බංග්ලාදේශයේ අන්තර්වාර රජයක් පිහිටුවීමට ජනාධිපති මොහොමඩ් ෂහාබුඩීන් පියවර ගෙන ඇතැයි ද, පැරිස් නුවර සිට පැමිණි මහාචාර්ය මොහොමඩ් යූනුස් එම රජයේ ප්‍රධානියා ලෙස ජනාධිපතිවරයා ඉදිරියේ දිව්රුම් දී ඇතැයි ද විදෙස් මාධ්‍ය වාර්තා කළේය.
අන්තර්වාර රජයක් පිහිටුවීමට පෙර ජනාධිපතිවරයා ශ්‍රේෂ්ඨාධිකරණයේ මතය විමසා ඇති අතර, රටේ වත්මන් තත්ත්වය සැලකිල්ලට ගෙන සත් පුද්ගල ශ්‍රේෂ්ඨාධිකරණ විනිසුරු මණ්ඩලය ඒ සඳහා අනුමැතිය ලබා දී ඇතැයි ද විදෙස් මාධ්‍ය වැඩිදුරටත් වාර්තා කළේය. දැනට පාර්ලිමේන්තුවක් නොමැති බැවින් ජනාධිපතිවරයාට අන්තර්වාර රජයක් පිහිටුවිය හැකි බව ශ්‍රේෂ්ඨාධිකරණයේ මතය වී ඇතැයි ද වාර්තා වේ. මේ අතර අන්තර්වාර රජයේ උපදේශක මණ්ඩලයට පළමුවරට සරසවි සිසුන් දෙදෙනකු ද නම් කර ඇති අතර, පසුගිය ශිෂ්‍ය විරෝධතාවට නායකත්වය දුන් සිසුන් දෙදෙනකු ඒ සඳහා දිව්රුම් දී ඇතැයි ද වාර්තා වේ. සරසවි සිසුන්ට අමාත්‍යාංශ තුළ අධීක්ෂණ කටයුතු සිදු කිරීමට හැකිවන පරිදි ඉදිරියේදී තවත් සිසුන් කිහිපදෙනකු සහකාර උපදේශකයන් ලෙස හෝ ඒ හා සමාන තනතුරුවලට පත් කරන ලෙස සරසවි ශිෂ්‍ය ව්‍යාපාරය ඉල්ලීමක් ද කර තිබේ. තරුණ නායකත්වය කෙරෙහි බංග්ලාදේශයේ ජනතාව අඛණ්ඩව විශ්වාසය තබනු ඇතැයි ද උපදේශක මණ්ඩලයට පත්වූ සිසුන් ප්‍රකාශ කර ඇතැයි වාර්තා වේ.
DMN