ අධිකරණ බල සීමාවන්ට අයිති මහේස්ත්රාත්වරයා විසින් ඉදිරියේ තමයි ඒවා විමසිය යුතු වෙන්නේ. කොළඹ මහේස්ත්රාත් අධිකරණ බලසීමාවේ වුණොත් තමයි ඒක මේ අධිකරණයේ හෝ කොළඹ ප්රධාන මහේස්ත්රාත් අධිකරණයේ කෙරෙන්නේ.
නියෝජ්ය සොලිසිටර් ජනරාල්වරිය – ස්වාමිනි, එලෙස මරණයක් වෙලා තියෙනවා ද කියලා හොයලා බලන්න තමයි සෞඛ්ය සේවා අධ්යක්ෂ ජනරාල්වරයාට නියෝගයක් ලබා දුන්නේ. ඔවුන්ගේ ඥාතීන් කවුරුන්ද, කුමන ප්රදේශයක ද යන්න කරුණු ඇතුළත්ව. පැමිණිලි පාර්ශ්වය වූ අදාළ සිවිල් සංවිධානය ලබාදුන් වාර්තා සම්බන්ධයෙන් එම රෝහලේ විශේෂඥ වෛද්යවරුන් සමඟ සාකච්ඡාවක් පැවැත්වූවා.
අධිකරණය – නෛතික සිද්ධාන්තය අනුව තමයි මේ විමර්ශන කළ යුතු වෙන්නේ. මේ රෝගීන් මිය ගිහිල්ලා තියෙන්නේ කොහොමද, යම් අසාත්මිකතාවයකින්ද, නැත්නම් වෙන කුමන හෝ දෙයකින් ද කියලා විමර්ශනයක් කරල තමයි බලන්න වෙන්නේ.
මෙහි දී විවෘත අධිකරණයේ දී තමන්ට කරුණක් කීමට අවසර දෙන ලෙසට මෙම නඩුවේ පළමු සැකකරු වන අයුසුලේට් බයොටෙක් ෆර්මා සමාගමේ හිමිකාර සුගත් ජානක ප්රනාන්දු යන අය මහේස්ත්රාත්වරියගෙන් ඉල්ලා සිටියේය.
පළමු සැකකාර සුගත් ජානක ප්රනාන්දු – ස්වාමිනි, අවසරයි. මට තේරුම් ගන්න බැරි දෙයක් තියෙනවා. මේ විමර්ශනය දණ්ඩ නීති සංග්රහය, අපරාධ නඩු විධාන සංග්රහය හෝ ආණ්ඩුක්රම ව්යවස්ථාව මොන එකකින් විමර්ශනය වුණත් ඒ සඳහා අපරාධ පරීක්ෂණ දෙපාර්තමේන්තුවට ඇති බලය කුමක්ද එය විමර්ශනය කරන්න කියන එක. මේ බෙහෙත් බාල බෙහෙත් කියලා නිතරම මාධ්යයෙන් කියනවා. මේ බෙහෙත්වල තියෙන බාල බවට කිසිම රසායනික වාර්තාවක් මෙතෙක් ඉදිරිපත් වෙලා නැහැ. එම්ආර්අයි එක කියන්නේ බැක්ටීරියාවක් කියලා. ජාතික රෝහලේ ඔක්කෝම මේ බෙහෙත ගැහැවා නම් ඊට වඩා මැරෙන්න ඕන. මේ බෙහෙත් ගැන දන්නේ මම ඇරෙන්න තවත් 7 දෙනෙක් විතරයි. මේ බෙහෙත් බාල බෙහෙත් කියලා කියන්න මේ මම ඇතුළු මේ හත් දෙනා හැරෙන්න කියන්න වෙන දන්න කෙනෙක් නෑ. එහෙම නම් නොදන්න අය කොහොමද මේ බෙහෙත් ගැන බාලයි කියලා කියන්නේ. මේ බෙහෙත් ශ්රී ලංකාවේ හදන්න පුළුවන්.
අධිකරණය – මේ බෙහෙත් ලංකාවේද හැදුවේ?
සැකකරු – ඒක දැන් මට මෙතන කියන්න බෑ. තාම මේ බෙහෙත රෝහල්වල තියෙනවා. මෙච්චර කාලයක් මේ බෙහෙත ගැන ගැටලුවක් තිබ්බේ නැහැ. මේ බෙහෙත ගෙන්වන්න ඉන්දියානු ආයතනයක් ආවා. ඒ තරගකාරී ආයතනය නිතරම මට ගැටලු ඇති කළා. ඒ අයත් එක්ක මට නිතරම ගැටුම් තිබුණා. මම වෙළෙන්දෙක්. මම බෙහෙත් හැදුවාම ඉන්දියාවට ප්රශ්නයක්. ඉන්දියාවටවත් නැති මැෂින් මා ළඟ තියෙනවා. මේක විද්යාත්මක ඇසින් බලන්න ඕන. මගේ කම්හල නීති විරෝධී කම්හලක් නෙමෙයි. ඒකට 2005 දි ප්රංශ රජය තමයි ආධාර කළේ. මට මේ රටේ ප්රබල අය නඩු දැම්මා. මම අහනේනේ මේ විමර්ශනය කරන්න සී අයි ඩී එකට බලයක් තියෙවාද කියලා.”
අධිකරණය – ඔබ ඔය ඔතන ඉඳලා කියපු දෙයට වටිනාකමක් තියෙනවා කියලා ඔබ හිතනවාද? ඉල්ලීමක් කළ නිසයි අවසර දුන්නේ. නමුත් ඔබට කියන්න දෙයක් තියෙනවා නම් අපරාධ නඩු විධාන සංග්රහ පනත ප්රකාරව අධිකරණය ඉදිරියේ රහස්ය ප්රකාශයක් දෙන්න පුළුවන්. එහෙම නැතුව ඔය ඔතන ඉඳලා කියන දේවල් අතන මෙතන ඉඳලා කියන දේවල් වගේ. ඒ දේවල්වල නීතිමය වටිනාකමක් නැහැ. ඔබ ඔය කියන්න ඇත්තේ ඔබ දන්න නීතිය අනුව හෝ කවුරු හරි නීති උපදෙස් දීලා නේ. එහෙම නීති උපදෙස් දුන්නට හරියන්නේ නැහැ. මේ සිද්ධිය ට නීතිපතිවරයා මැදිහත්වෙලා තියෙනවා. එතකොට ඔබ දන්න සාමාන්ය නීතිය මේකට හරියන්නේ නැහැ. තමුන්ට නීති පොත් ගෙන්නලා නීතිය උගන්නන්න මට බෑ. ඔබ කළේ ඇප ඉල්ලීමක්ද? නැත්නම් මොකක්ද?
සැකකරු – ඇප ඇයැදීමක් වගේම කරුණු ඉදිරිපත් කිරීමක් ස්වාමිනි.
නියෝජ්ය සොලිසිටර් ජනරාල්වරිය – මෙම සැකකරු ඇහුවා අපරාධ පරීක්ෂණ දෙපාර්තමේන්තුවට තියෙන අයිතිය ගැන. අපරාධ නඩු විධාන සංග්රහ පනතේ 109 සිට 120 දක්වා වගන්ති කියවලා බැලුවා නම් ඔහුට මේකට උත්තර ලැබෙයි. මෙම බෙහෙත් මාත්රා දෙකේ තිබූ ද්රාවණය මනුෂ්ය ශරීරයට අහිතකර සංඝටක අන්තර්ගතව ඇති බවත් ඒවා භාවිත කිරීම මනුෂ්ය ශරීරයට අහිතකර බවටත් වෛද්ය වාර්තා මගින් තහවුරු වෙලා තිබෙනවා. මෙම සැකකරුගෙන් අධිකරණය ප්රශ්නයක් ඇහුවා. මේ බෙහෙත් ලංකාවේද හැදුවේ කියලා. එතකොට ඔහු එම ප්රශ්නයෙන් මග ඇරියා.
ඉදිරිපත් වූ කරුණු සැලකිල්ලට ගත් අධිකරණය සැකකරුවන් රක්ෂිත බන්ධනාගාර ගත කර ලබන 22 තෙක් නඩුව කල් තැබීය.
බාල ඖෂධ ගෙන්වූ බව කියන අයුසුලේට් බයොටෙක් ෆර්මා සමාගමේ හිමිකරු වන සුගත් ජානක ප්රනාන්දු, වෛද්ය සැපයුම් අංශයේ හිටපු අධ්යක්ෂ වෛද්ය කපිල වික්රමනායක, වෛද්ය සැපයුම් අංශයේ සහකාර අධ්යක්ෂ ශාන්තිනී සොලමන්, ගණකාධිකාරී (සැපයුම්) නෙරාන් ධනංජය, සෞඛ්ය අමාත්යාංශයේ හිටපු ලේකම් ජනක චන්ද්රගුප්ත, වෛද්ය සැපයුම් ඒකකයේ නියේජ්ය අධ්යක්ෂ ජනරාල් වෛද්ය හේරත් මුදියන්සේලාගේ ධර්මසිරි රත්නකුමාර හේරත්, හිටපු සෞඛ්ය අමාත්ය කෙහෙළිය රඹුක්වැල්ල, සෞඛ්ය අමාත්යාංශයේ හිටපු අතිරේක ලේකම් සමන් රත්නායක, යන සැකකරුවන් මෙම නඩුවේ සැකකරුවෝ වෙති.
මෙහි පස්වැනි සැකකාර සෞඛ්ය අමාත්යාංශයේ තොග පාලක සුජිත් කුමාර යන අය පමණක් මේ වන විට ඇප මත සිටින අතර, වෛද්ය ජයනාත් බුත්පිටිය යන අය මෙම නඩුවේ 09 වැනි සැකකරු ලෙස නම්කර ඇත. එම සැකකරු මේ වන විට විදෙස් ගත සිටියි.
සැකකරුවන් වෙනුවෙන් ජනාධිපති නීතිඥ අනූජ ප්රේමරත්න, ජනාධිපති නීතිඥ සරත් ජයමාන්න, නීතිඥ නුවන් ජයවර්ධන යන මහත්වරු ඇතුළු නීතිඥ මඬුල්ලක් සහ අගතියට පත් පාර්ශ්වය වෙනුවෙන් ජනාධිපති නීතිඥ නලින්ද ඉන්දතිස්ස මහතා අධිකරණය හමුවේ පෙනී සිටියහ.
DMN