පෙරේදා (14) අධිකරණය වෙත ඉදිරිපත් කිරීමෙන් අනතුරුව සැකකරු තවදුරටත් රක්ෂිත බන්ධනාගාරගත කරන ලෙස අධිකරණය තීන්දු කර ඇතැයි වාර්තා වෙයි. මේ සම්බන්ධ නඩු විභාගය එළඹෙන 28 වනදා යළි කැඳවීමට නියමිත බව වාර්තා වෙයි.
කෙසේ වුවද මේ සැකකරු වෙනුවෙන් පෙනී සිටි නීතිඥයන් ඇප ඉල්ලා සිටියද අධිකරණය ඒ සඳහා අවසර දී නැත. මේ අතර මේ තරුණයාට මානසික ආබාධයක් තිබේද යන්න පරීක්ෂා කිරීම සඳහා පොලිසියට නියෝග කළ ඔටාවා අධිකරණ්‍ය සඳහන් කර ඇත්තේ ඉදිරිපත්ව තිබෙන තොරතුරු සියල්ල විමර්ශනය කරන බවයි. මේ සැකකරු මානසික වෛද්‍යවරයකු වෙත ඉදිරිපත් කොට එම වාර්තාව අධිකරණය හමුවට ඉදිරිපත් කරන ලෙස ද නියෝග කර තිබේ.
කුඩා ළමයින් 4 දෙනකු, ඔවුන්ගේ මව සහ තවත් ශ්‍රී ලාංකිකයකු මෙහිදී ඝාතනයට ලක් වූ අතර මියගිය දරුවන්ගේ පියාද තුවාල ලබා මේ වන විට රෝහල්ගතව ප්‍රතිකාර ලබමින් සිටී. සිද්ධිය සම්බන්ධයෙන් ඝාතනය සිදු වූ නිවෙසේම පදිංචිව සිටි 19 හැවිරිදි ශ්‍රී ලාංකික තරුණයා අත්අඩංගුවට ගත් අතර මේ වන විට එම තරුණයාට මිනීමැරීම් හයක සහ මිනීමැරීමට උත්සාහ කිරීමකට චෝදනා එල්ල වී තිබේ.
මේ අතර දැනට තුවාල ලබා රෝහල්ගතව ප්‍රතිකාර ලබන ධනුෂ්ක වික්‍රමසිංහ මහතාගේ සුවදුක් විමසීමට කැනඩාවේ ශ්‍රී ලංකා මහ කොමසාරිස් කාර්යාලයේ නිලධාරීන් රෝහලට ගොස් තිබෙන අතර මියගිය ශ්‍රී ලාංකිකයන්ගේ පෞද්ගලිකත්වයට ගරු කරමින් ඔවුන්ගේ පවුල්වල සාමාජිකයන් සම්බන්ධ කරගනිමින් ශ්‍රී ලංකා මහ කොමසාරිස් කාර්යාලය සහ කැනේඩියානු බලධාරීන් සමඟ එක්ව අවශ්‍ය පහසුකම් සැපයීමට පියවර ගන්නා බව විදේශ කටයුතු අමාත්‍යාංශය පවසයි.
මියගිය ශ්‍රී ලංකිකයන්ගේ පවුල්වලට මූල්‍යමය වශයෙන් ආධාර කිරීම සඳහා එරට ප්‍රජාව ද සමඟ එක්ව කැනඩාවේ බෞද්ධ මහා සම්මේලනය පියවර ගෙන තිබෙන අතර පවුලේ සාමාජිකයන්ට අවමංගල්‍ය කටයුතු සඳහා විහාරස්ථානය, ප්‍රජාව සහ මහ කොමසාරිස් කාර්යාලය විසින් සම්බන්ධීකරණය කරන ලද සියලු කටයුතු සඳහා පහසුකම් සැපයීමටද සූදානමින් සිටී.
මේ අතර මෙම සිද්ධිය පාදක කොටගෙන අධ්‍යාපනය සඳහා කැනඩාවට යාමට අපේක්ෂා කරන බොහෝ දෙනා කැනඩාවේ සංක්‍රමණික නීති මේ හරහා දැඩි වේයැයි සැකයෙන් පසු වූ නමුත් කැනඩාවට පැමිණෙන කිසිදු ශ්‍රී ලාංකික ශිෂ්‍යයෙකුට මේ සිද්ධිය පදනම් කරගෙන සීමා පැනවීමේ සූදානමක් නැති බවද ඒ වෙනුවෙන් ඉදිරිපත් වන සියලු ඉල්ලම්පත් සම්බන්ධයෙන් පෙර පරිදිම වෙනත් රටවල් හා සමානව සැලකීම තම ප්‍රතිපත්තිය බවද කැනඩා රජයේ ආගමන, සරණාගත සහ පුරවැසිභාවය පිළිබඳ කාර්යාලය පවසයි.
DMN