සාමකාමීව ගමන් කළ විරෝධතා පාගමනට පොලිසිය තිරිසනුන් මෙන් හැසිරෙමින් ගුරුවරුන්ට හා විදුහල්පතිවරුන්ට බැටන් පොලු ප්‍රහාර එල්ල කළ බවත්, මෙහිදී තමා ඇතුළු තවත් ගුරුවරුන් කීපදෙනකුට බැටන් පොලු ප්‍රහාර එල්ල වූ බවත්, 6 දෙනකු පමණ තුවාල ලැබූ බවත් ලංකා ගුරු සේවා සංගමයේ ප්‍රධාන ලේකම් මහින්ද ජයසිංහ මහතා ‘දිවයින’ට පැවසීය.
පැලවත්ත බුද්ධදාස ක්‍රීඩාංගණය අසලින් ආරම්භ වූ මෙම විරෝධතා පාගමනට ඒ ආසන්නයේදීම මෙම කඳුළු ගෑස් හා ජල ප්‍රහාරය එල්ල වී තිබිණි. මෙම උණුසුම් තත්ත්වය නිසා මාර්ග අංක 174 කොට්ටාව – බොරැල්ල බස් මාර්ගයේ වාහන ගමනාගමනයට ද පැය දෙකක් පමණ දැඩි බාධා එල්ල විය.
විරෝධතාවට එක්වූ ගුරු -විදුහල්පතිවරුන්ගෙන් පිරිසක් මාර්ග බාධක කඩාගෙන ඉදිරියට යෑමට සූදානම් වීමත් සමග පොලිසිය කඳුළු ගෑස් හා ජල ප්‍රහාර එල්ල කර ඇතැයි හෙළි වූ බව පොලිසිය කියයි.
සිය ඉල්ලීම්වලට විසඳුම් නොලැබුණහොත් ඉදිරියේදී දැඩි වෘත්තීය ක්‍රියාමාර්ගයකට එළැඹෙන බව ද මහින්ද ජයසිංහ මහතා ‘දිවයින’ට කීය.
මෙය ගුරු – විදුහල්පති වෘත්තීය සමිති සන්ධානය විසින් සංවිධානය කර තිබිණි.
ප්‍රදීප් ප්‍රසන්න සමරකෝන් සහ සුජීව තත්සර