බෙහෙත් විෂ වීමෙන් සිදු වූ ළමා මරණ සැලකිල්ලට ගෙන ඉන්දියාවේ වයස අවුරුදු හතරෙන් පහළ ළමුන්ට සෙම්ප්‍රතිශ්‍යාව සඳහා ලබා දෙන ප්‍රකට බෙහෙත් සංයෝගයක් ලබා දීම තහනම් කිරීමට එරට ඖෂධ පාලන අධිකාරිය විසින් පියවර ගෙන තිබේ.

ගාසා තීරයට ඊශ්‍රායල හමුදාව විසින් එල්ල කරන ප්‍රහාරයන් සම්පූර්ණයෙන් නතර කිරීමක් පිළිබඳව මිසක තාවකාලික සටන් විරාමයක් සම්බන්ධයෙන් සාකච්ජා කිරීම හමාස් සංවිධානයේ නායක ඉස්මයිල් හනියේ විසින් ප්‍රතික්ෂේප කර තිබේ.

රුසියානු හමුදා සමග වසර දෙකකට ආසන්න කාලයක් යුද වැදී සිටින යුක්‍රේන හමුදාව සඳහා අමතර හමුදා භටයන් පන් ලක්ෂයක් දක්වා වූ සංඛ්‍යාවක් අවශ්‍යව ඇතැයි යුක්‍රේන ජනාධිපති ව්ලැදිමීර් සෙලෙන්ස්කි පවසයි.

ආණ්ඩුක්‍රම ව්‍යවස්ථා විරෝධී කැරැල්ලකට සම්බන්ධ වීමේ වරදට හිටපු ඇමරිකානු ජනාධිපති ඩොනල්ඩ් ට්‍රම්ප්ට ලබන වසරේ පැවැත්වෙන ඇමරිකානු ජනාධිපතිවරණයේදී කොලරාඩෝ ප්‍රාන්තය සඳහා තරග කළ නොහැකි බව ඇමරිකාවේ කොලරාඩෝ ප්‍රාන්ත ශ්‍රේෂ්ඨාධිකරණය විසින් ප්‍රකාශයට පත් කර තිබේ.

චීනයේ ගන්සු පළාතේ ඇතිවූ භූ කම්පනයෙන් මියගිය ගණන 118 ඉක්මවා ඇතැයි චීන ප්‍රාන්ත බලධාරීන් සඳහන් කරයි. තුවාල ලැබූ පිරිස ද ඊයේ (19දා) වනවිට 397කට වඩා වැඩි බව සඳහන් කරයි.

ඉන්දීය පාර්ලිමේන්තුවට (ලෝක් සභා) පසුගිය සතියේ බාහිර පුද්ගලයන් දෙදෙනකු කඩාවැදීමේ සිද්ධියෙන් පාර්ලිමේන්තුවේ ආරක්‍ෂාව බිඳවැටී ඇති බව පවසමින් විරෝධතාවයේ යෙදුණු ඉන්දීය විපක්‍ෂයේ පාර්ලිමේන්තු මන්ත්‍රීවරුන් 141 දෙනකුට පාර්ලිමේන්තු රැස්වීම්වලට සහභාගිවීම අත්හිටුවීමට එරට පාර්ලිමේන්තු වරප්‍රසාද කමිටුව විසින් පියවර ගෙන ඇත.

ඊජිප්තු ජනාධිපතිවරණයෙන් එරට ජනාධිපති ෆාටා අල් සීසී ට විශිෂ්ට ජයක් හිමි විය. ෆාටා අල් සීසී ජනාධිපති ධුරයට පත් වූයේ පිටපිට තෙවැනි වරටය.

චෝදනා රැසකට වරදකරු වී සිරදඬුවම් විඳින පාකිස්තාන හිටපු අග්‍රාමාත්‍ය ඉම්රාන් ඛාන්, බන්ධනාගාරයේ සිටිද්දී, කෘත්‍රිම බුද්ධි තාක්ෂණය භාවිතයට ගනිමින් ජන රැලියක් ඇමැතුවේය.

චීනයේ බීජිං අගනුවර උමං දුම්රිය මාර්ගයක (14) දින ගමන් ගත් දුම්රිය දෙකක් එකට ගැටීම හේතුවෙන් ඒවායේ ගමන් ගත් මගීන් 500 කට අධික පිරිසක් තුවාල ලබා රෝහල්ගත කර ඇති අතර ඉන් 102 කගේ අස්ථි කැඩී ගොස් ඇතැයි චීන මාධ්‍ය පවසයි.