බංග්ලාදේශයේ පැතිරී ගිය ප්‍රචණ්ඩ ක්‍රියා පසුපස පාකිස්තානයේ බුද්ධි ඒජන්සිය සිටින බවට ධුරයෙන් ඉවත්වී ඉන්දියාවට ගිය ශෙයික් හසිනාගේ පුත්‍රයා වන සජීඩ් වසීඩ් ඉන්දියාවේ ප්‍රෙස් ට්‍රස්ට් ඔෆ් ඉන්ඩියා පුවත් සේවයට ප්‍රකාශ කර ඇතැයි වාර්තා වේ. එම පුවත් සේවය සමඟ අමෙරිකාවේ සිට සම්මුඛ සාකච්ඡාවකට එක්වෙමින් සජීඩ් වසීඩ් මේ ප්‍රකාශය සිදු කර ඇති අතර, පාකිස්තාන බුද්ධි ඒජන්සිය බංග්ලාදේශයේ ප්‍රචණ්ඩ ක්‍රියා පසුපස සිටින බවට තහවුරු කළ හැකි සාක්ෂි ඇතැයි ද ඔහු වැඩිදුරටත් සඳහන් කර ඇතැයි වාර්තා වේ.
‘ප්‍රචණ්ඩ ක්‍රියා පැතිරීම පිටුපස ජාත්‍යන්තර බලවේග හා පාකිස්තානයේ බුද්ධි ඒජන්සියේ මැදිහත්වීම ගැන සාක්ෂි තියෙනවා. මොකද මේ ප්‍රචණ්ඩක්‍රියා හා ප්‍රහාර එල්ල කිරීම ඉතා සංවිධානාත්මක විදිහටයි සිද්ධ වුණේ. ඉතා සූක්ෂම විදිහට සැලසුම් කරලයි තිබුණේ. සමාජ මාධ්‍ය හරහා ජාත්‍යන්තර උත්සාහයන් ඇවිළෙන ගින්නට පිදුරු දැමීමක් වගේ වැඩක් සිද්ධ කළේ.‘ ප්‍රෙස් ට්‍රස්ට් ඔෆ් ඉන්ඩියා පුවත් සේවයට හසීනාගේ පුත්‍රයා එසේ ප්‍රකාශ කර තිබේ.
අමෙරිකාවේ පුරවැසිභාවය ඇති සජීඩ් වසීඩ් සීඅයිඒ ඔත්තු සේවය බංග්ලාදේශ අර්බුදය පිටුපස සිටි බවට පළ වී ඇති මාධ්‍ය වාර්තා පවා ප්‍රතික්ෂේප කර නැත. ‘සමහර විට ඔවුන් ඉන්නත් පුළුවනි‘ එහෙත් චීනය එවැන්නකට මැදිහත් වූ බවට පළ වූ වාර්තා නම් ඔහු තරයේම ප්‍රතික්ෂේප කළේය.
DN