ලාඕසයේ අගමැති සොනෙක්සේ සිපන්ඩෝන්ගේ ප්‍රධානත්වයෙන් පැවැති එම සමුළුවට බෘනායි, කාම්බෝජියා, ඉන්දුනීසියාව, මැලේසියාව, මියන්මාරය, පිලිපීනය, සිංගප්පූරුව, තායිලන්තය, වියට්නාමය, ඔස්ට්‍රේලියාව, චීනය, ඉන්දියාව, ජපානය, නවසීලන්තය, දකුණු කොරියාව, රුසියාව සහ අමෙරිකාව නියෝජනය කරමින් රාජ්‍ය නායකයන්, විදේශ ඇමැතිවරු ඇතුළු නියෝජිතයන් සාමාජික රටවල් සහ ආරාධිත රටවල් ලෙස එක්වූ බව විදෙස් මාධ්‍ය වැඩිදුරටත් වාර්තා කළේය.
මෙවර නැඟෙනහිර ආසියානු සමුළුවට එක්වූ නියෝජිතයන් අතර ඉන්දීය අගමැති නරේන්ද්‍ර මෝදි සහ චීන අගමැති ලි ක්වැං කැපී පෙනුණු බවත්, එහිදී දෙදෙනා දැක්වූ අදහස් සෙසු සාමාජික රටවල් අතර පැසසුමට හා අවධානයට ලක්වූ බවත් විදෙස් මාධ්‍ය සඳහන් කළේය.
ඉන්දු පැසිෆික් කලාපයේ රටවල් මුහුණ දෙන සාමය, ස්ථාවරත්වය සහ සමෘද්ධිය සම්බන්ධ අභියෝග සඳහා සාමුහික එකඟතාවට පැමිණීමට එම සමුළුව අතිශය වැදගත් පිටුවහල් සපයනු ඇතැයි මෙහිදී අදහස් පළ කළ ඉන්දීය අගමැතිවරයා ප්‍රකාශ කර ඇති අතර, ආසියාතික රටවලට එක හා සමාන ප්‍රතිලාභ හා අවස්ථා උදා කරගැනීමටත්, දිගුකාලීන ස්ථාවරත්වය සහ සංවර්ධනය ගොඩනඟමින් ආසියාව වඩාත් යහපත් කලාපයක් බවට පත් කිරීමට හැකියාව ඇතැයි චීන අගමැතිවරයා ප්‍රකාශ කළ බව විදෙස් මාධ්‍ය වාර්තා කළේය.
DN