62 හැවිරිදි තවිසින් නොසැලකිලිමත් ආකාරයෙන් කටයුතු කර ඇතැයි ද, ආචාරධර්ම පිළිබඳ නීතිරෙගුලාසි උල්ලංඝනය කර ඇතැයි ද කියමින් තායිලන්ත ව්‍යවස්ථාදායක අධිකරණය මේ තීන්දුව ගෙන ඇතැයි විදෙස් මාධ්‍ය වැඩිදුරටත් වාර්තා කළේය. ඊයේ පැවැති නඩු විභාගයේදී 9 දෙනකුගෙන් යුතු විනිසුරු මඬුල්ලෙන් 5 දෙනකුම අගමැතිවරයා ධුරයෙන් ඉවත් කළ යුතු බවට තීන්දු කර තිබූ බව වාර්තා වේ. තායිලන්තයේ වසර 9ක හමුදා පාලනය අවසන් කරමින් සෙත්‍රා තවිසින් එරට අගමැති ධුරයට පත්වූයේ පසුගිය වසරේ අගෝස්තුවේදීය.
සෙත්‍රා තවිසින්ට ධුරය අහිමි වූයේ එරට අගමැති ධුරයට පත්වී වසරකටත් අඩු කාලයකදී වන අතර, වසර 16ක් ඇතුළත එම අධිකරණය විසින්ම ධුරයෙන් නෙරපා හරිනු ලැබූ තුන්වැනි අගමැතිවරයා ලෙස ඉතිහාසයට එක්වූ බව විදෙස් මාධ්‍ය සඳහන් කළේය. පාර්ලිමේන්තුව තුළින් නව අගමැතිවරයකු පත්වනතුරු අන්තර්වාර අගමැතිවරයකු පත්වනු ඇතැයි ද වාර්තා වේ.
අල්ලස් ගැනීමේ චෝදනාවකට වරදකරු වී මාස 6ක සිරදඬුවම් ලැබූ පිචිට් චුයින්බන් නමැති එම හිටපු නීතිඥයා කැබිනට් ඇමැති ධුරයකට පත්කිරිම හේතුවෙන් අගමැතිවරයා ඉවත් කරන ලෙස මන්ත්‍රීවරුන් 40කට වැඩි පිරිසක් විසින් එම අධිකරණයට පෙත්සමක් ගොනු කරනු ලැබුවේ පසුගිය මැයි මාසයේදීය.
DMN