යුදමය වාතාවරණයක් පැවතිය ද ලෙබනනයේ වෙසෙන ශ්‍රී ලාංකිකයින් ආරක්ෂිතව සිටින බව එරට ශ්‍රී ලංකා තානාපති කාර්යාලය ප්‍රකාශ කරයි.
එරට වෙසෙන ශ්‍රී ලාංකිකයන් සමඟ මේ වන විටත් තානාපති කාර්යාලය සමීප සම්බන්ධතා පවත්වමින් සිටින බව ලෙබනනයේ ශ්‍රී ලංකා තානාපති කපිල ජයවීර මහතා සඳහන් කරයි.
මෙරට ශ්‍රමිකයින් 7,600කට ආසන්න සංඛ්‍යාවක් ලෙබනනයේ සේවය කරන අතර, ඔවුන් බොහොමයක් එරට දකුණු ප්‍රදේශවල වාසය කරන බවද හෙතෙම පෙන්වා දෙයි.
ඊශ්‍රායලය පසුගිය දින කිහිපය තුළ ලෙබනනයේ හිස්බුල්ලා සංවිධානය ඉලක්ක කර ගනිමින් ගුවන් ප්‍රහාර දියත් කළ අතර, එරට උතුරු ප්‍රදේශයේ ගැටුම්කාරී තත්ත්වයක් පවතින බව සඳහන් කරන ශ්‍රී ලංකා තානාපතිවරයා ගැටුම් පවතින ප්‍රදේශවල ශ්‍රී ලාංකිකයින් ජීවත් නොවන බව ද අවධාරණය කරයි.
ගුවන් ප්‍රහාර හේතුවෙන් මියගිය පුද්ගලයින් සංඛ්‍යාව 600කට අධික වන අතර, මේ වන විට ලෙබනනය ද ඊශ්‍රායලයට ප්‍රතිප්‍රහාර එල්ල කිරීම ආරම්භ කර ඇති බැවින් කලාපයේ මතු වී ඇත්තේ ගැටුම්කාරී වාතාවරණයක් බව කියා සිටී.