වසර 1990දී ලෙබනනයේ සිවිල් යුද්ධය නිමාවීමෙන් පසු එරට සිදුවූ දරුණුතම ප්‍රහාරය මෙය බව විදෙස් මාධ්‍ය වැඩිදුරටත් වාර්තා කළේය. දරුවන් 35 දෙනකුත්, කාන්තාවන් 58 දෙනකුත් බෝම්බ ප්‍රහාරයට ගොදුරු වී ඇති අතර, තවත් 1800කට වැඩි පිරිසක් තුවාල ලබා ඇතැයි වාර්තා වේ.
පෙරේදා පස්වරුවේ සිට අඛණ්ඩව ඊයේ දහවල් වනතුරු ඊශ්‍රායල හමුදා ගුවන් යානා මගින් දකුණු ලෙබනනයට බෝම්බ හෙළූ බවත්, ජීවිත බේරා ගැනීමට එම පළාතේ ජනතාව බීරුට් අගනුවර කරා පලා යමින් සිටින බවත් විදෙස් මාධ්‍ය සඳහන් කළේය. මේ අතර බීරුට් අගනුවර සිටින විදේශිකයන් ඇතුළු විශාල පිරිසක් රටින් පිටවෙමින් සිටින බව ද වාර්තා වේ. ඊශ්‍රායල ප්‍රහාරයට ප්‍රතිචාර ලෙස ඊයේ උදෑසන හෙස්බුල්ලා සංවිධානයෙන් උතුරු ඊශ්‍රායලයට රොකට් ප්‍රහාරයක් එල්ල වුවද, ඉන් වැඩි ප්‍රමාණයක් අයන් ඩෝම් මිසයිල නාශක පද්ධතියෙන් ගුවනේදීම විනාශ කළ බව ඊශ්‍රායල රජය ප්‍රකාශ කර තිබේ. දකුණු ලෙබනනයේ හෙස්බුල්ලා සංවිධානයට අයත් බවට හඳුනාගත් ඉලක්ක 1300කට පමණ බෝම්බ හෙළූ බවත්, ඉන් එම සංවිධානයේ විශාල පිරිසක් මිය යන්නට ඇති බවත් ඊශ්‍රායල ආරක්ෂක හමුදාව ප්‍රකාශ කර ඇත. මිය ගිය ගණන තවත් ඉහළ යනු ඇතැයි ද වාර්තා වේ. ප්‍රහාරවලින් තුවාල ලැබූ පිරිස අටසියයකට ආසන්න බවත් වාර්තා වේ. ඊශ්‍රායල හමුදාව මේ දරුණු ප්‍රහාරය ආරම්භ කර ඇත්තේ පසුගියදා හෙස්බුල්ලා සංවිධානය උතුරු ඊශ්‍රායලයට එල්ල කළ රොකට් ප්‍රහාරවලට ප්‍රතිචාර දක්වමින් බව විදෙස් මාධ්‍ය වැඩිදුරටත් වාර්තා කළේය.
ඊශ්‍රායල හමුදාවේ මිසයිල ප්‍රහාරය එල්ල වූයේ හෙස්බුල්ලා සාමාජිකයන් ගැවසෙන ප්‍රදේශවලින් ඉවත් වන ලෙස ප්‍රහාරයට පෙර ලෙබනනයේ ලක්ෂයකට ආසන්න ජනතාවගේ දුරකතනවලට කෙටි පණිවිඩ යැවීමෙන් පැය කිහිපයකට පසුවය.
DN