හිටපු ආගමන විගමන නි. පාලක මේ වනවිට විශ්‍රාම වැටුප් නි. අධ්‍යක්ෂවරයෙක්
අපරාධ රැසක් මෙහෙයවීමට ප්‍රධානත්වය ගත් මෙරට පාතාල ප්‍රබලයන් දෙදෙනකුට රටින් පලා යෑමට ව්‍යාජ ගුවන් ගමන් බලපත්‍ර දෙකක් සැකසූ ආගමන විගමන දෙපාර්තමේන්තුවේ නියෝජ්‍ය පාලකවරයකු හා හිටපු නියෝජ්‍ය පාලකවරයකු අපරාධ පරික්ෂණ දෙපාර්තමේන්තුව මඟින් ඊයේ (17) අත්අඩංගුවට ගැනිණ.
නුරේෂ් සුපුන් දයාරත්න හෙවත් හීනටියන මහේෂ් සහ ශාන් අරෝෂ් ලියනගේ හෙවත් මතුගම ශාන් යන පාතාල නායකයන්ට මෙසේ අසත්‍ය තොරතුරු මත විදේශ ගමන් බලපත්‍ර සකස් කරදීමේ සිද්ධියක් සම්බන්ධයෙන් මෙම නිලධාරීන් දෙදෙනා ඉදිරි විමර්ශන සඳහා අපරාධ පරීක්ෂණ දෙපාර්තමේන්තුව විසින් සිය භාරයට ගෙන තිබේ.
එම සිද්ධිය සම්බන්ධයෙන් සිදු කළ විමර්ශනයකින් අනතුරුව ඔවුන් දෙදෙනා පොලිස් භාරයට ගනු ලැබූ අතර අපරාධකරුවන්ට මෙලෙස විදේශ ගමන් බලපත්‍ර තවත් ලබා දී ඇද්ද යන්න සම්බන්ධයෙන් සහ තවත් තොරතුරු රැසක් අනාවරණය කර ගැනීමට ඔවුන්ගෙන් වැඩිදුර ප්‍රකාශ ලබා ගන්නා බව අපරාධ පරීක්ෂණ දෙපාර්තමේන්තුවේ උසස් නිලධාරියකු ‘දිනමිණ‘ සිදු කළ විමසීමකට පිළිතුරු දෙමින් පැවැසීය.
සැකකරුවන් දෙදෙනා මේ ගමන් බලපත්‍ර සකස් කිරීමට රුපියල් ලක්ෂ ගණනක මුදලක් ලබා ගන්නට ඇතැයි පොලිසිය සැක කරයි.
සැකකාර නියෝජ්‍ය පාලකවරයා විසින් සුපුන් දයාරත්න හෙවත් හීනටියන මහේෂ් නමැත්තාටද සැකකාර හිටපු නියෝජ්‍ය පාලකවරයා විසින් මතුගම ශාන් නැමැත්තාට ද ව්‍යාජ ගුවන් ගමන් බලපත්‍රය සාදා දී ඇති බව විමර්ශනවල දී අනාවරණය වී ඇත.
මානික්කුගේ දිනේෂ් සිල්වා යන ව්‍යාජ නම සහ ව්‍යාජ හැඳුනුම්පත් අංකයක් ඇතුළත් කර ව්‍යාජ ගුවන් ගමන් බලපත්‍රය සකසා ඇති බවට අනාවරණය වී ඇති අතර දොඩංගොඩ ලියනගේ ප්‍රාදේශ කුමාර ජයසිංහ නමැති ව්‍යාජ නාමය භාවිත කර මතුගම ශාන් නමැත්තාට ගුවන් ගමන් බලපත්‍රය සකස් කර දී ඇති බව පොලිස් විමර්ශනවල දී අනාවරණය වී ඇත.
සැකකාර හිටපු ආගමන විගමන දෙපාර්තමේන්තුවේ නියෝජ්‍ය පාලකවරයා මේ වන විට විශ්‍රාම වැටුප් දෙපාර්තමේන්තුවේ නියෝජ්‍ය අධ්‍යක්ෂවරයකු ලෙසට සේවය කරන බවත් වැඩිදුරටත් අනාවරණය වූ බව අපරාධ පරීක්ෂණ දෙපාර්තමේන්තු ආරංචි මාර්ග සඳහන් කරයි. අපරාධ පරීක්ෂණ දෙපාර්තමේන්තුවේ නියෝජ්‍ය පොලිස්පති පේමරත්න මහතාගේ අධීක්ෂණය යටතේ විමර්ශන සිදු කෙරේ.
මේ නිලධාරින් දෙදෙනා සම්බන්ධයෙන් ආගමන විගමන දෙපාර්තමේන්තුවේ අභ්‍යන්තර පරීක්ෂණයක්ද ආරම්භ කර ඇතැයි එහි උසස් නිලධාරියෙක් ‘දිනමිණ‘ට ඊයේ (17)පැවැසීය.
DMN