මොස්කව් නුවර ‘ක්‍රොකස් සිටි හෝල්‘ ශාලාවට එල්ල වූ ත්‍රස්ත ප්‍රහාරයට සම්බන්ධ මේ වන විට පුද්ගලයන් 11 දෙනකු අත්අඩංගුවේ පසුවන අතර, පෙරේදා ත්‍රස්ත පනත යටතේ අධිකරණයට ඉදිරිපත් කළ සිවුදෙනාට අමතරව ඊයේ දිනයේ තවත් පුද්ගලයන් තිදෙනකු අධිකරණයට ඉදිරිපත් කර මැයි මස 22 දක්වා රඳවා තබාගෙන ප්‍රශ්න කිරීමට විමර්ශන නිලධාරීන් අවසර ලබාගත් බව අල් ජසීරා පුවත් සේවය වැඩිදුරටත් වාර්තා කළේය.
එම තිදෙනා එකම පවුලක පියා සහ පුතුන් දෙදෙනකු බවත්, පියා ටජිකිස්තාන ජාතිකයකු සහ පුතුන් දෙදෙනා රුසියාවේ පුරවැසිභාවය ලැබූ දෙදෙනකු බවත් වාර්තා වේ.
පසුගිය සඳුදා එරට රූපවාහිනියෙන් ජාතිය ඇමතූ රුසියානු ජනාධිපතිවරයා සඳහන් කර ඇත්තේ ඉස්ලාමීය ලෝකයක දෘෂ්ටිවාදයෙන් සියවස් ගණනාවක් පුරා යුද වදිමින් සිටින රැඩිකල් ඉස්ලාමීය සංවිධානයක් මේ ප්‍රහාරය පසුපස සිටින බවය.
එහෙත් එම ඉස්ලාමීය සංවිධානය අයිඑස් සංවිධානය බවට ඔහු කිසිඳු ප්‍රකාශයක් සිදු කර නැති බව ද වාර්තා වේ. මේ කුරිරු ප්‍රහාරයට 2014 සිට රුසියාව සමඟ සටන් වැදී සිටින යුක්රේනයේ සම්බන්ධතාවක් තිබිය හැකි බවද පුටින් ප්‍රකාශ කර ඇතැයි වාර්තා වේ.
‘සැබැවින්ම ප්‍රශ්නයට පිළිතුරු සැපයීම අත්‍යවශ්‍යයි. ඇයි මේ අපරාධය සිදු කිරීමෙන් පසු ත්‍රස්ත කල්ලිය යුක්රේනයට පලා යන්න උත්සාහ කළේ..? ඔවුන් වෙනුවෙන් යුක්රේනයේ පොරොත්තු වෙමින් සිටියේ කවුද ?‘ පුටින් වැඩිදුරටත් එසේ සඳහන් කර තිබේ.
DM