කුවේට් රාජ්‍යයේ නේවාසික ගොඩනැඟිල්ලක් පසුගියදා ඇති වූ ගින්නට හසුවී ජීවිතක්ෂයට පත්වූ ඉන්දීය ජාතිකයන් 45 දෙනකාගේ මෘත දේහ ඉන්දීය ගුවන් සමාගමට අයත් විශේෂ ගුවන්යානයකින් යළි ගෙන ඒමට ඉන්දීය රජය පියවර ගෙන ඇතැයි විදෙස් මාධ්‍ය වාර්තා කළේය. කුවේට් රාජ්‍යයේ මංගෆ් නුවර පිහිටි මහල් 6ක ගොඩනැඟිල්ලක මුළුතැන්ගෙයක එම ගින්න හටගෙන තිබූ අතර, අනාරක්ෂිත අයුරින් විදුලි පරිපථ සවි කිරීමේ චෝදනාවට එම ගොඩනැඟිල්ලේ හිමිකරුවන් කුවේට් පොලිසිය විසින් අත්අඩංගුවට ගනු ලැබූ බව ද වාර්තා විය.
ගොඩනැඟිල්ලේ ගින්නෙන් ඉන්දීය ජාතිකයන් 45 දෙනකු මියගිය බවට වාර්තා වීමෙන් පසු ඒ පිළිබඳ සොයා බැලීමට සහ අවශ්‍ය කටයුතු ක්‍රියාත්මක කිරීමට ඉන්දීය අගමැති නරේන්ද්‍ර මෝදි කුවෙට්හි ඉන්දීය තානාපති කාර්යාලයට උපදෙස් දුන් බවත්, මියගිය අයගේ පවුලේ සාමාජිකයන් වෙත සිය ශෝකය පළ කළ බවත් ඉන්දීය මාධ්‍ය සඳහන් කළේය. පුද්ගලයන් 160 දෙනකු පමණ පදිංචිව සිටි එම ගොඩනැඟිල්ලේ ගින්නෙන් තවත් 50කට වැඩි පිරිසක් තුවාල ලබා තිබූ අතර, දැඩි පරිශ්‍රමයකින් පසු ගිනි නිවන හමුදාව ගින්න මැඬ පවත්වා තුවාල ලැබුවන් කඩිනමින් රෝහල්ගත කිරීමට ද පියවර ගෙන තිබේ.
DMN