පාර්ලිමේන්තු මන්ත්‍රී ෆීල්ඩ් මාර්ෂල් සරත් ෆොන්සේකා මහතා සමගි ජන බලවේගයේ සභාපති ධුරයෙන් ඉල්ලා අස්වී ඇති බවත් ඔහුගේ ඉල්ලා අස්වීම සමගි ජන බලවේගයට විශාල ශක්තියක් බවත් පාර්ලිමේන්තු මන්ත්‍රී ජේ.සී. අලවතුවල මහතා පැවැසීය.
ඊයේ (09) සමගි ජන බලවේග ප්‍රධාන කාර්යාලයේ පැවැති මාධ්‍ය හමුවට සහභාගි වූයේ පාර්ලිමේන්තු මන්ත්‍රී ජේ. සී. අලවතුවල මහතාය. එහිදී ඒ මහතා මේ බව පැවසීය.
වැඩිදුරටත් අදහස් දැක්වූ ඒ මහතා මෙසේ ද පැවැසීය.
සරත් ෆොන්සේකා මහතා දේශපාලනයට නොගැළපෙන පුද්ගලයෙක්. සරත් ෆොන්සේකා මහතා යුද්ධයට ෙජනරාල්වරයෙකු වුවත් ඔහු දේශපාලනයේදී කෝප්‍රල් කෙනෙකුගේ තරම්වත් දැනුමක් නැහැ.
2024 ජනාධිපතිවරණයේ දී සජිත් ප්‍රේමදාස මහතාගේ ජයග්‍රහණය සම්බන්ධයෙන් ස්ථිර තත්ත්වයක් රට තුළ නිර්මාණය වෙලා තිබෙනවා. ඒ වගේම මහින්ද රාජපක්ෂ හිටපු ජනාධිපතිවරයා සහ ගෝඨාභය රාජපක්ෂ හිටපු ජනාධිපතිවරයා ජයග්‍රහණය කළේ සිංහල ඡන්ද බහුතරයක් ලබා ගනිමින්. මේ වනවිට රටේ සිටින සිංහල, දමිළ, මුස්ලිම්, බර්ගර් කියන සියලුම ජාතීන් සහ බෞද්ධ, හින්දු, ක්‍රිස්තියානි, ඉස්ලාම් ආගම් නියෝජනය කරන පක්ෂ ගණනාවක් සහ නායකයන් ගණනාවක් සජිත් ප්‍රේමදාස මහතාගේ ජයග්‍රහණය වෙනුවෙන් අත්වැල් බැඳගෙන සිටිනවා. මේක ඵෙතිහාසික අවස්ථාවක්. ඉදිරියේදී රටේ ජනාධිපතිවරයා ලෙස පත් වෙන්නේ රටේ සිටින සියලුම ජාති, ආගම් නියෝජනය කරන ජනාධිපතිවරයෙක්. එවැනි ජනාධිපතිවරයෙක් රටේ පත්වුණොත් විතරයි රටේ සිටින සියලුම ජනවර්ගවලට විසඳුම් ලබාදෙන්න හැකියාව තිබෙන්නේ.
ඒ අනුව රටේ බහුතර ජනතාවකගේ සහාය ලැබෙන්නේ සජිත් ප්‍රේමදාස මහතාට. සැප්තැම්බර් මාසයේ 21 වැනිදා රටේ සියලු ආගම්, ජාතීන් නියෝජනය කරන ජනාධිපතිවරයෙක් පත්කරගන්න අවස්ථාව උදාවෙනවා. සජිත් ප්‍රේමදාස මහතාව ජනාධිපතිවරයා බවට පත් කරන්න සමගි ජන සන්ධානය නිර්මාණය කරමින් සියලු පක්ෂ ප්‍රතිඥා ලබාදුන්නේ ඒ නිසයි. රටේ ප්‍රජාතන්ත්‍රවාදය ආරක්ෂා කරන්න අධිකරණ පද්ධතිය බැඳී සිටින බව යළි තහවුරු වුණා. ඒ වගේම සමගි ජන බලවේගය හැර ගොස් ඇමැති ධුර භාරගත්ත හරින් ප්‍රනාන්දුට සහ මනුෂ නානායක්කාරට ශ්‍රේෂ්ඨාධිකරණය තීන්දුවක් ලබාදීලා තිබෙනවා. ඒ අනුව ඔවුන් දෙදෙනා පක්ෂයෙන් නෙරපීමට ගත් තීන්දුව නිවැරදි බව ශ්‍රේෂ්ඨාධිකරණය තීන්දු කරලා තිබෙනවා. පසුගිය පාර්ලිමේන්තු මැතිවරණයේදී අපි ඉදිරිපත් වුණේ සමගි ජන බලවේගයෙන්.
ජනාධිපති මැතිවරණය පරාජය වී තිබෙන අවස්ථාවක රටේ ජනතාව සමගි ජන බලවේගයේ මන්ත්‍රීවරු 54ක් පර්ලිමේන්තු යවන්න ශක්තිය ලබා දුන්නා. ඒ අනුව සමගි ජන බලවේගයෙන් තරග කරලා පාර්ලිමේන්තුවට පැමිණි මනූෂ නානායක්කාර ආණ්ඩුවට ගිහින් ඇමැති ධුරයක් භාර ගත්තා. සමගි ජනබලවේගයේ ජාතික ලැයිස්තුවෙන් පැමිණි හරින් ප්‍රනාන්දු ආණ්ඩුවට ගිහින් ඇමැති ධුරයක් භාර ගත්තා. ඒ අනුව මෙම දෙදෙනාගේ පක්ෂ සාමාජිකත්වය තහනම් කරන්න සමගි ජන බලවේගය තීන්දු කළා. සමගි ජන බලවේගය ගත්ත ඒ තීන්දුව නිවැරදි බව තහවුරු කරලා තිබෙනවා. මෙය ප්‍රජාතන්ත්‍රවාදයට විශාල ශක්තියක්. රටේ ප්‍රජාතන්ත්‍රවාදය ආරක්ෂා කරන්න අධිකරණ පද්ධතිය බැඳී සිටින බව මෙයින් තවත් තහවුරු වුණා. සරත් පොන්සේකා සජබයෙන් ඉවත් වුණ එක පක්ෂයට විශාල ශක්තියක්. ඒ වගේම සරත් ෆොන්සේකා මන්ත්‍රීවරයා සමගි ජන බලවේගයේ සභාපති ධුරයෙන් ඉවත් වෙලා තිබෙනවා.
සරත් පොන්සේකා මන්ත්‍රීවරයා සමගි ජන බලවේගයේ තරග කරලා තමයි පාර්ලිමේන්තුවට ආවේ. ඒ අනුව සමගි ජන බලවේගයේ සභාපති ධුරයට සරත් ෆොන්සේකා මන්ත්‍රීවරයාට දෙන්න සමගි ජන බලවේගයේ කෘත්‍යාධිකාරී මණ්ඩලය තීරණය කරලා තිබෙනවා. නමුත් ඔහු සමගි ජන බලවේගයේ සභාපතිවරයා ලෙස කටයුතු කරමින් දිගින් දිගටම පක්ෂයට සහ නායකත්වය විවේචනය කළා. ඒ වගේම සරත් ෆොන්සේකා මන්ත්‍රීවරයාට දේශපාලනය ගැළපෙන්නේ නෑ. සරත් ෆොන්සේකා යුද්ධයට ජෙනරාල් කෙනෙක් වුණාට ඔහුට දේශපාලනයේදී කෝප්‍රල් කෙනෙක් තරම්වත් දැනුමක් නෑ. ගුණමකු දේශපාලනයක් තුළ පැවැත්මක් නෑ. ඔහු ඉවත් වුණ එක පක්ෂයට විශාල ශක්තියක්.
DMN