කොරෝනා ආසාදනයට ගොදුරු වී සුවය ලැබූවන් අතර පවතින මෙම ලෝන්ග් කොවිඩ් රෝග තත්ත්වයෙන් පෙළෙන්නන් විශාදය හෙවත් ඩිප්‍රෙෂන් රෝගයේ සිට ආමාශගත රෝග දක්වා වූ රෝග ලක්ෂණ 200කට අධික සංඛ්‍යාවක් පෙන්නුම් කර ඇති බව බටහිර පර්යේෂකයෝ පවසති. ලෝන්ග් කොවිඩ් රෝග තත්ත්වයයෙන් පෙළෙන්නන් කොරෝනා ආසාදනයට ගොදුරු වීමෙන් පසු සුවය ලබා ඇතත් රුධිර කැටි ඇති වීමේ සිට අසාමාන්‍ය හෘද ස්පන්දනයක් ඇති වීම හා හෘදයාබාධයන් දක්වා වූ හෘද රෝග තත්ත්වයන්ගෙන් පෙළිය හැකි බව වෛද්‍ය මතය වී තිබේ. දැනට ලෝන්ග් කොවිඩ් තත්ත්වයෙන් පෙළෙන පුද්ගලයන් අතර බහුලව දක්නට ලැබෙන රෝග ලක්ෂණයන් වී ඇත්තේ දිගු කාලයක් පවතින හිසරදය, බ්‍රේන් ෆොග් සින්ඩ්‍රෝම රෝගය හෝමෝනවල ශ්‍රාවය පහත වැටීම හේතුවෙන් ඇති වන තෙහෙට්ටුව හෝ පශ්චාත් ව්‍යායාම ව්‍යාධිය හෙවත් සුළු ක්‍රියාවක් කළද මහන්සියක් දැනීම බව වාර්තා වී ඇතැයි නිව් සයන්ටිස්ට් සඟරාව පවසයි. මෙම ලෝන්ග් කොවිඩ් රෝගයේ රෝග ලක්ෂණවලින් පෙළෙන පුද්ගලයන්ට තනි ප්‍රතිකාරයක් නැති අතර ව්‍යායාමය හොඳ ඔසුවක් බව බටහිර වෛද්‍යවරුන් පවසා ඇති බව එම සඟරාවේ පළව ඇති ලිපියක සඳහන් කර තිබේ.
ඒමන්ති මාරඹේ