රජයට එක්වීමෙන් අනතුරුව හරීන් ප්‍රනාන්දු සහ මනූෂ නානායක්කාර යන මහත්වරුන්ගේ පක්ෂ සාමාජිකත්වය අහිමි කිරීමට සමගි ජන බලවේගය ගත් තීරණය නීත්‍යනුකූල බවට ශ්‍රේෂ්ඨාධිකරණය ඊයේ (09) තීරණය කළේය.
සිය පක්ෂ සාමාජිකත්වය අහිමි කිරීමට එරෙහිව ඔවුන් දෙදෙනා ගොනු කළ පෙත්සම් දෙකක් සම්බන්ධයෙන් වන තීන්දුව ප්‍රකාශ කරමින් මේ බව තීරණය කරන ලදි. ඒ අනුව එම පෙත්සම් ගාස්තු රහිතව නිෂ්ප්‍රභ කරන ලදි. විජිත් මලල්ගොඩ, අචල වෙන්ගප්පුලි සහ අර්ජුන ඔබේසේකර යන ශ්‍රේෂ්ඨාධිකරණ විනිසුරු මඬුල්ලේ ඒකමතික තීන්දුව විනිසුරු අර්ජුන ඔබේසේකර මහතා විසින් විවෘත අධිකරණයේ දී ප්‍රකාශ කරන ලදි.
ඔවුන් දෙදෙනාට එරෙහිව කරන ලද විනය පරීක්ෂණය සාධාරණ සහ යුක්තිසහගත බවට විනිසුරු මඬුල්ල විසින් තීන්දු කරන බව අර්ජුන ඔබේසේකර මහතා එහිදී ප්‍රකාශ කළේය. සමගි ජන බලවේගයේ මන්ත්‍රීවරුන් ලෙස පාර්ලිමේන්තුවට තේරී පත්වූ පෙත්සම්කරුවන් එම පක්ෂයේ තීරණයට පටහැණිව යමින් රජයට එක්වීමෙන් අනතුරුව විනය පරීක්ෂණයක් පවත්වා ඇති බවද, එම විනය පරීක්ෂණය නීත්‍යනුකූල නොවන බව ද ප්‍රකාශ කරමින් මෙම පෙත්සම් ඉදිරිපත් කළ බව ද විනිසුරුවරයා සඳහන් කළේය.
එම තීරණය නීතියට හා ස්වාභාවික යුක්ති මූලධර්මයට පටහැණි බවට පෙත්සම් විභාගයේදී කරුණු ඉදිරිපත් වූ බව මෙම ශ්‍රේෂ්ඨාධිකරණ තීන්දුවෙහි සඳහන් වේ. පෙත්සම්කරුවන් දෙදෙනා පක්ෂයෙන් නෙරපීමට ගත් තීරණය ස්වභාව යුක්ති මූලධර්මයට පටහැණි බව එහිදී විනය කමිටුව නීතියට පටහැනිව නම් කිරීම ඇති බවට එහිදී කරුණු ඉදිරිපත් කළ බවට විනිසුරු මඬුල්ල තීරණය කර ඇත. අදාළ විනය පරීක්ෂණයේ දී නිදහසට කරුණු දැක්වීමට ඔවුන්ට ප්‍රමාණවත් තරම් කල් ලබාදී තිබූ නමුත් ඔවුන් එම අවස්ථාවන් පැහැර හැර ඇති බව එම තීන්දුවේ සඳහන් වේ.
එසේම තවදුරටත් නිදහසට කරුණු දැක්වීම සඳහා පරීක්ෂණයේදී කල් ඉල්ලා සිටීම යුක්තිසහගත නොවන බවද ඒ සඳහා පෙත්සම්කරුවන්ට හිමිකමක් නොමැති බවටද විනිසුරු මඬුල්ල විසින් තීරණය කර තිබේ. ඒ අනුව තමන්ට සාධාරණ විනය පරීක්ෂණයක් නොලැබුණු බවට පෙත්සම්කරුවන් විසින් ඉදිරිපත් කළ තර්ක ප්‍රතික්ෂේප කිරීමට ශ්‍රේෂ්ඨාධිකරණය විසින් තීරණය කර ඇත. පෙත්සම් මඟින් වගඋත්තරකරුවන් ලෙස පක්ෂයේ මධ්‍යම කාරක සභාවේ සාමාජිකයන් නම් කර නොමැති බැවින් අත්‍යවශ්‍ය පාර්ශ්වකරුවන් නම් කර නොතිබීමේ පදනම මත පෙත්සම ඉවත දමන ලෙස තමන් මූලික විරෝධතාවයක් ඉදිරිපත් කරන බව ද විනිසුරුවරයා තවදුරටත් සඳහන් කළේය.
පෙත්සම්කරුවන්ට එරෙහිව කටයුතු කිරීම වළක්වමින් මහේස්ත්‍රාත් අධිකරණය මඟින් වාරණ නියෝගයක් ලබාගෙන තිබුණද පෙත්සම්කරුවන් සම්බන්ධව විනය පියවර ගැනීමට එම වාරණ නියෝගය බාධාවක් නොවන බවද තීන්දු කළ ශ්‍රේෂ්ඨාධිකරණය එය තාවකාලිකව නිකුත් කළ නියෝගයක් බවට තීරණය කළේය. ඒ අනුව පෙත්සම්කරුවන්ගේ පක්ෂ සමාජිකත්වය අහිමි කිරීමට ගත් තීරණය නිවැරදි බවට තීරණය කරන බවද අදාළ පෙත්සම් නිෂ්ප්‍රභ කිරීමට නියෝග කරන බවද ශ්‍රේෂ්ඨාධිකරණ තීන්දුවෙහි සඳහන් වේ. තමන්ගේ පක්ෂ සාමාජිකත්වය තහනම් කිරීමට සමගි ජන බලවේගය ගත් තීරණයට එරෙහිව මෙම පෙත්සම් ගොනු කර තිබුණි.
පක්ෂයේ විනය කඩ කිරීමේ චෝදනාවලට තමන් වරදකරුවන් වී ඇති බැවින් පක්ෂ සාමාජිකත්වය අත්හිටුවීමට තීරණය කළ බව සඳහන් කරමින් එම පක්ෂයේ නියෝජ්‍ය මහලේකම්වරයා විසින් නිකුත් කළ ලිපියක් ඉකුත් ජූලි මස 24 වැනි දා තමන්ට ලැබුණු බව පෙත්සම්කරුවෝ පවසති. පක්ෂයේ විධායක කමිටුව විසින් ගත් එම තීරණය සමගි ජන බලවේගයේ ව්‍යවස්ථාවට මෙන්ම ස්වාභාවික යුක්ති ධර්මයට ද පටහැණි බවට පෙත්සම්කරුවෝ චෝදනා කර සිටියහ. එසේම එම තීරණය නීති විරෝධී බවට ඔවුහු කරුණු ඉදිරිපත් කර ඇත.
එම පක්ෂ සාමාජිකත්වය අහිමි කිරීමට ගත් තීරණය මඟින් සිය පාර්ලිමේන්තු මන්ත්‍රී ධුර අහිමි නොවන බවට නියෝගයක් ලබාදෙන ලෙස පෙත්සම්කරුවෝ අධිකරණයෙන් ඉල්ලා සිටියහ. ජනාධිපති නීතිඥ රොමේෂ් ද සිල්වා මහතා පෙත්සම්කාර හරීන් ප්‍රනාන්දු මහතා වෙනුවෙන් පෙනී සිටි අතර, ජනාධිපති නීතිඥ ෆයිසර් මුස්තාපා මහතා පෙත්සම්කාර මනූෂ නානායක්කාර මහතා වෙනුවෙන් පෙනී සිටියේය.
DMN